اورطيغا: (كان تلقا مع واحد كل عام كيتلقاو فهاد القنت، ماشي صاحبو وماشي عشيرو غير كان بيناتهم السلام وهاد المرة جا عندو تعرف علييه وبقاو جالسين كيصيدو الحوت بجوج كملو ومشا لاخر لاطونط ديالو اورطيغا شعل العافية وبقا كيشوية داك الحوت صونا على ملاك مجاوبتش كانت علماتو خرجت بكري من الخدمة حيت عياات صونات مو جاوب)
الوالدة!!
أمينة: امتى تجي اولدي
اورطيغا: علاش الوالدة؟!
أمينة: حيت توحشتك اولدي بغيت نشوفك ونهضرو
اورطيغا: بعد غدا الا كتاب
أمينة: ان شاء الله اوليدي، صافي تلقاني فالدار
اورطيغا: ان شاء الله (دار الدكة) رتاحيتي شوية
أمينة: الحمد لله اولدي (هضرتو كانت ناقصة دارت بكلام الحاج تخليه على خاطرو قطعت ودوزت نمرة زهرة للي كتبقى تفش عليها هموومها وتعاود ليها حيت لقات راحتها معاها
نجية: دير عقلك احمزة راه الا وصلوها لرشيد غتنوض رويينة وحنا مشفنا من دوك الناس غير الخير
حمزة: هي للي قالت ليك هاكا
نجية: اه هي وشكات على مها المرة جاية تشكا على باها
حمزة: لا لا مزيان نيت!! نساات كولشي غير قبل منعرفو ديك الموصيبة حاملة كانت مدوزة معايا الحب والغرام وتشد فلكادوياات
نجية: اسكت اسكت غتسمعك مرتك راه حراام هادشي للي كدير واش مرتك قرب شهرها ونتا مزال داير عقلك فملاك
حمزة: ندير حيت من اللول لوكان موقفتوش فيها وكان راها هي دابا للي حاملة. هي لي تكون مرتب
نجية: (كتندب حنوكها) أويييييلييي استغفر الله واش هبلت؟!
حمزة: دابا شنو بغات منعاودش نتعرض ليها واخ ولكن ونشوفها مع شي حد غنشوهها نقتلها ونقتل للي معاها
نجية: ونتا شغلك؟!!!
حمزة: اه شغلي نهار يقولي راسي بعد غنبعد دابا غنوريها كفاش تبقى تشكى على ديك بمادنة ديال مها للي معمرالها راسها انا نوريها الوجه لاخر
نجية: هاا ودني راه متلقى غير رشيد قدامك راه جبدلو عينيه ومتجبدلو بناتو
حمزة: داك السوق خرجي نتي منو
نجية: هاا ودني احمزة!! والا عاودو تشكاو ذنوبك على راسك
حمزة: صافي خرجي دابا خليني نعس تابعاني الخدمة بلاتي وقول لهاديك متعتبهاش باغي نعس!!!
ادم: (كيهضر فالتيليفون) تندير هاكا فيها حيت عارف هي للي غدير بزاف دلحوايج وانا تنشووف
هههه لي لقبر ولي الحبس
اورطيغا: (كمل غدااه جمع داكشي للي تماك، لبس بروطكان ديالو ومشا كيقلب على شي حانوت يشري خبز هز صكادوه للي فيه داكشي للي مهم وتمشا هاز عصا ماشي من طريق باينة باش يرجع وكان عارف حتى بلاصة الحانوت ودايرها حجة وزيارة..
بقا ماشي سااكت مدارش حتى موسيقى براكة غير دماغو خداام يحاجي ويفك.. وصل لدوار خدا نص دجاجة وخبزة وشي سقاطة ورجع ماشي بشوية وصلو ميساج من عند ملاك صونا عليها)
كنتي ناعسة
ملاك: (كانت فبلاصتها فسطح) اممم
اورطيغا: وايلي 8 دالليل هادي؟!
ملاك: لا فقت قبيلة غير جاو شي ضياف وبقيت معاهم وغير سلت دابا باش نهضر معاك
اورطيغا: شكون هاد ضياف عاود
ملاك: ههه من العائلة
اورطيغا: باباك ولا ماما
ملاك: بابا
اورطيغا: اممم شحال عندك ديال عمك وعماتك؟!
ملاك: كاين 3 دعمامي و2 عماماتي وجدي وجداتي ميتة وكاينة مرتو كنعيط ليها مي حلو
اورطيغا: مي حلو!! اممم مزيان نتوما شلوح
ملاك؛ هوما ههه انا كنفهم الشلحة وكنعرف شي كليمات ولكن الهضرة مطلوقة لا
اورطيغا: وماماك؟! واقلة ماشي شلحة
ملاك: باش عرفتها
اورطيغا؛ شحال هضرنا انا ياها باينة فيها غير من كلامها ماشي بحال باك
ملاك: بالصح (جا يهضر قبل ميجبد تريكة مها) امتى ترجع
اورطيغا: علاش؟؟
ملاك: (تبسمت) غير باش نجي لفاس نخلص هداك للي صاوبلي الطموبيل
اورطيغا: فين ودنك اجحا ها هي باش تقولي توحشتك تدوري دورة قد هاكا علاش عليك ابنتي!!!
ملاك: هههه
اورطيغا: شنو دابا توحشتيني
ملاك: لاااااااااا
اورطيغا: وطلقي معانا اللعب شوية
ملاك: شنو كدير دابا!!
اورطيغا: والو راجع من دوار جبت فيه شي حاجة نديره لعشا
ملاك: شنو غدير لعشا
اورطيغا: دجاج
ملاك: ݣزار معشي باللفت!!
اورطيغا: ههه الواحد يبدل مرة مرة
ملاك: هه وغتطيب دجاج بلا متكون ملحو وداير فيه الحامض
اورطيغا: هاد السيد للي كيبيعلي كيكون مقاد هادشي
ملاك: مزيان يعني داير بحساب الناس لي كتجي تخيم تماك
اورطيغا: اممم عرفتي اكتر حاجة مشهيها دابا هو نتي
ملاك: كفاش انا!!
اورطيغا: باغي نشوييك
ملاك: (بقات مخرجة عينها مكتهضرش) لحمي قاسح
اورطيغا: من داك الناحية متخافيش راني ݣزار وحافض لحم متنشوي حتى ترطبو مزيااان
ملاك: (بدات الامور كتخرج على السيطرة) ياااااه امراد صافي صافي
اورطيغا: ههه مال مك تنهضر على لحم وشوا (ديك شوا كيورك عليها) فين مشا عقلك
ملاك: اممم مهم انا نهبط
اورطيغا: متعطليش وطلعي نكملو هضرتنا
ملاك: فاش هه
اورطيغا: نقولك العطرية للي تندير
ملاك: ههه بلاش بلاش انا اصلا مكنطيبش لحمي عاااصي..
اورطيغا: وانا سناني ماضيين غير متهزيش الهم...
أصبحنا وأصبح الملك لله..
كانت كتفطر مع مها عندها جوج مواضيع مهمييين بزااف بغات تهضر معاها ديال سفر وديال الدار وللي باقية براسها كتفكر فيها حيت معندهاش شي مبلغ للي كبير!! ولكن مصالحش تهضر باقية العائلة وخاصها تختار الوقت باش متسمعش لا، واليوم لاربع وغدا كحد أقصى خاصها تسجل معاهم الا كانت غتسافر خرجت للخدمة لقات باها كيتغاوت مع للي كيجيب ليه القهوة كان جابلو شي وحدة مسوسة حتى باها ماشي الوقت المناسب ركبت فطموبيلتها حتى مراد مولاتش هضرت معاه فهادشي!!
مشات صاݣت لخدمتها دخلت لقات تقريبا كولشي من للي كتعرفو ماشي حتى من صاحبتها للي بولادها بغات تمشي تبدل الجو وهي ضرووري خاص تاخد الأوكي من عند واليديها صونات على مها لقاتها مشغولة مع الدار وشقا كتفكر كفاش غدير ليها صونا تيليفونها حتى كتلقاها أمينة!!! استغربت بزااف
ملاك: احم (جاوبت) الو
أمينة: اهلان اهلان بلغزاالة ديالي
ملاك: (تبسمت) سلام خالتي لباس عليك
أمينة: الحمد لله ابنتي ونتي لباس عليك كدايرة مع الخدمة
ملاك: الحمد لله اخالتي ونتي كيف بقا الخاطر؟!
أمينة: الحمد لله ابنتي هاحنا..
ملاك: (معرفت متقول) اوا الله يرحمو
أمينة: امين، مزال متجي لفاس؟!
ملاك: سلات الخدمة عندي تماك دابا رجعت لصفرو
أمينة: فيها خير اوا بنتي ان شاء الله نهار الخميس اجي مع ماماك وخوتاتك
ملاك: ان شاء الله ضرووري (جاتها فشكل تعرضها شخصيا)
أمينة: ان شاء الله ابنتي ياله بلا منطول عليك نخليك تخدمي
ملاك: ربي يخليك اخالتي بسلامة (قطعت، عاجبها الحال غتشوف بعدا مراد هدا الا رجع اما هو راه عقل لارووب شافت مصوناش عليها يكون مزال مفاق!! صونات قطع ورجع صونا عليها)
صباح الخير
اورطيغا: صباح النور
ملاك: صايݣ؟!
اورطيغا: راجع للدار قربت لفاس
ملاك: اهااه!! (سكتت جوج ثواني) مقلتيلي والو!!
اورطيغا: عرفتي واحد شتا هربت منها وأصلا واحد لبلان فالحومة خاص نطرقو
ملاك: مزيان، غير ميبقاش فيك الحال مرة أخرى الا درت شي حاجة ومعلمتكش
اورطيغا: راه كنت غنوصل ونصوني عليك
ملاك: مزيان، مهم عندي شي خدمة نكمل ونهضرو
اورطيغا: (قبل ميهضر قطعت عليه رجع صونا مجاوبتش اما هو عقلو مبرزط خاصو يرجع للحومة على حساب شي شغاال...)
ملاك: (عصبها كما هو كيبغي يعرف عليها كولشي حتى هي هكاك والكلام غيمشي عليهم بجووج!! ولبارح بقاو مجمعين لوقت معطل بزااف علاش مقالها والو رجع صونا مجاوبتش)
زينب: زين بقاو جوج بلايص ويوسف الا تسجل دابا غيدي معاه مرتو كما موالف زربي على راسك الا كنتي غتمشي
ملاك: بالصح!! (فكرت شحال جبدت من صاكها 200 درهم) سيري سجليني انا نمشي نجيب فلوس
زينب: قلتيها لباباك؟!
ملاك: مزال ولكن غنعرف كفاش غير سيري عطييهم (مشات خرجت لݣيشي تيرات فلوس ورجعت كملت ليهم الفلوس.. كملت خدمتها ورجعت للدار معصبة حتى هو مرجعش صونا وغيكون وصل لفاس!!
وصلت لدارهم كما العادة تغدات وبقات متكية حتى نعست فاقت لقات وفاء باغية تمشي حساتها فشكل ماشي كما موالفاها ولكن مبغاتش تحكر حتى وتبغي هي وتعاودلها، توادعات معاهم ومشات باش توصلها ملاك للمحطة غتمشي لفاس ومن تماك غتمشي لاݣار ولا الساتيام مزال مقررت، ومع كان مزال الحال مهضرش باها)
وفاء: والله مسخيت بيك عارفاك حتى نتي بغيتي تفوجي مكرهتش تمشي معايا ولكن
ملاك: معليش غطولي؟!
وفاء: شي سيمانة بغيت غير رتاح فراسي
ملاك: سيري رتاحي (تسالمو رجعت فحالها من حسن حظها فاش رجعت لقات باها برا القهوة واقف هو وخوه كيظحكو هبطت ومشات عندهم)
بابا!! عمي!!
(باستلو يدو عمها دخل) شوفي نقولك واحد الحاجة ومتقلقش ولكن قبل خاصك تقولي اه والا قلت لا والله غنكتائب ونمرض
رشيد: الله يسمعنا خبار الخير
ملاك: الخدمة دايرين رحلة وكولشي غيمشي (صونا تيليفونها شافتو كان هو قطعت الصوت) زينب كتصوني ديك السيدة للي خدامة معايا
رشيد: كملي
ملاك: مهم (تشجعت) بابا بغيت نمشي معاهم عفاك ابابا والله الا قنطت كولشي ماشي غير يوماين عفاك ابابا
رشيد: يوماين!! بزاف بزااف ابنتي
ملاك: عفاك ابابا مبزااف واالو (وقف حداهم حمزة) مهم نتا غير فكر وحتى ترجع ورد علية
رشيد: ابنتي راه متنقدش نخليك تسافري بوحدك
حمزة: فين بغيت تسافري (مجاوبتش)
رشيد: راه واخا مع الخدمة ولكن يوماين
حمزة: لا لا واش مكتسمعش اعمي شنو وااقع فالدنيا متييقش فالبراني حتى تسالي نتا وديهم يخيمو بوحدها!!!! تخاف اعمي ومكاينة ثقة
ملاك: (عصبها) ونتا ماالك باش دخل اش حشرك بيني وبين بابا
رشيد: (نهض فيها) ملاااك سيري للدار
ملاك: وااا ديها فراسك ماشي شغلك فينا تفوو على حيوان (تمات ماشي معصبة وصلت الدرب كتسمع خطوات جرا تيليفونها كيصوني قطعت الصوت)
حمزة: علاش كتهضري معايا هاكا!!
ملاك: (معصبة) نهضر كما بغيت بعد مني ابنادم واش مكتفهمش!!! غير خاشي راسك فية ودير فراسك النفس وقلب علية
حمزة: أواااقفلك فيها أوالله متعتبييه من هاد لباب
نجية: حمزاااااا
حمزة: (مشات ملاك مكرهة وهو تابعها ممسوقش لمو حتى دخلت وزدحت لباب عليه بكل جهدها)
انا نوريك باغية تسافري معاه!!! والله يا مك حتى نديرلك لعصا فروييضة نوريييك مزيااان شكون انا!!! (شاف باها جاي وهو يتم داخل لدارهم بالزربة..)
اورطيغا: (الصوت كان مشوش ولكن غواتها بعد مني ودير النفس وصوت دري غيكون غير هو قطع ورجع صونا عاود مكتجاوش!!! زاد تعصب كمل مع السمسار شي حاجة ومشا لطموبيلتو شد طريق لصفرو كيصوني مكتجاوبش!!! صونا على وفاء لقاها فطريق لفاس وأكداتلو ملاك خرجت وصلتها يعني كانت برا منين كانت كداابز!!!!)
~~~~~~~~~~~
رشيد: (دخل للدار) ملاك ملاااك (خرجت من الكوزينة فين كانت غتشكى لمها ومشات عندو لبيت نعاس فين سبقها مكرهة غتفرݣع.. كيغوت عليها) شنو داكشي..
ملاك: بابا قبل متهضر هو اش دخلو فينا انا وياك موضوع خاص بين أب وبنتو هو لاش كيفتي فرايو؟! شكون اصلا هو باش يجي يهضر معايا؟!
رشيد: واخا هكاك، هو بحال خوك
ملاك: ماشي خويا ومكنعرفوش ياك انا عندي غير خويا واحد هو أنير علاش يجي يهضر ويدخل فشي حاجة مسوقوش فيها
رشيد: (عزيز عندو حمزة راه كبر مع لبنات ولكن قنعاتو) واخا هكاك متغوتيش فالزنقة
ملاك: (بقات كتشوف مجننة واعصابها غيتفرݣعو) بابا عفااك خليني نمشي نساافر راه كولشي فالخدمة ماشي كل عام كنقولهم لا لا لا لدرجة شي وحدين كيحسابلهم معنديش الفلوس كيقولولي لبنات نخلصو عليك وانا اصلا والله حتى باغية نسافر بغيت نشوف البحر اعباد الله
رشيد: قولهم بابا كيخاف علية ماشي مكيبغينيش وماشي معندناش
ملاك: ومتخافش علية نموت بالقنط هنا؟؟؟ ابابا عفااك غير يوماين، سبت وحد صاافي
رشيد: (بقا كيشوف دخلت زهرة هازة أنير ناعس مكانتش عارفهم تماك)
اجي شوفي بنتك
ملاك: وعلاش ماشي بنتك نتا؟!! انا جيت كنهضر معاك حيت ميمكنش ندير شي حاجة بلا بيك
زهرة: شنو واقع؟ وهضرو بشوية الولد ناااعس
ملاك: اعععع (زادت تجننات اورطيغا غير كيصوني قطعت عليه) بابا بف!! (ضارت عند مها بقلة صبر) ماما كاينة رحلة ماشيين ليها فالخدمة لأقشور والجبهة
زهرة: خلي لبنت تمشي ارشيد
رشيد: (شاف فيها مخرج عينيه زعما مزال حتى مكملت الهضرة ومناقشوش هادشي)
ملاك: (براسها بقات غير كتشوف راه موجدة رغيييب وطلييب وهي دغيا قبلت!!)
زهرة: (كتشوف بنتها مزنݣة وباينة معصبة بزااف وعينيها خارجين)
ملاك: (محست حتى بقات كتبكي) بغيت نفوج غير شوية غنمووت بالقنط هنا (جلست ف ق النموسية)
هنا دموعها سلاو معاهم بجووج رشيد عارف بنتو مطيح الدمعة غير الا وصلت ليها العظم
زهرة: رشيد صافي ياك ماشية مع الخدمة وراك شفتيهم ناش معقولين صافي خليها تمشي ماشية حتى زينب؟! (حركت لوخرا راسها باه) ها السيدة براجلها وولادها غتكون معاها معندنا مناش نخافو ارشيد
رشيد: انا راه غير كنخاف عليها
زهرة: بنتك بعقلها معندك مناش تخاف للي دارو ربي هو للي يكون وان شاء الله تفوج شوية وترجع
ملاك: (دايرة يدها على وجهها)
رشيد: (بقا كيشوف فبنتو)
زهرة: سير رجع للقهوة من بعد ونهضرو (خرج ومشات حدا بنتها للي دغيا هزت راسها كتمسح دموعها) بلبكى ݣاع
ملاك: اوا على الله يبغي (تبدلو ملامحها كتمسح دموعها وحتى نبرة صوتها بحال ݣاع مكانتش كتبكي) خاصني نشري حوايج
زهرة: هاي هاي هاي على سليعفااانة كيف تيسفاات!! كنتي كتمثلي علينا؟!!!!!!
ملاك: ههه (هي بالصح بكات بالقهرة, ولكن كتبغي تهرب من جو دراما) مرة مرة الواحد يلعب على العاطفة ديالكم..
اورطيغا: (وقف فالدخلة ديال المدينة كان الحال بدا يظلام رجع كيصوني عليها)
زهرة: (تيليفون بنتها موقفش هزاتو كتلقى اسم زوبيدة استغربت جاوبت)
اورطيغا: (بعصبية) مال مك متتجاوبيش؟!!!
زهرة: الو؟!؟؟
اورطيغا: (سكت هدا ماشي صوتها يا مها يا مرت عمها!!) فين ملاك
زهرة: انا مها شكون نتا
اورطيغا: (بقا ساكت شحال معرف ميقول وعاد باديها بمال مك!! سمع الخط تقطع علاش مها لي جاوبت فين هي زاد صاايݣ مشوش عليها!!)
زهرة: (بقات كتسناها، خرجت من الحمام لاوية عليها فوطة) شكون هاد زوبيدة للي كظل تصوني عليها
ملاك: ها! غير واحد الزمرة (هزت تيليفونها خرجت عينها منين لقات مها يالخ جوباتو ومدة الاتصال 12 لثانية!! شافت فيها)
زهرة: شكون هدا؟!!
~~~~~~~~~~~~~
غيثة: (دازت 24 ساعة بدا راسها كيضرها وصحتها طااحت وفبالها غير ادم للي لبارح سالات معاه محست غير ديبلوكاتو وصونات عليه مجاوبش حطات التيليفون مكرهة رجعت كتبت ليه ميساج)
شنو سميت داكشي للي تتعطيني؟!!!
ادم: (قرا الميساج وحطو لبارح كان مندامج معاها كره ديك أمينة للي تدخلت من الاساس مكيحملهاش هي وولدها رجعت صونات جاوب) وي غيثة
غيثة: جاوبني
ادم: شنو بغيتي؟!
غيثة: راسي تيضرني
ادم: اجي عندي لقهوة****
غيثة: واخا (قطعت ناضت لبست حوايجها دارت ميكاب خرجت واخا مها عيات تعيط ليها تمشات لراس الشارع وشدت تاكسي ماشية عندو)
~~~~~~~~~~
ملاك: واحد السيد تعرفت عليه
زهرة: وشنو داك الأسلوب باش كيهضر معاك شكون هدا للي مخلياه يتعصب عليك هاكا ومزال مدرتو بالطاجين ميتحرق!!!
ملاك: (بلعت ريقها) علاش شنو قال؟!
زهرة: شكون هدا بعدا؟!
ملاك: ماما راني عاودت ليك عليه داك نهار يمكن معصب حيت مبغيتش نجاوبو هو بلعكس كيعاملني زوين وباحترام
زهرة: متقوليش هو للي باغيا تسافري معاه
ملاك: لا لا اماما والله ما هو اويلي نجلس يوماين معاه مالي حماقيت والله ما هو اقسم بالله مع الخدمة وهو بعيييد على خدمتي وعلى هاد المسافرة
زهرة: اوا!!
ملاك: اواااا هاحنا كنتعارفو بعدا هو اللول نهار يكتاب يجي لدارنا
زهرة: (بقات غير ساكتة سمعت كيعيطولها) مزال مكملنا، ومزال غنتفااهمو على هادشي (مع خرجت صونات عليه جاوبها)
اورطيغا: (بحذر) الو!!
ملاك: وي مراد
اورطيغا: خرجي عندي خرجي...
ملاك: فين غنخرج امراد!! مصالحش
اورطيغا: كفاش مصالحش!! فين مك بعدا؟!
ملاك: خرجت شنو قالت ليك فاش جاوبااتك!!
اورطيغا: والو نتي واش قالت ليك شي حاجة ياكما غوتت عليك؟!
ملاك: لا ولكن شنو قلتي؟!
اورطيغا: شنو واقع معاك هاد نهار؟! علاش مكنتيش تتجاوبي؟! عصبتي جد اصل مي!!
ملاك: بفف(جلست فوق النموسية) والو عصبتيني نتا قبيلة حنا تافقنا داك نه...
اورطيغا: داك الز*** شنو بغا منك؟!
ملاك: (تخلعت) شكون؟!
اورطيغا: راكي عارفة علامن داوي، شنو بغا؟!
ملاك: (مفهمتش منين جاب هادشي!!!) والو بغا يهضر مخليتوش شكون قالها ليك؟!!
اورطيغا؛ خرجي عندي
ملاك: مصالحش امراد راه غير شوية تناݣرت مع بابا وعاد انا مدوشة وماما كتسولني شكون هدا للي كيغوت فالتيليفون
اورطيغا: علاش مقراتش سمية؟!
ملاك: (خرجت عينها) كاتبة سمية مفهمتهاش، واش نتا هنا؟!
اورطيغا: شنو قالك داك "*** هضري ابنادم ولا غاندخل على مك فداك الدار
ملاك: والو امراد واالو، راني تبريت منو عند ماما ومو وحتى بابا قلتلو يقولو يبعدني
اورطيغا: كفاش قلتي لباك يبعدك علاش هو عارف تابعك وساكت!!!
ملاك: ماشي هكاك ولكن هو داير فيها خويا قدامو
اورطيغا: كفاش خوك قدامو ونتوما كنت مخطوبين
ملاك: (تزيرت) هو واخا تفارقنا بقينا عاديين جيران حيت أنا للي فرتكت ديك الخطوبة
اورطيغا: تخربيق !!
ملاك: (تزمتات) هو بقا معاهم عادي زعما محقدمش قدامهم فهمتي داكشي باش قلت لبابا انا ميبقاش يقولي حتى السلام !!! (غير كيسمع كيشوف فقهوة باها كان جالس هو وشي دراري كيبلاني فييه زطمة وحدة يكسيري يجمع ال*** كامل وحتى باها)
ملاك: واش بالصح جيت؟!
اورطيغا: اه منين سمعت داك **** تيهضر معاك جيت وعاد مك فاش جاوبت خفت يخاصمو عليك
ملاك: بغيت نسافر وبابا
اورطيغا: مخلاكش عاود
ملاك: بغا
اورطيغا: (هز حواجبو متفاجئ!!) ڤري؟!
ملاك: (كضور عينها كتسناه يهضر) اه
اورطيغا: (حاضي حمزة شاف باها خرج من تماك ووقفو كيهضر معاه)
ملاك: مراد!!
ملاك: صافي واخ...(قطعت مفهمتش واش بغاها تسافر ولا لا!! هي مسافرة مسافرة ولكن كتفضل ميكونش بينهم شي خصام باش تمشي بنفسية زويينة بقات كتفكر شافت فأنير ناااعس ناضت لبست حوايجها مرجعش صونا عارفة راسها مغتخرجش عندو راه مستحيل!! عيطت ليها مها مع مكانوش دراري من غير براهش جمعت شعرها للي فازݣ سفنجة وخرجت هازة تيليفونها)
شنو اماما
زهرة: اجي عاوني شوية العزري وقشريلي بطاطا، حقا غدا غنمشيو لفاس
ملاك: اه عيطاتلي خالتي أمينة عرضاتنني حتى انا
زهرة: وشتي صواب كداير ماشي بحال معزيتيهااش حشوومة ݣاع خوتاتك عزاوها نعيمة من لعيه عيطت
ملاك: واش هي للي قالتها ليك؟!
زهرة: (دخلت سهام سكتو هاكا موالفين، شافت فبنتها للي كتقشر بطاطا وكطير منها النص) ملاااك (خرجت عينها فيها)
ملاك: شنو اماما!!
سهام: ويلي استغفر الله شنو خليتينا نقلييو؟!!
ملاك: (عطاتها لموس) سمعت أنير كيبكي!!!
(هربت ليهم من تماك وسهام كتعاتب زهرة باش تزير مع بنتها تزيدها للكوزينة طيب ميمكنش فعمرها ومتعرفش تقشر حتى بطاطا وزهرة جاها كلام معقول حيت راااخية لملاك بزااف...)
~~~~~~~~~~~~~~
اورطيغا: (حتى كيبغي يهبط من الطموبيل يقصدو ويترااجع داير بزاف دالاعتبارات اولهم غيخلق لملاك المشاكل مع باها وعائلتها حيت غيتعرف علاش غيدابز معاه وعلم الله لاخر شنو غيبدا يخرج من فمو !! قادر يضارب معاه وميخاافش ولكن راه فوسط حوومتو وحدا باها للي كيعرفو ويصدقو فحوايج خايبة اهم حاجة منها هي غينوضو ليها مشاكل وعارف باها مزير معاها..
لثانية جا فبالو شنو هادشي كيوقع معاه واش بالصح راه تابع بنت جاي لمدينتها واخا مغيشوفهاش عاس حدا دارهم؟!! لهاد الدرجة اشمن سطاج وصلو مع ملاك؟!!
حرك راسو كينفض الافكار حمزة تحرك من تماك جا ماشي وهو يعيط ليه باين ملاك ولاخر حاني الراس كيسمع لرشيد)
رشيد: ولدي الله يرضي عليك نتا عزيز علية وكابر مع بناتي ولكن ملاك عندي بوحدها متعاودش دير بحال قبيلة
حمزة: عمي انا غير خفت عليها سفر بوحدها وبلا بيكم قاسحة للبنت واش مكتسمعش شنو واقع
رشيد: اييه ولكن هادشي نهضرو فيه انا ومها واخا ولدي
حمزة: عمي انا ملاك راه كبرت حدا عيني الا دخلت غي حيت بناتك راه فمقام خوتاتي للي معنديش وكنحس انا خوهم
رشيد: حنا كولنا عائلتك ولكن... متعاودهاش الله يرضي عليك نهار نبغيك دخل غنجي نقولهالك
حمزة: واخا عمي (مشا رشيد وهو بقا وااقف باين معجبوش الحال يعني هي للي غتكون عمرااتو مفهمتش ياك هو مزير معاهم علاش جا كيهضر معاه!! واش غيخليها تساافر!!! مشا فحاالو واورطيغا غير حاضي حتى جاه أبيل من عند ولد الحومة..
ملاك: (دخلت عندها مها غوتت عليها على حساب تقشار بطاطا وأنها خاصها دير عقلها شوية فطياب ميمكنش تبقى هاكا على الأقل هاد لحوايج صغار تعرفهم صونا اورطيغا ومها مزال محيحة، وهي خاصها تجاوب ضروووري راه كاين فالحومة!!)
ماما ندخل لطواليط
زهرة: واش انا كنه.. (وقفت ملاك كدير حركة راه مزيرة ودخلت للحمام تابعاها مها كتنݣر) ݣاع خوتاتك كانو كيقراو ويتعلمو الا نتي
ملاك: بففف (جاوبت بهمس) ألو!!
اورطيغا: (بقا ساكت كيسمع مها كتغوت ولكن الكلمات مواضحينش) شنو واقع عاود؟!
ملاك: غير ماما واش نتا مزال حدا الدار؟!
اورطيغا: اه ولكن متخرجيش.. مشا لحال
ملاك: (عحبها الحال مها خبطت عليها الباب)
اورطيغا: شنو درتي؟!
ملاك: هه معرفتش نقشر بطاطا
اورطيغا: الا!! ميمكنش؟!
ملاك: (جات تحلف وهي تفكر راسها فطواليط) اه
اورطيغا: باينة هاربة فشي طواليط
ملاك: ههه بحال داكشي..
اورطيغا: (تبسم بلا نفس) حق الرب متنفهم فيك واالو
ملاك: صباح معجبنيش الحال تسافر ومتقولهاليش
اورطيغا: محيت مكنتش ناويها, كنت مزال باقي اليوم ولكن صونا علية الخدام وكان ضروري خاص نرجع
ملاك: ولو!!!
اورطيغا: اوا ونتي؟!
ملاك: شنو انا!! للي كنديرو كنقولو ليك كما وصيتني
اورطيغا: كما وصيتك ماشي حيت باغية
ملاك: اممم لا وحتى باغية
اورطيغا : (زفر معرفش شنو معصبو واش حمزة واش مجيانو هنا واخا عارف راسو مغيشوفهاش مهم يطمأن مفهمش!!)
مهم انا غرجع لفاس
ملاك: واخا
اورطيغا: واقلة ماماك مشات
ملاك: اه خرجت حيت بقات كتغوت وفاق أنير (حلت لباب) صافي انا نقطع
اورطيغا: متوصلينيش؟!
ملاك: ههه مكرهتش نكون معاك ݣاع
اورطيغا: اممم بالصح؟!
ملاك: (بقات مفرنسة) تسنا نطلع لسطح راه فأي لحظة غتهجم علية راه ضيعت ليها كيلو بطاطا
اورطيغا: ههه عالم نتي.. (ضرب الدورة فالرومبوان ورجع شاد طريق لفاس، شي 5 دقايق عاد هضرت) فين هادشي كامل
ملاك: غير لبست شالي وبينوار باش نطلع لسطح
اورطيغا: (بقا كيسمعها ويدورها فراسو) مزيااان.. مزيان متزوليش الفولار حتى فسطح امتى درتيه؟!
ملاك: من السادس تقريبا... ( بقات كتعاودلو قصة من خيالها كفاش بغات الفولار من صغر وكانت هي للي قررت ديرو.. بقاو مجمعين وهي كتسناه يرد عليها على سفر ومعاودتش جبدت الموضوع حتى يهضر هو فيه...)
اورطيغا: (وصل لدار مو معندو ݣانة يمشي للحومة مقطعش طلع للدار مع حل لباب لقا مو واقفة كتسناه مكانش عارفها جات كان داير لكيت) امتى جيتي؟!
(ملاك عضت شنافتها كضور عينها)
أمينة: غير قبيلة
اورطيغا: بوحدك؟!
أمينة: واه (حط سوارت بلاصتهم) نحط لعشا اولدي؟!
اورطيغا: ندوش نصلي ونجي.. (دخل لبيتو قبل ميسد لباب) ملاك من بعد ونصوني عليك
ملاك: مراد صافي طلقها متبقاش مقلق
اورطيغا: سيري هبطي من تماك حتى نصوني عليك وطلعي
ملاك: واخا ولكن طلقها
اورطيغا: (بعصبية) شنو جامع باش نطلق؟!
ملاك: (شافتو تعصب) صافي صافي ياله بسلامة حجاارك يشدووك ونتا غير معصب
اورطيغا: هبطي دابا نتي (قطعت حيد لكيت هز حوايجو دخل دوش خرج صلا المغرب ولعشا وخرج عند مو)
هانتي هنا؟!
أمينة: وفين بغيتني نمشي ولا مبقيتش حامل تشوفني
اورطيغا: مقلت والو غير سولتك
أمينة: تاامااال طاسييلتك غير ݣالب علية كمارتك علاه انا كرهت يكونو عندي والدين مݣادين مشفتنيش داخلة لتماك بحال شي يتيمة معندي حد
اورطيغا: (ببرود) عندك انا براكة عليك
أمينة: اوا ومّا مشتيش كدارت
اورطيغا: خطينا من داك التمثيل ديال جوج دريال
أمينة: (سكتت كتشوف فيه وهو شاد التيليكموند كيقلب على الكورة.. غتسكت حيت هاد الموضوع غير غيدابزهم) نحط لعشا
اورطيغا: اممم (دازت من حداه ناتفااه رجع راسو اللور كيقاد فشعرو تمت داخلة حاطة لعشا وجلسو كياكلو ساكتين حتى صونا تيليفونو شافها كطل وراها)
هاد ولد ختك فايت فيه كان لسقة
أمينة: عمر؟! على مزيناتو داك لوليد اولدي شحال فرح منين عرفك وحاامق يجي عندك
اورطيغا: (هز حاجبو فيها) راه راجل بحالي بحالو اش غيحمااق ولا يݣجدر
أمينة: ههه وا بغا يزيد يعرفك اولدي
اورطيغا: سبحان الله هاد المحنة دالغفلة معنديش معاها
أمينة: لا لا نعيمة ماشي كيفهم بعدا منين جلست وهي تطلب فسماحة وتبوس يدي وراسي وهكاك مّا اما لوخرين مسݣيين بمغرف وحدة
اورطيغا: اممم انا غنوض نعس غدا غنبدا الخدمة بكري ومغنسالي حتى الليل
أمينة: غدا غتجي عندي زهرة وبناتها (ضار شاف فيها بانتباه حرك راسو باه)
أمينة: عرضت لبنات وحدة بوحدة
اورطيغا: (كمش عينو فيها وهي كتبسم) لا حولة (وتم خارج داي معاه طبسيل لعشا للكوزينة عاد مشا الحمام هي ناضت تجمع داكشي خرج عندها)
اورطيغا: انا نصيفطلك الدري يتقدا ليك فصباح شنو تبغي
أمينة: الله يرضي عليك اولدي.. (هي دخلت لبيتها وهو دخل لبيتو نيشان مصوني على ملاك يهضر شوية باش ينعس بكري...)
اورطيغا: باش تتعمري وقتك فالليل
ملاك: اممم (كتفكر) بيك
اورطيغا: قبل منبداو نهضرو
ملاك: افلام مسلسلات عندي طابليط كنتفرج فيها
اورطيغا: شنو النوع للي تتبغي
ملاك: كل مرة وشنو
اورطيغا: عندك نتفلكس
ملاك: لأ (جاها ميساج فيه جيمايل والكود ديالو) ميغسي
اورطيغا: باش نبقاو نتفرجو بجووج
ملاك: هه اوكي متبع شي مسلسل؟!
اورطيغا: دابا تنتفرج فواحد "panshee" واخا طويل زوين غير هو الا بغيتي تفرجي خاصك تكوني بوحدك ودايرة لكيت وباك ميكونش فالدار
ملاك: (هزت حاجبها) علاش؟!
اورطيغا: (متبسم) فيه القرطاس والاكشن
ملاك: (ممتيقاهش) اممم (بقا كيصيفط ليها عناوين المسلسلات كملو جموع حتى جاها نعاس هبطت وحتى هو غينعس بكري دخلت وتكات فالسداري ضرها راسها علاش لدابا مجبدش ليها حس سفر واش زعما الأمر منتاهي عندو ومغتسافرش خافت تفارق معاه على حساب هادشي!!)
~~~~~~~~~~~
يوسف: (دخل للدار هو وخديجة هي طلعت تبدل حوايجها دايرين ليهم الخاطر يجلسو معاهم هاد الايام قبل ميسافرو لمراكش، قلب بعينيه) فين غيثة؟!
الغالية: (مشوشة عليها بزاف حيت مكتجاوبهاش.. جاوبت علدي) خرجت عند شي صاحبتها
يوسف: شكون؟! قبيلة مبغاتش تخرج معانا قالتلي مريضة!!!!
الغالية: راه جات صاحبتها حتى لهنا وخرجتها بالزز
يوسف: بالزز!! (دار التيليفون فودنو وجاوبت) فينك
غيثة: انا جاية اخويا
يوسف: فين كنتي
غيثة: راه قلت ليك انا قربت للدار (قطعت وشافت فادم) الا بغيتني نعاود نتلقاك متعاودش هداكشي
ادم: واش نسيتي راه نتي للي بقيتي تتبوسيني اللولة!!
غيثة: (سكتت حيت معاقلاش) واخا انا منعاودش
ادم: (لعب بصبعو فوجهها) ولكن عجبني الحال (باسها بوسة صغيرة فشنايفها) تتعجبيني اغيثة
غيثة: (بعدت راسها بشوية) خويا تيتسناني ادم
ادم؛ غدا شوفي كفاش نتلقاو
غيثة: واخا (كانت قريبة للدار خرجت من الطموبيل دايخة كتحاول توݣض عاد تمشات لدارهم متبعها ادم للي حتى دخلت عاد مشا دخلت للدار وهو يوقف عليها يوسف مخنزز ياله غيهضر بعصبية شافت فيه)
بفففف البوليس عاود شنو شنو بغيتي؟!!
غيثة: بففف البوليس عاود شنو شنو؟!!؟
يوسف: (مصدوم فيها عمرها هضرت معاه هاكا) كفاش؟!
غيثة: شنو بغيت ايوسف!!! عيانة باغا نعس علاش ديما واقف علية هاكا بابا ومتيديرش هاكا ها هي ماما متتقول والو علاش نتا بالظبط غير خااانقني فحيااتي!!!!!
يوسف: (بقا كيقرب ليها بغات تبعد وهو يشدها من عنقها الغالية ناضت كتجري وحتى خديجة يفااكو)
غيثة: طلق مني!!! طلق ايوووسف
يوسف: (بعصبية كيقربها يشمها واش شاربة كامية!! ريحتها عادي باغفان ديالها!! دفعها من عنقها مشات معنقاها مها)
الغالية: شنو هاد الاسلوب تدير مع ختك؟!! (مرضااتش كتشوف فخديجة وتشوف فيه) هاكا انا ربيتك تضرب ختك صغيرة وهي مدايرة والو
يوسف: فين كنتي؟!
غيثة: (كتبكي جهلت) ماشي شغلك نكون فينما بغيت شكون نتا للي تهضر معايا وتحاااسبني
يوسف: (مصدوم فيها هي للي عمرها حتى هزت العين فيه، غوت عليها)
فين كنتي؟!!!!!!
غيثة: ماشي شغلك (قالتها بشوية شادة عنقها) حماار (طلعت لبيتها والغالية شادة ولدها كتعاتبو دخلت لبيتها وسدت لباب بالساروت بقات كضرب فوجهها وراسها وغير كتبكي كتحس بألم كبييير فقلبها وراسها غير كيتقاال عليها صونات على ادم تفهم منو شنو واقع معاها واخا عارفة ولكن مبغاتش تعرف مجاوبهاش!!)
خديجة: (جرت يوسف للجردة بالهداوة لي بقا مصدوم فغيثة) يوسف نتوما بجوج معصبين حتى تبردو وهضرو دابا غير غتزيدو تضاربو
يوسف: اورطيغا عندو الحق خاص نحضيها مزيان
خديجة: علاش شنو قالك
يوسف: (مخرج عينيه) قالي ختك غضييع الا مرديتوش ليها لبال!!
تكون تتعاطا؟!!!!
خديجة: مسمعتكش!
يوسف: غدا منقدرش نسافر اخديجة!! منقدرش نمشي ونخليها هاكا
خديجة: ماشي مشكل سفر ملحووق نتا غير برد وفهمني شنو واقع؟! باش نفكرو مزيان
يوسف: متأكدة؟!!
خديجة: يوسف راه زواج هدا ماشي مزوجاك غير باش نسافر ونتسارا مشاكل ديالك هوما المشاكل ديالي!! ياله لبيتنا وتهدن شوية وفكر بلعقل واخا!!!
يوسف: (بامتنان هز يدها باسها جات مع الغالية خارجة كتقلب عليه وكحلت بلعمى دخلت مكضويييش كتر من للي كانت...)
~~~~~~~~~~~~~~
وفاء: (مشات لساتيام قطعت لأݣادير باغيا تبعد على كولشي وترتاااااح... صونات عليها بريڤي عرفاتو هو جاوبت)
شنو مزال باغي
.....: وفاء انا ندمت على شنو درت ليك داك نهار
وفاء: حتى انا ندمت علاش رجعت تقت فيك
....: عطيني غير فرصة أخرى انا فاس بغيت نشوفك
وفاء: غير نسا ديك الهبيلة لي كانت كل مرة كتيق فيك مااتت نهار عطيتيها لصااحبك اشمااتة ولكن الدنيا كدووور.. (قطعت.. تفكرت من مور متعتقت من الانتحار عينيها كانو كيشوفو غير ظلام ندمت علاش مشات تبعت داك طريق كانت بغات تآذيييه ولكن كانت كل ليلة هي للي كتخنق وتآذا وممرتاحاااش تمنات تكون فكت عليها داكشي باش يبعدها وتعيش حياتها مرتاحة شوية...)
أصبحنا وأصبح الملك لله...
يوسف: (منعسش بالفقسة على غيثة كان هاز ليها الهم غير على لباسها والتفتح الزائد!! دابا طورت وكلام اورطيغا مكيبشرش بالخير خلا خديجة ناعسة للي شحال وهي كتواسيه فالليل وسمحت فسفر للي واعدها بيه غير على قبلو لبس حوايجو خلا ليها ميساج حيت نعست معطلة معاه الفطور منين تفيق غيجيها للبيت..
لقا باه جالس فالجردة مشا جلس معاه شوية عاد خرج مشا لبنسودة فين غيلقى اورطيغا حيت عرف من شريف راه رجع لخدمتو بقا متسع مصيفط غير دري يكلمو خرج لابس بوط ميكا وطابلية عامرة بالدم، وحتى يديه للي كيمسحهم مشا حداه سلم غير محرك راسو باش ميوسخووش) الله يعاون
اورطيغا: اش تدير هنا؟!
يوسف: مراد قولي باش عرفت غيثة داك نهار فلبواط شكون شافها
اورطيغا : واش وقعت شي حاجة؟!
يوسف: داكشي للي قلت هو للي كاين
اورطيغا: (زفر) مقالهالي حد، هي داك نهار صونات علية مهم تتقول شي هضرة انا سايست معاها عرفتها فين كاينة مع قطعت صيفطت لأشرف خوك ميساج فين هي، وباينة مقالو ليك والو
يوسف: (حرك راسو باه معصب) مقالولي والو
اورطيغا: واا كنتي لهيه وعريس يمكن داكشي!!
يوسف: خصني نعرف معامن تتمشا هي عمرها كانت هاكا
اورطيغا: ماشي اليوم مسافر؟!!!
يوسف: أجلتها، (كانت باينة فيه مدمر)
اورطيغا: سير معاها دقة دقة نتا عارف غيثة تتجي غير بالخاطر والكلام زوين قربها منك وهي غتݣر ليك بكولشي الا تعصبتي غتدير منك اطونسيوو
يوسف: (زفر) ان شاء الله، باقي خدام؟!
اورطيغا: (بعياء) خوك من الفجر وهو هنا باقي شي حاجة قليلة ونهبط المحال بلاتي دوز عندي راه حتى مرتك غتكون عند مي
يوسف: ان شاء الله، انا نمشي دابا (توادع معاه ورجع الفيلا لقاهم كيفطرو مشا جلس كانو عاديين بحال مواقع والو وهادشي كينيرڤيه من لداخل ديالو مقدرش يفطر) فين غيثة؟!
الغالية: فبيتها، مال مرتك منزلتش تفطر؟!
يوسف: (مسح على وجهو بعياء، مشا للكوزينة وصاها تقاد فطور للي كتبغي غيثة هز بلاطو وطلع لبيتها كانت مظلمة ومزال ناعسة مشا حل السرجم حط لفطور فوق كوافوز جلس حداها كيتلمس على وجهها عاد كيلاحظها ضعاافت شوية..)
غيثة غيييييثة!!!!
غيثة: اممم
يوسف: نوضي تفطري
غيثة: (حلت عينها بشوية غير شافتو هو تفافاات) يووسف!!
(جلست مقادة وكانت جامعة شعرها سفنجة بانت طبعة صغيرة فعنقها تحت ودنييها شافها وحنا عينيييه داير عين ميكة)
شنو!!! يوسف (صوت كيرجف) انا والله لبارح مقصدت
يوسف: ششش شنو تبغي ليكخيب بعسيلة ولا شكلاط
غيثة: (شافتو مقاد ليها كولشي حتى بقات كتبكي هو قربها لعندو كيعنقها)
سمحلي على لبارح والله منعاود نغوت هكاك معرفت شنو وقع لي عفاك متقلقش منك نصبر لكوولشي الا تقلق مني نتا....
ملاك: (كانت خدمة قلييلة موالفة كيصوني عليها فهاد الوقت ويهضرو ولو غير 5 دقايق، حدو صيفط ليها صباح الخير واخا صونات مرجعش صونا كان ديجا فالليل قال ليها غيكون مشغول)
ولكن ميتشغلش علية!! واش عاد زمر كيبغيني ولا شنو؟!!
(كملت نهارها وهي كنحلم غير بهاد تسافيرة وخاصها تشري باش تعوم وشي لبيسة ولا جوج.... وصلت 2 عاد صونا)
الوو
اورطيغا: الفونووون صاڤا
ملاك: (تبسمت) الحمد لله ونت؟!
اورطيغا: وا تسخسسسخت!!! مزال نتي فالخدمة؟!
ملاك: مزالة
اورطيغا: والله مكرهتش شي بيرو وجوج ستيلوات ونرتاح مع قبي
ملاك: غتجيك مملة انا دابا بحال فشي حبس كنتسنى غير امتى يطلقونا بعدا نتا محلل رزقك هه
اورطيغا: (تبسم) فين غتشديها
ملاك: بلاتي معروضين عند مك
اورطيغا: مك اجدك؟! تبقاي تقولها طاتي أمينة غتزيد تحبك
ملاك: وعلاش تحبني هي؟
اورطيغا: حيت ولدها زاالق فييك، (بدل نبرة صوتو) تتنخنق املاك
ملاك: هههههه
اورطيغا: هه هانا على الشيخة ديالي
ملاك: ههه منقدرش نقولها طاتي
اورطيغا: تعلمي ازين (جا عندو واحد كيهضر معاه كمل وهو يسكت الطموبيل) ******
ملاك: (بعدت ودنها من هاد تخصار الهضرة) باسم الله عليك عاد كنت صحة سلام
اورطيغا: حتى كملت والحاج جايبلي بريكول بحال ق****
ملاك: وااااا مرااااد شور شوية
اورطيغا: بلاتي ونهضر معاك (قطع مكره وهبط من طموبيلتو مشا يشوف هاد الكموند!! اما هي وصلت 3 وهي تسلت لقات مريم جات عنقتها موحشاها بقاو مجمعين حطت ليها مها لغدا تغدات وبقاو مجمعين وصلت 6 دالعشية لبسو حوايجهم باش يمشيو لفاس ملاك كانت دوشت ولبست ديباردور بيض مع اونصومبل واسع شوية فلماغو جاي مريح لوات شال عليها بستيل تركي دارت عكر خفيف مع أيلينر ممعيقش رشت بارفان مرة وحدة حيت مبقالهاش)
ملاك: بففف خاصني نشري ريحة
مريم: هاي هاي على زوينات
ملاك: (تبسمت) هكدا كلبس ديما (لبست صندالة عالية) واش كملتو خاص نعلمو بابا
زهرة: قالي بابا تدينا نتي هو حتى يلحق بينا فالليل يمكن
ملاك: حسن، زعما هو دابا فخدمتو وحنا باش ناخدو راحتنا تماك
زهرة: (دخلت ملبسة أنير) والله يا مك نوصلو لتماك وتقوليلي عندي شي غراض خاص شي حاجة حتى نحك لمك لحروور مزيان تبارك الله وعلى من على واحد كيقولك مال مك من البدية
مريم: ههه شكون
زهرة: وتعرفي هادي كتعاود!!!
ملاك: بففف (خرجت من حداهم مشات لحدا لباب صونات عليه مجاوبش حتى جات مها ختها مرت عمها وبنتها ومرت حنينها مشاو للطموبيل ركبو جا عندهم رشيد كيظحك)
رشيد: اوا المسامحة بانلي غتمشيو جملة!!!
زهرة: هاد الكرسي دأنير رجعيه اللور ابنتي باش يكفيهم يجلسو (رجعو رشيد الكوفر هي جلست حدا بنتها وكولشي اللور مريم شادة أنير) حتى نعيط عليك هي راه دايرة بحساب لعشا
رشيد: ياك قلتو غير عشية
ملاك: بحال عشية بحال الليل اصلا خالتي أمينة كتحط لعشا بكري وانا نجييبهم
زهرة: ههه بسلامة (ديمارات طلقت ليهم الملحون) زوينين هاد الاغاني سنيييين متصنت عليهم
ملاك: شحال وليت كنحماق على هاد ستيل!! أذووووووب
زهرة: اممم (كتفرج فطريق صايݣة بشوية باش مدوخش مرت جدها وماشيين مجمعين وصلت لفاس اختاصرت طريق ومشات لدار زهرة)
عقلتي على الدار
ملاك: حيت باينة وصافي
(قلبها ضرب بقات واقفة دوزيام بوزيسيون على متقلب على بلاصة غير لقاتها مشات حطاتها ونزلو دازو من حدا المحال كان عامر ولكن مكاينش هو)
زهرة: بنتي شكون يهز السكر
ملاك: نتوما انا نمشي لشي باتيسري
مريم: ولايني مبقيتيش كتحشمي
ملاك: ونهز انا جوج كراطن؟؟! (بقاو مناقشين غير على لكراطن مشات باتيسري جابت ليصواري داكشي منوع مشات عند العساس)
قالك مراد الݣزار طلع لدارهم دوك جوج كراطن
(مدات ليه 10 دراهم مشا هزهم دخلهم للمصعد وطلعهم وهبط عاد طلعو هوما)
مريم: شنو قلتيلو؟!
ملاك: قلتلو تعاون معايا ودورت معاه عادي.. (قلبت تيليفونها كان ميساج من عندو انه يوصل للدار ويصوني عليها)
انا سبقتك للدار
اورطيغا: ااااح وتكون بالصح
ملاك: ههه رجوع الله كاينة انا وطاسيلتي
اورطيغا: سيري لدار الليدو
ملاك: تحمستي شوية
اورطيغا : مكرهتش ( ظحكت من ميساجاتو وصلو لعند أمينة سلمو عليها كيعزيوها مدت ليها الكرطونة)
أمينة: بلاش عليك احبيبتي.. عذبتي راسك
ملاك: ها (معرفت متقول) بالصحة والراحة (دخلو جلسو صونات عليها خديجة)
حنا وصلنا..
صافي واخا (قطعت)
جاية خديجة
مريم: توحشتها (بقاو مجمعين كانت الطبلة محطوطة مقومة داكشي من المملحات للحلويات اتاي قهوة عصير كول خير ربي حطاه بفرحة زبارتهم ليها، سمعو الساروت فلباب)
أمينة: غيكون ولدي جا (تسد لباب) مرااااد مرااد
اورطيغا: (حط سبرديلتو دارها فبلاكار لبس صندالة باقي حدا باب الدار) سلام عليكم...
اورطيغا: (كان ياله جاي من الݣرنة مشا حداهم للبيت بتيشورت كحل وسروال بارا داير كاسكيط، وريحة ذبيحة فيه دور عينو وملاك كتشوف فيه معجبة مغرمة متبسمة)
سلام عليكم
الكل: عليكم السلام
زهرة: لباس عليك اولدي؟!
اورطيغا: الحمد لله الآلة زهرة نتوما بيخير، (شاف فيها) ملاك صافا!!
ملاك: (صدمها محسابش ليها غيوجه الهضرة ليها) الحمد لله اخويا ونتا
اورطيغا: حمدالله، (تبسم زعما حيت بقا بعيد مصالحش يدخل) سمحولي ياله جاي من الخدمة
زهرة: دخل اولدي دير الݣوتي (أنير ماد يديه لييه) ههه عقل عليك
اورطيغا: راه ولينا صحاب (ملاك كتبيضهم بيض بيض.. خرج مشا لبيتو تابعاه مو)
سهام: خخخخخ ريحة مجهدة داخل بيها يا لطيييف!!!
ملاك: (ضارت مخنزرة فيها باغيا تاكلها جات تهضر)
زهرة: لا مزيان تبارك الله فعشهم وكنجلدوها فيهم لا لا مزيان اسهام
مريم: حشوومة امرت عمي
مرت الجد: من فمك لودن راجلك غير صبري
سهام: أويييييلي ونتوما ضرتو فية كاملين!!! (بدلو الهضرة منين جات أمينة للي مستاانسة بيهم تدق لباب دخلت خديجة وغيثة للي حشمانة من أمينة بزااف دخلو حتى هوما ملاك تفاجئت بحضور غيثة ولكن هنا غيبان واش حتارم هضرتها!!! شافتو فالممر دخل للدوش)
أمينة: ملاك كولي احبيبتي ياكما نجيبلك شي حاجة اخرى
ملاك: لا لا بلعكس اخالتي الخير موجود تبارك الله (هزت حلوى كلات منها ودوزت بأتاي شافت فغيثة كانت لابسة كسوة مبين صدرها وسيقانها طالقة شعرها دايرة ميكاب خفيف وباغفان عااطية حتى هي شافت فملاك وتبسمت)
صاڤا!! (تحصلت)
غيثة: الحمد لله متتسولي مواالو
ملاك: مع رجعت لصفرو بقيت مبرزطة مع الخدمة وصافي
غيثة: حتى انا غنبدا الخدمة السيمانة جاية ان شاء الله ولكن اجي نجلسو شوية
ملاك: ضرووري.. ان شاء الله (شافت فخديجة) كنتو غتسافرو اليوم؟!
خديجة: يوسف خرجت ليه شي خدمة وأجلناها
غيثة: (زادت حشمت من راسها سمعت باب تحل كان هو خارج من الدوش لابس حوايجو وريحة زوينة عاطية لاوي على عنقو فوطة شحال توحشاتو دخل لبيتو نيشان زاد قلبها ضرها)
ملاك: (وصلها ميساج من عندو قبل متقراه عارفة شنو فيه تبسمت وهي كتقراه) "اجي عندي"
(رجع كتب ليها)
"جيبيلي شي لعبة نحنجرها"
اورطيغا: اجي عندي...
جيبيلي شي حاجة نحنجرها!!
ملاك: (تبسمت كتبات ليه)
"اجي كول معانا الدار داركم"
(هزت راسها لقات غيثة كتشوف فيها قلبت وجهها لمها كان أنير شاد فقاسة كيغزغز فيها غير شافتو بقا كيظحك ويغاغي)
ههه مسحيلو اماما فمو
غيثة: شنو سميتو
زهرة: أنير
غيثة: سمية زوينة بزااف، احم طاتي فينو اورطيغا ؟! (ملاك شافت فيها)
أمينة: فبيتو كيرتاح
زهرة: قاديلو ياكل أمينة
غيثة: انا نوض نقادلو اطاتي (ناضت مشات للكوزينة ملاك شافت فأمينة زعما شنو هادشي!)
امينة: انا نوض (ناضت مشات للكوزينة لقات غيثة كتقادلو) بنتي سيري جل.. (سمعت اورطيغا دخل لبيت) صافي ها هو ناض يجلس وياكل
اورطيغا: (شاد انير مجلسو على رجلو فكرسي كيلعب معاه باسو فحنكو وشاف فملاك غمزها غمزة خفيفة) شنو ازرييقا متوحشتيينا مجيتيي عندي (ملاك شادة تفرنيسة غير بالسيف كتحس بفمها تعوق بكترة مظاحكة وغير شنايفها للي مجموعين)
الوالدة
أمينة: (جابتلو داكشي فبلاطو ووقف) هانا اولدي
غيثة: اورطيغا (شاف فيها تبسم محرك راسو تهزت مادة حنكها وهو ضار عند زهرة)
اورطيغا: معليش نديه معايا للصالون
غيثة: (خرجت عينها مصدومة محرجة خلاها بلاكة عاد دار عندها معرفت متدير!!)
اورطيغا: (عاد ضار عندها) غيثة صاڤا!!!
ملاك: (دارت رجل على رجل مرتاحة هازة كاس أتاي كتشرب منو وكتفرج)
غيثة: بغيت نهضر معاك
اورطيغا: واخا، الوالدة اجي معايا (شاف فغيثة) جلسي جلسي اختي رتاحي (مشا للصالون وامينة براسها معاجبهاش هاد التلسااق وكتشوف ولدها مبعد وهي لاسقة مبغاتش تخسرها ولكن الا بقات هاكا غيدور فيها شي دورة خايبة وعاد هي كتقلب غير كفاش تعتقها من داك ادم، مشاو للصالون حطو فالزربية وهي حطات داكشي فوق الطبلة)
علاش معيطة لها!!! واش مزال الوالدة مبغيتي تفهميني؟!
أمينة: والله اولدي معيطت ولا هضرت معاها جات مع مرت خوها واش نمنعها؟!
اورطيغا: (بقا كيݣمݣم هي مشات وهو بقا شاد الخاطر لأنير كيلعب معاه صيفط ميساج لملاك باغي يشوفها)
بغيت نشووفك الوزغة ضرووري
ملاك: قرس أنير فرجلو وانا نجي حيت كيبكي...
اورطيغا: (خرج عينو فالميساج كتب ليها) مجرمة!!!
ملاك: هههه (جمعت الظحكة وشافت فالي كيشوفو حداها) واحد الڤيديو ظحكني (جمعت التيليفون ومها مقوسة عينها فيها ناضت خديجة جابت لاطاغط شادين فيها واش كاين لي كيعزي بطاغط)
غيثة: شافتها قالت والو ناخدووها
أمينة: يجيك الخير وربح ازين
زهرة: (أمينة جابت طباسل معاوناها خديجة قطعت ليهم للي بغا مجمعين) عطي لولدك من الحلوى
غيثة: اه اورطيغا تيبغي الشوكولا
أمينة: (قطعت مورصو منها دارتها فطبسيل) ملاك حبيبتي واخا توصليها لمراد راه فالصالون
ملاك: (شافت فمها للي حركت راسها باه وناضت متبسمة) نيت نشوف أنير ونجيبو..
( غيثة غير كتشوف تصدمت فأمينة علاش تسبق ملاك وكفاش ملاك للي تاخد لولدها!!! مشات للصالون لقات اورطيغا متكي على ظهرو وحاط أنير فوق كرشو كيلعب معاه)
هههه للي شاف شي يقول الله يستر
اورطيغا: (هز راسو فيها) انها الشرييرة يا ولدي فلنهرب من طغيانها
ملاك: (دارت ظحكة شريرة) هاهاها....
هههه جبتلك الحلوة
اورطيغا: تنشوف جوج حلواات تماك
ملاك: تأ!!!!
اورطيغا: اجي قربي (دخلت لحداهم حطت الطبسيل فوق الطابلة وجلست فالسداري هو جلس فوق الزربية طالق أنير كيحبو وهاز راسو فيها متبسمة كتهرب من شوفااتو حتى عض شناافتو)
ملاك: احم متاكلش
اورطيغا: (بعينين نايمين) مسخسسسسسسخ متوكلينيش؟!
ملاك: (حركت راسها بلا جا أنير لرجليها كيتعلق باش تهزو، هزاتو)
اورطيغا: (ربع يديه طالق رجلييه كيشوف فيها باغي يتقرب منها ولكن شاد راسو بالسيف)
نوضي نشوف لبيسة
ملاك: هه لااا
اورطيغا: وا غير غنشوف مغنقيسك موالو عجبني ستيل بغيت نشوف مزيان (وقفت هازة أنير) دابا عاد طاح حبك على زريقة
ملاك: ههه (جلست) مغتنزلش للمحال؟!
اورطيغا: شنو بغاك داك الكيدار البارح؟!
ملاك: كنت واقفة مع بابا كنهضر حتى جا هو بقا كيهضر معاه معجبنيش الحال كيبغي يدخل فحوايج مشغلوش وانا ندور فيه وحتى بابا ضار فيه
اورطيغا: مزال تيتعرض ليك!!
ملاك: (حركت راسها بلا مبعدة على المشاكيل)
اورطيغا: متأكدة!!! متخبعي علية والو املاك
ملاك: اممم (بغات تهرب من الموضوع) رتاحيت فاش مشيت لهيه منين خيمت!!
اورطيغا: مزيان..
ملاك: (أهم موضوع مزال منطق بيه) انا نرجع
اورطيغا: (حرك راسو باه) غير حطي أنير خليه معايا، وعطيني الله يحفظك داك الطبسيل
ملاك: (حطت أنير ومدت ليه طبسيل معرف كدار عكلها برجليه جابها جالسة على رجليه والحلوة جات على الزربية)
اويييلي!!
اورطيغا: (بغات تنوض شدها من خصرها مقرب لوجهها كيشوف فيها بعينين نايمين، منطق بوالو وهي كتعصر تنوض مكملاش 5 الثواني خلاها ناضت معصبة كتقاد حوايجها) بسسس
ملاك: (مخرجة عينها فيه معصبة كازة على سنانها)
متعاودش دير بحال هاكا
(خرجت من تماك وهو كيتبسم مشات لحداهم اما هو ناض هز الحلوى ونجر الشكلاط بالمعلقة قبل متجي أمينة تحيح عليه ناض كلا وكيوكل معاه أنير، اما هي لقات خديجة كتوصل داكشي للكوزينة بقات كتعاونها)
أمينة: اويلي استغفر الله حشومة لبنات جايين معروضين وينوضو يجمعو
زهرة: عادي اصاحبتي لبنات كيتعاونو
أمينة: دارهم هادي غير!!
(غيثة شادة تيليفونها مهزتش عينها فيهم كتميساجا تبدل ليها لمزاج جاتها نوبة غضب شادة راسها غير بالسيف!!)
ملاك: (باقا كترجف من داك التقرب خديجة بقات كتغسل دوك الماعن حتى كتشوفو دخل هاز بلاطو واكل كولشي قلبت عينها مقلقة)
اورطيغا: عطيني سوارت طموبيلتك
ملاك: (كضور عينها) علاش؟!
اورطيغا: عطيني (بقات كتشوف فيه جاي يقرب وهو كيتبسم اما خديجة دايرة راسها كأنها مكينااش شادة الظحكة بالزز)
ملاك: صافي صافي انا نجيبلك
اورطيغا؛ (مشات من حداه مضيق عليها فين تحرك ودازت تحت ذراعو شاف فخديجة) خديجة صاڤا؟
خديجة: الحمد لله اخويا ونتا؟!
اورطيغا: (كب لما وشرب) الحمد لله.. (جات ملاك عطاتو سوارت)
ملاك: واش بغيتي تشوف ديك المشكل للي فالطموبيل ياك (مخرجة عينها باش ميعيقش قدام خديجة)
اورطيغا: (تبسم شد من عندها سوارت وشد يدها بنفس حركاتو وهي مخرجة عينها كتنتر بدون صوت حتى هزت موس من فوق البوطاجي هز يدو بجوج باستسلام كيظحك رسل ليها قبلة صغير زادت مخرجة عينها وخرج من الكوزينة كيظحك ضارت خديجة لقاتها هازة الموس وهي طرطق بالظحك)
خديجة: ههههه
ملاك: (بعصبية) تهجريييه تهجريه تهجريييه ***
اورطيغا: (لبس كاسكيط ديالو) الوالدة انا خاارج (مشا هز أنير من الصالون وعطاه لزهرة) خاصك شي حاجة
امينة: الله يرضي عليك اولدي
غيثة: (متبعاتوش هاد المرة مبقالها فين تبعو يمكن أمينة عاودات ليه حيت ميمكنش شحال قالب عليها كانت غير كتشوف فيه خرج من تماك وهي شادة دمعتها بالزز)
انا غنخرج اطاتي عند صاحبتي ورجع (مشات للكوزينة) خديجة انا خاارجة
خديجة: واخا متعطليش
غيثة: لااءء.. ملاك ياك مزال هنا (قالتها وهي مكرهة لوخرا حركت راسها باه) اوكي (مشات خرجت صونات على ادم دارت تلاقا معاه ولكن مكاينش فاس وراها فين تمشي غيعطيها الحبة، عارفة انها كتشرب شي حاجة ماشي هي هاديك ولكن ديك الحبة عاوناتها بزاااااف...
اما هو قطع معاها كان مع شريف فالقهوة)
ملاك: (متاقتش واش غتكون مشات عندو ولا دايرين يتلقاو حتى سمعت خديجة كتهضر مع يوسف)
خديجة: يوسف غيثة خرجت.. اه غير دابا.. قالت شي صاحبتها.. واخ
ملاك: شنو واقع؟!!
يوسف: (كان مبعد فطموبيلتو حاضيها ركبت فتاكسي ولحقها تفكيرو الوحيد شنو كدير؟!!!! وشكون هدا!!!
وصل لكافي كانت ماشي شي وحدة مشبوهة ولا ديال الشيشة قهوة عائلية فالسعادة، دخلت هو قلب فين يحط طموبيلتو مجا يهبط حتى لقاها خرجت مفهم واالو!! بقا فوسط طموبيلتو كيشوف واش خارج شي واحد من ديك القهوة معروف والو كانت الامور طبيعية شدت تاكسي ورجع تبعها وكانت الوجهة دار امينة!! تخربق فراسو زربت عليه!! هبطت منها وطلعت لدار منين هبطت، هبط من الطموبيل داايخ صونا على خديجة )
خديجة حبيبة غنزيد نبرزطك
خديجة: لا لا عادي قولي شنو كاين؟!
يوسف: بغيتك غير تحضي تصرفات غيثة وصافي اي حاجة علميني بيها
خديجة: واخ (قطعت وشافت فملاك) ها هي جاية
ملاك: خاصهم يردو ليها البال مزياان!!
يوسف: (دخل لمحال اورطيغا مكانش تماك صونا عليه مجاوبش صونا على شريف كان فالقهوة دار معاه باش يجي عندو باش يبقى مراقبها جا هو وادم للي العشية كاملة وهوما عاصرين فقهوة فالأطلس...)
أميمة: (الحريق جهاااد عليها صبرت على للي كان كل 5 دقايق كيجيها ولكن دابا زادت الحدة وقفت) حمزاااااا حمزااا!!!! (غوتت حر جهد لحريق)
خالتي نجيييييييية
نجية: (مشات كتجري عندها) بنتي مالكي واش جاك الحريق
أميمة: المووووت امرت عمي الموووت
نجية: صبري صبري ابنتي (هزت تيليفونها صونات على حمزة تااالفة)
ولدي فينك..
مرتك كتولد اجي عندنا...
اجي داابا
(قطعت تسندت عليها داياها للبيت متكية فوق السداري)
تنفسي ابنتي مزيان ومتزحمييش
أميمة: (كتغوت) كنموووت كنموووت (كتبكي) عيطي لحمزة!! عيطي لماااماااااا
نجية: انا عيطت عليه ابنتي ها هو جاي
أميمة: (حريق مصبرااتش ليه غير كتبكي وكتألم وتختمها بلغوات...)
نجية: محسبناش مزيااان يمكن راكي فالتاسع
أمينة: (كتألم) معرفتش معرفتش (كتبكي وتغوت)
الغالية: (كانت كتشرب لويزة وجالسة دايرة رجل على رجل شادة تيليفونها كتفرج حتى دخلت شافتها ودارت حركة فوجهها معاجبهاش الحال)
الياقوت: طاااتي!!!!
الغالية: لا والو انا مقلقة منك بزاااف ديال بزااف!!!!