غيثة: كتشوف فملاك للي كتفرج فتصاور وكتخيل ان علاقتها مع مراد بدات كتخرج الواقع راه كولشي شااف نشوف معاك
ملاك: اهااه بقات كتوريها تصاور الرحلة
غيثة: وكان قلتيهالي كنت نمشي معاك
ملاك: مقلتيليش اما كان عندي الحق نجيب معايا شي واحد
غيثة: زفرت قنطت بزااف اول صيف متنسافر متنخرج على راحتي بحال عايشة فشي حبس طلعلي كولشي فراسي حتى من صحباتي مخلاونيش نسافر معاهم كما موالفة
يوسف: شافها فلمرايا غيثة فين تبغي تسافري
غيثة: بعصبية مخليتنيش نسافر مع صحباتي انا باغا نسافر مع لبنات
يوسف: غي حيت بغيت تكوني معايا
غيثة: وانا مبغيتش، العام كامل وأنا معاك دابا بغيت شوية نرتاح بغيت بنات نجلس معاهم ماشي نجلس معاك نتا
ملاك: غيثة استفزتها كفاش كتهضر مع خوها وهي كتشوف عندها نعمة الاخ لكبير ولكن ماشي شغلها كنت بغيت نسولك داك الصالون عندو صباغة زوينة لشعر
غيثة: علاش بغيتي تصبغيه بزعر؟
ملاك: لا بغيت مااغو شي خصلات وصافي
غيثة: اه، عندو انا تنصبغ رجع كلامهم على صباغة وشعر وصلو لصفرو غيثة عيات تصيفط لادم ولكن محالش كونكسيون ونمرتو دالمغرب مخداماش تجننت يوماين مخدات والو ومعرفتش امتى يرجع
مشاو للدار يوسف دخل ديسير وحلويات من باتيسري للدار لقاو كاين عيالات فالصالون حيت دايرين صدقة دار حمزة ومكفاتهمش دارهم ودخلو لعيالات عندهم
شنو كاين ملاك عندك الخطاب ههه
ملاك: هه بحال والو
غيثة: دخلو الصالة صغيرة جلسو تماك ملاك مشات تبدل حوايجها اما غيثة مقابلة غير تيليفونها.. بداو لعيالات كيقراو القران خديجة وغيثة مشاو حداهم
ملاك: بدلت حوايجها لبست بيجامة واسعة مع شال حلفت متعلمو راه وصلت باش توريه داك التصرف للي دار مع غيثة
خرجت لقات حمزة واقف فوسط الدار مع مو وزهرة للي كيحاول 4 ايام يهضر معاها ومبغاتش واستاعن بزهرة تصالحو
زهرة: بنتي اجي هزي خوك مشات ملاك شافت فحمزة للي مهزش راسو فيها عطاتولها
صافي انجية واش غتزيدي من حالة ولدك
نجية: كتبكي تبدلتي اولدي بزااف تبدلتي نتا ماشي حمزة ولدي لحنين للي ولدتو وربيتو
ملاك: معرفتش علاش ولكن بقا فيها اكترية منين شافتو كيبكي فصمت...
خديجة: ناضت خرجت وتبعتها غيثة للي تخنقت من داك الجو واخا كان جو زوين ديال القران، جلست على برا صونات على اورطيغا بريڤي للي جاوبها
غيثة: انا بغيت غير نعرف علاش قلبت علية؟ بقا كيفهمها انها دارت غلط نهار العرس وهي ختو ومخاصهاش دير داكشي
وعلاش كذبت فاش سولتك واش نتا مع ملاك...
اه عندها ياك انا ختك ومتنخبيو والو على بعضياتنا...
حمزة: مشا جاب لمو دواها ديال الطونسيو كيقلب شكون يعطيهلو بانتلو ملاك شادة خوها
ملاك هاكي عطي هدا الوالدة
ملاك: شداتو من عندو واخ
حمزة: شكرا تم ضاير ماشي فحالو وهي دخلت لبيت فين كاينة نجية مع ماين أميمة للي تخاصمو وجاو عندهم باش يتفاهمو حيت بغاو يديو بنتهم للي غير كتشوف حمزة كتبقى تغوت عليه وتعايرو وتخصر الهضرة
غيثة: مكملة الهضرة مع اورطيغا للي كيجبد ليها لسانها على معامن كتكون دابا جالسة بوحدي، خديجة مع الناس يوسف مشا عند رجال انا متنعرف حد، حتى من ملاك واقفة مع ولد جيرانهم من اللول محملتش نجي هنا
اورطيغا: معامن واقفة؟
غيثة: متنعرفوش، مشا عطاها غير شي حاجة ومشا... ملييت من هنا بغيت غير رسمعت طيط طيط قطع
بففف علاش جيت هنا علاش؟ رجعت صونات على ادم والو نمرتو مزال طافية
فين مشا هاد لحماار عاود بلاني وغبر
فكرت تشري ݣارو يمكن ينفعنا خرجت من تماك كتقلب على شي حانوت ولا صاكا حيت حست باعصابها غيتفوراااو
اورطيغا: صونا على ملاك للي تعطلت شوية عاد جاوبت سمع صوت بكى باين أنير وهي كتسكتو
ملاك: الو قاستو كان سخون نااري فيه سخانة
اورطيغا: معامن كنتي؟
ملاك: الدار عامرة راني قلتها ليك، بفف فيه سخانة وماما جالسة مع لعيالات شنو ندير عاد عطاتو سيرو وواالو
اورطيغا: معامن كنتي واقفة
ملاك: شكون؟
اورطيغا: شوفي نتي
ملاك: مراد هضر عفاك شكون؟ تأ واش نديه صبيطار راه ميمكنش غير شي ساعة ماما عطاتو سيرو ومبغاش يسكت
اورطيغا: سكت شوية ضمصااتو واخا هي معارفاش علاش كيهضر معرفتش عاودي ديه ليها وشوفي هي شنو دير بالصح الا كانت سخانة واعرة بزاف ديوه لصبيطار
ملاك: داكشي نيت. صبر صبر متقطعش ولا يكما مشغول
اورطيغا: لا لا انا معاك متقطعيش.. حس براسو زربت عليه بقا ساكت سمعها كتهضر مع مها عاودو عبرولو سخانة كانت 40 سمع مها كتهضر مع رشيد باش يدييوه
ملاك: واش نمشي معاه انا اماما؟
زهرة: اه ابنتي سيري مع خوك
ملاك: انا نلبس لعباية بقا هو كيسمع دارت تيليفون فودنها مراد نكمل ونصوني عليك
اورطيغا: صافي واخا باشما قوليلي شنو كاين شي شوية ونرجع نصوني عليك جاوبي
ملاك: واخ بقا فيها أنيير جا باها ومشاو داوه ليرجونص..
رجعت من عند طبيب مكانتش شي خطر عليه عطاوه دوا نزل ليه الحرارة وبقات مقابلاه زهرة بالكمادات ودارت ليه الخل فتقاشر تعشاو خديجة ويوسف وغيثة رجعو فحالهم لعيالات مشاو فحالهم.. زهرة بقات كتقلب على بنتها ملقاتهاش
زهرة: ملاك ملااااك طلعت لسطح لقاتها ناعسة تماك بقات فيها حيت كانت باينة عياانة نوضتها هبطتها لتحت ورجعت حدا أنير للي بدات الحرارة كتنزل ليه ولوخرا كطلع ليها...
أصبحنا وأصبح الملك لله
أمينة: من بعد إذن الحاج للي قبل بكل فرح انها تستقبل ختها للي جاية عندها فالرياض وجدت على حسابها لغدا وعلما ولدها للي معاجبو حال باش يجي يتغدا معاهم.. رجعت صونات على زهرة تسول كيف بقا أنير كملت قطعت ودخلت للكوزينة شافت الماكلة للي كطيب وخرجت لقات مفتاحة معاجبها حال ولكن متقدرش ترفض حيت خوها وصاها تستقبل الناس مزيان كما أمينة كتستقبل عائلتهم مزيان
مفتاحة: اوا الا عندها ولد راه مصالحش يبقى هنا
أمينة: عندها ولادها وغيمشيو لداري للي فالسعادة غير كوني هانية وطلقيها امفتاحة
مفتاحة: ماشي تديهم لتماك وتجلسي معاهم لهيه خير
أمينة: وعلاش وانا دار راجلي يجري فيها خييل
مفتاحة: اوااااا غير باش يرتاحو وصاافي
أمينة: هاد الساعة قلبي غير على راحتك ضيافي انا قادة بيهم...
ملاك: كانت فالخدمة ولكن عياانة مشابعاش نعاس وراسها غيطرطق بديك السمرة لي نعست تحتها مرتاحتش ݣاع صونا تيليفونها كان هو
وييي مراد
اورطيغا: مالكي؟
ملاك: عييت والله حتى عيت.. لبارح نعست فسطح
اورطيغا: اه عييت تنهضر نتي مشيتي مبغيتش نعاود نصوني
ملاك: ومنسعساش مزيان وصداع بففف ملييت من هاد زمر كااامل
اورطيغا: مناش؟
ملاك: بلا متشعر كاين بيت مكينعس فيه حتى واحد مبغاوش يعطيوهلي واش ماشي المرض تفوووو
اورطيغا: ديالمن لبيت
ملاك: كاين واحد ديال عمي ولكن هو رحل مشا لخريبݣة وكاين واحد اخر مسدود للي جا من خوتاتي ورجلاتهم ولا شي ضيف كينعسو فيه،
رغبتهم نعس فيه الا جا الا جاو نخرج منو بعصبية ولكن بابا قالي لاااااا وغينوض صدااع وولاد عمك حتى هوما يبغيو داك لبيت عصبني عصبني قداش ݣاع هاد ولاد عمي راه صغار وانا مكلقاش رااحتي كنبغي نعس شي مرات بكري على حساب الخدمة مكلقاش راحتي فدارنا
اورطيغا: كيسمع ليها راه اول مرة تشكى وتهضر هاكا
ملاك: دابا غنمشي الدار عامرة عاود حيت كولشي كيجي عندنا غنبغي نعس خاص ندخل لبيت ماما هدا الا كان خاوي
اورطيغا: وعلاش تتسناي الأوكي دخلي لبيت للي خاوي تعراي ونعسي حتى واحد مغيزعم يدخل عندك ينوضك ومن هم باك
ملاك: بقات ساكتة بحال كتفكر فهاد الحل وتخيل راسها ...لا لا... مبغييتش صداع امراد
اورطيغا: وشنو الحل للي تيبان ليك
ملاك: مكرهتش نخرج من الدار ونكري
اورطيغا: واش مدوخة مغيقبلش باباك وحتى الا بغا انا منبغيش
ملاك: بفففف عارفة معندي حتى شي حل
اورطيغا: غير هاد الساعة مكاينش معليك غير تزيدي تصبري شوية
ملاك: حركت راسها باه غنمشي نطلب المدير الا بغا نخرج بكري، عيني كيتغمضو بنعاس وكنحس براسي ماشي هي هاديك
اورطيغا: مغنشوفكش هاد نهار
ملاك: معرفتش
اورطيغا: مهم نتي شوفي واش تخرجي دابا رتاحي وعاد نشوفو قضية نتشاوفو، انا رجع للخدمة
ملاك: واخ قطعت وبقات فبلاصتها كانت خدمة قليلة وصلت 2 ونص طلبت المدير للي خلاها مشات كما العادة جاو شي عائلة باش يعزيو نجية حيت بكترة ماهوما جيران قدام رجعت من العائلة دخلت لبيت مها فين كان ناعس أنير ودايرين ليه كمادة بدلت حوايجها مقدرتش تصلي تكات فنموسية مها واحد جوج تلاتة وجبدت عليها بنعسة...
اورطيغا: جاو عائلة مو جات غير ختها بنتها وولدها عمر وجوج ولاد بقاو مع باهم للي كانو محايدين بين أمينة وخوتها باش ميتخاسرووش... رحبو بيهم تغداو جا ماشي
أمينة: نوض اولدي عمر سير مع مراد
اورطيغا: هز حاجبو انا غنمشي للمحال
أمينة: عضت شنافتها كترغبو بعينها وتبسمت يجلسك معاك يونسك
اورطيغا: بقا كيشوف فيها شاف فعمر الا متملش ياله معايا
عمر: واه نمشي معاك خرجو من تماك وتمشاو جهة الطموبيل زوييين هاد الموضع
اورطيغا: حرك راسو باه الا بغيت تبقى دور هنا حتى تلحق
مراد: لا لا حتى لشي مرات نجيو انا وياك، هنا مكنعرف حد وغير غنتلف
اورطيغا: فنفسو: صبرك يا رب واخ.. ركبو فطموبيلتو مشاو للمحال طلع للدار دوش صونا على ملاك مجاوبتش عرفها تكون ناعسة، هبطو للمحال مصيفط الدري يتغدا وهو بقا كيخدم فشي وراق
الا بغيت تقهوا كاين هنا قهيوات زوينين
عمر: حتى تكمل ونتقهواو بجوج مراد جاتو الخنقة من هدا، مموالفش هادشي.. جا الدري بقاو بجوج أذن العصر
كاين شي جامع قريب
مشاو بجوج صلاو ورجعو صيفطو الدري جاب ليهم الرايب والحرشة اورطيغا مجمع مع عمر على الاجواء والسنة فاوروبا، صونا يوسف عليه علمو انه شد لبنت للي كتعطي لغيثة الكينة وخاصو يجي
اورطيغا: عمر واخا تسناني شي ساعة فالقهوة نغيز شي بلان ونخلط عليك؟
عمر: واه نتسنااك نعتلو فين يمشي وهو مشا عند يوسف لحدا دارو يفهم هاد لبلان جديد...
#فلاش_باك
يوسف: كان هز تيليفون غيثة دار فيه ابليكسيون ديال التجسس على الميساجات كيقرا اي حاجة بينها وبين صحاباتها للي كانو ميساجات عاديين، حتى جاها ميساج من عند نمرة غريبة
انا حدا داركم
غيثة: بفرحة كبيرة انا فهاد العنوان واش تقدري تجي عندي؟
وجدي 1000 درهم ونكون عندك
غيثة: اول مرة يتطلب ليها لفلوس ومعندها والو وحتى كارت ݣيشي ديالها بقات فدارهم
عفاك معنديش فلوس هنا حتى لمن بعد ونعطيهم ليك ولكن بغيت كتر من حبة
يوسف وهو كيقرا خرج عينيه هادشي للي كان كيقلب عليه
1000 درهم تكون واجدة قربت للعنوان للي عطيتيني ولا مغنعطيك والو واخر مرة نجيب ليك شي حاجة
غيثة: خافت من ديك اخر مرة بقات كدور عينها منين تجيب فلوس والا خرجت لدارهم يوسف غيتبعها خرجت من لبيت يوسف سمعها كدور فالدار مشا فين حاط فلوس هز 1200 درهم والورقة للي كاتبة خديجة ديال تقدية وحطهم فوق البوطاجي
يوسف: بصوت مسموع خديجة انا خارج غير نصوني عليكم وجدو راسكم باش نخرجو نتقدااو
خديجة: من بيت نعاس واخ
غيثة: كانت فالصالة تبسمت معاه بتوتر وهو خارج داير راسو كيهضر فالتيليفون مع شي واحد للي غيتلقا معاه فالسعادة، غير مشا ناضت بغات تمشي طلب لخديجة دازت من حدا الكوزينة كيبانو ليها فلوس محطوطين فوق صالة مونجي قلبها تعصر بألم ولكن حلفت حتى غتردهم غتمشي للدار وتجيب فلوس وتردهم قبل ميجي خوها ولكن متفوتش هاد لبنت، مدت يديها للي كيرجفو وهزت كتحسب هزت 1000 درهم مخلية 200 درهم فوق ورقة تقدية..
ورجعت لبيتها اما خديجة كانت كطوي حوايجهم فبيتها طالقة الموسيقى كتغني معاها...
لبست سروال كيطمة مع تيشورت واسع دارت سفنجة هزت نظاظر الشمس.. مشات عند خديجة
زين انا خارجة عند البنت للي قلت ليك تتجيب حوايج كانت قريبة من هنا وغنهبط نشوفها
خديجة: واخا غير متعطليش باش نخرجو مجموعين
غيثة: لا لا منتعطلش الا سبقني يوسف صوني علية غنكون غير هنا
خديجة: واخا مشات غيثة دايرة نظراتها وهي تصوني على يوسف الو يوسف.. غيثة عاد خرجت
يوسف: صافي واخا.. قطع وهو يصوني على اورطيغا علمو وبقا كيتسنى فطموبيلتو مباينش شاف فختو مشات حدا قهوة حداهم ووقفت كتسنى مربعة يدها وهو بكل حزن وغضب وألم كيشوف فيها حتى جات عندها شي بنت تصدم كان كيتسنى شي عصابة شي راجل كبير خرج دغيا من الطموبيل ومشا بالخف وقف من مور لبنت للي بنية جسمها ضعيفة لابسة داكشي مستيلي وشعر مبوكلي ومطلوق شنق عليها من اللور
غيثة: مخرجة عينها مصدوومة يوووسف كتبكي خويا صافي طلق لبنت لوخرا كتركل
يوسف: كان فلوسها مزال فيدها مشا بيدو ليد ديك لبنت غارس صباعو فيدها حتى قسحها وطلقت راحة يدها وطاحت الحبة للي كانت فالازرق
غيثة: دايرة يدها على وجهها وكتبكي
يوسف: جار ديك لبنت للي يد شاداها عاصرها ويد دايرها على فمها بكل قوتو تبعيني اغيثة بقات واقفة كتبكي وهو بعصبية تبعيييني
نعيمة: كانو جالسين فالصالون صغير بوحدهم للي كانت التفريشة فاسية طلامط البهجة والديكورات نحاسية تبارك الله هدا راه قصر ماشي رياض
أمينة: تبسمت وشافت فبنتها بنتي ياكما بغيتي ترتاحي؟ راه بيتكم لفوق واجد
ياسمين: بحياء ربي يخليك اخالتي انا جالسة معاكم
أمينة: تبارك الله عرفتي تربي اختي نعيمة واخا عايشين فوسط الݣور
نعيمة: التربية هي كولشي الواحد غير ميكونش قاسح ويوصل الميساج مݣاد تربح ولادك
أمينة: كااينة، اوا اش خبارهم لهيه مزال مطايفين على الورث
نعيمة: ههه نوضتي فيهم الحريݣة
أمينة: خليهم ادرهم باباهم منسمح فيها
نعيمة: صافي مزيان، على للي سمعت جاياك شي 18 ولا 20
أمينة: اممم مكنقتيش فدوك شلاهبية ولكن اللهم رمش ولا لعما
نعيمة: كاااينة اختي غير هو راه شرطو قالو متمشيش عندهم ورجليك متحطيهاش فديك الدار
أمينة: ياك مّا مزال حية نمشي فوكما رشقاتلي ونهار تموت الله يحفظ، غنديرلهم الطيارة عاود على حقي فيها
نعيمة: ههه والله نتي لي عبرتي
ياسمين: هههه
أمينة: شوفو نوضو تكاو شوي ومن بعد نخرجو شوية هنا غيعجبكم الحال
نعيمة: حتى ياسمينة من داك نهار وهي تحلم معمرها جات لفاس غير داكشي للي كيشوفو فالتيليفون
أمينة: غيعجبك الحال ازين دابا اجيو معايا لفوق ترتاحو شوية ناضو تابعينها داتهم لبيت لفوق فيه 3 سدادر دخلتهم وسدو لباب وهي مشات تطل على الحاج واش خاصو شي حاجة وتوجدلو حوايجو حيت غيبات فزاوية سيدي أحمد التيجاني..
الحاج غتمشي دابا ولا حتى لبلاتي
بنسليمان: داير نظاظرو وشاد القران حطو وشاف فيها
فين ضيافك
أمينة: مشاو يتكاو شوية
بنسليمان: انا بلاتي، حتى لمور المغرب عاد نخرج
أمينة: انا نوجد ليك حويجاتك حيت غنخرج مع ختي وبنتها نضورو شوية
بنسليمان: مزيان وفين الولد
أمينة: حسن يبقى مع مراد باش ياخدو راحتهم
بنسليمان: غدا نعيطلو على حساب الفرمة مزال مرديتها باسمي
أمينة: اممم ضرب فيها تماااارة مسيكين دوك 3 ايام
بنسليمان: تبسم راه تخلص
أمينة: شحال ݣاع الحاج حتى نتا مزير يدك معاه راه ماشي واحد من الخدامة هداك راه مومو عيني
بنسليمان: بقا كيتبسم حيت اورطيغا حسب عليه كولشي حتى من 2 دراهم ديال لباركينغ
دابا نزيدو غير بقاي على خاطرك...
....: كيهضر فالتيليفون الشكاية التالية للي درنا مصدقتش حيت دخل فيها شريف..
...لا لا كون هاني الدقة جاية فرمضان...
...هو كيكمل شهر بوحدو يعني ساهل يتشد فيها...
..اممم داكشي للي كاين...
..واخا تقرس وحاضي ولكن ديما خاص نفكروه مرة مرة...
زهرة: دخلت تطمئن على أنير لقات ملاك ناعسة امتى جات هادي؟
ملاك ملاااك قاست جبهتها حتى هي كانت حرارتها مرتافعة عرفتها من السمرة حيت لبارح كانت ناعسة فسطح وكانت عيانة من سفر والبحر وطريق،
قاست أنير لقات حرارتو عادية مشات لماريو جبدت ساشي ديال دوليبران دارتهالها فكاس ونضوت بنتها برفق وحنان كتلمس على حنكها
هاكي بنتي شربي
ملاك: اممم ما فيااش
زهرة: الله يرضي عليك احبيبة شربي شربتها بالزز ورجعت نعست غطاتها بليزار كتشوف فيها واخا تكون عند هاد لبنت 70 عام غتكون هي ديما صغيرة ديالها.. مشات خرجت من تماك وجلست فالصالة مع نسا دالعائلة جات سهام للي كتعاون مع نجية فضيافها
امدرا كيف بقات مرت ولدها
سهام: الزغبية ماشية وكتهبل
مرت الجد: مزال مناݣرة مع راجلها وحماتها؟
سهام: شركت كولشي حتى مها وباها للي بان ليها، على للي سمعت راجلها شدلها رونديڤو عند شي طبيب ديال هاداكشي دلهبال
زهرة: سميتو طبيب نفساني
سهام: بحال بحال
زهرة: اوا مسكينة مدازش عليها لقليل
سهام: مسكينة تجيها سكيينة علاه الناس شنو دارو ليها وجبدت حتى بنتك ملاك للي عاطياها 60 كيلومتر ديال التيقار
زهرة: ضبر راسها اسهام هي ماشي فوعيها هاد الساعة
سهام: باز يا ختي باز لهاد برودية دمك
زهرة: ههه ونمشي نتفها اسهام ولا ندير عقلي بعقل وحدة ياله مات ليها ولدها ومحروقة هانتي قلتيها شركت كولشي تقول حتى غدا العيد الواحد ميديش عليها هاد الساعة وساعة اخرى يحن الله
سهام: راه كتهضر قدام لعباد انا بعدا مرضيتش وخرجت من تماك قبل مندور فيها
زهرة: متعاوديش تمشي عندها هاد المرة غتجبدك حتى نتي
سهام: تجبدني نجبد ليها عينيها
زهرة: ههه اوا على وقفتك ياله نصايبو ليهم شي طرح دبغرير
سهام: عييييت هادا هو الجهد
زهرة: اوا هانتي جالسة نمشي يانا...
اورطيغا: وصل لحدا دار يوسف صونا عليه علمو كاين فلباركينغ تحت العمارة فين ساكن مشا كيلقى غيثة واقفة كتبكي ويوسف شاد شي وحدة من ذراعها...
شكون هاد الكانيش؟
...: شافت فاورطيغا مطلعاه ومهبطاه بقرف ورجعت شافت فغيثة
غيثة: كتبكي على هاد الفرشة للي تفرشت ومع خوها واورطيغا
اورطيغا: غيثة صاڤا؟
غيثة: كتبكي وتشوف فيه حركت راسها بلا وعاودت دارت يدها على وجهها كتبكي
يوسف: تفكر الكينة هاك شدها
اورطيغا: بلا منشدها تحرك نفلعص مها طلقها يوسف ورجع لبلاصة فين كانو واقفين باقية الكينة تماك هزها معصب ورجع عندهم لقا اورطيغا جمع مع لوخرا بطرشة حتى طاحت
...: تضرب بنت؟
اورطيغا: راه قلت ليك متنفرقش بين البنت والدري
يوسف: وقف حداهم ووراه الكينة غيثة هضري دابا
غيثة: مكاين والو انا كتبكي عفاكم صافي نساو هادشي
اورطيغا: دار الكينة فجيبو اللوراني علاش نسااوه وحنا فيه الا عندك شي حاجة نطقيها دابا ولا بغيتي حتى تولي شمكارة تضوري فزناقي
...: وقفت كتقاد شعرها الا غتديوني البوليس سربيو مزال عندي كليان تيتسنى
اورطيغا: تبسم معاها غير صبري معانا شوية مشا عندها كيقلبها بطريقة مستفزة تحركات يدو فمناطقها خلاوها مكرهة جبد من جيبها ساشي صغييورة فيهم 5 دالحبات ونتر صاكها مع حلو عامر فلوس
مرفحة مع *** ابنت **** هز دوك الفلوس ولاح داك الصاك دايرهم فجيبو فين التيليفون
....: هادشي علاش تنشربو هاد السم باش نساو هاد المجتمع الذكوري فاش عايشين
اورطيغا: الاخت زام* شافت فيه بقرف واا هو باينة علاش كاين شي حميدة غيق* عليك بزق على وجهها حاشا النعمة لوخرا كتمسح وجهها ببرود كتخليه كيغلي يطير غير على عنقها يهرسو
يوسف: كيشوف فختو ممتيقش ولكن دابا بالدليل وكولشي كااين جات كتبغي تعنقو ودفعها بشوية
نسامحك فحالة وحدة
غيثة: كتشوف فيه حشمانة شنو اخويا؟ للي بغيتيه نديرو ليك
يوسف: تعالجي
غيثة: انا اصلا مشربتش بزاف يمكن هادي 3
يوسف: واخا هكاك
غيثة: بقات كتبكي بهستيرية واورطيغا عاود جمع لوخرا بنص للي كتستاافزو بحركاتها حتى طااحت اورطيغا صافي طلقها
يوسف: غنديوها البوليس
اورطيغا: شافها ظحكت كتزبد تفقسو زطم على صدرها ويديها كيبغيو يهزو رجليه حيت قصحها دار يديه على جنابو
اوا وختك؟
...: ختك حتى هي غتمشي معايا مغنزولهاش من فمي سمية غيثة تتبيع بحالي بحالها
غيثة: بقوة الاعصاب طاحت على. قفتها سخفت وجات على راسها باينة كلات الدقة فجبهتها مشا يوسف عندها كيهز راسها واورطيغا باقي زاطم على صدر لوخرا وكيزيد يعفس حنا عندها كيشوف فيها
اورطيغا: شكون عرفك عليها
...: أي.. زول رجلك ونقولك حيد رجلو جات تنوض وحط رجلو فعنقها باراك حتى خرجو عينها كتكح بعد رجلو
هي للي قلبت علية فالتيليفون
اورطيغا: شكون القو** للي كان بيناتكم؟
....: بحرا كتنفس وخايفة من هاد لهبيل للي تسلط عليها كاين ݣروب بريڤي فلفايس للي بغا شي حاجة تيحط نمرتو وتنبقاو نتواصل كل مرة ونتلقاو فشي كافي ولا بلاصة للي باينة كترد نفسها واصلا عادي راه كولشي تيدير هادشي
اورطيغا: متاقش، قلبها على كرشها كيقلب جيابها
لا تر** لا صد* عاود قلبها على ظهرها شاف فيوسف للي فيق ختو
فين تيليفونك؟
....: بقا مع صاحبتي
اورطيغا: ودغيا سمحو فيك؟
....: عادي حتى ونتشد كاين مني بزااف متيهمنيش دير فية للي بغيت ديني عند البوليس نعطيك ساعة يجي بابي يخرجني
اورطيغا: شحال كيستافزو هاد النوع وقف مبعد معندها ما تݣر شاف فغيثة للي تفتحت ليها جبهتها من الجنب ودمايات هابطين على حنكها وباينة داايخة
دي غيثة لصبيطار
يوسف: وهادي؟ حتى لوخرا مهربتش بقات جالسة فالارض كتشوف غير فاورطيغا كتسنى الضربة فين غتجيها
اورطيغا: هاد **** معندها باش تنفعنا واخا **** من دابا لصباح مغتقولك حتى كلمة تنفعك بيها
يوسف: بغضب شاف فختو غيثة هضري شكون اول مرة عطاك هاد زبل
غيثة: مقادراش تشوف فيه، الدوخة فيها بحرا كتقدر تحل عينها شافت فاورطيغا بحزن عزت عليه وجمعت شنايفها بحزن كتبكي
اورطيغا: ديها لصبيطار ايوسف بغا يهزها ولكن محاكمهاش براسو كيترعد بالاعصاب هزها اورطيغا عليه وهي دفنت وجهها فصدرو شاف فهاديك لبنت للي وقفت كتقيس فعنقها
صرفق معاك هاد *****
يوسف: طالب عليها مشا صرفقها بكل جهدو حتى سيل ليها الدم فجنب شنافتها... عيا يسولها نفس الهضرة للي قالت لاورطيغا كتعاودها بكل برود وكل ثقة ان وسيلة تواصلهم كانت الفايس عرفو مغيجيبو منها لا حق لا باطل والا مشاو البوليس هي هددت بغيثة غتمشي فيها حتى هي مشا تبعهم
حلهم يوسف الطموبيل فين دخل غيثة اللور ويوسف صونا على خديجة تلبس اي حاجة عليها وتنزل عندو ضروووري.. اورطيغا شاف لوخرا خارجة بحال شي هبيلة جاتهم فشكل بنت فعمرهاا 19 عام مبلية وكتبيع
منتبعوهاش؟
اورطيغا: سد لباب على غيثة مبعدين تيليفون غيثة للي غيبين شحال من حاجة الا كانت كتكذب هاد الكانيش بقا نتا حاضيها مول الدعوة يبان يبان ولكن راه حتى ختك غالطة فهادشي وخليك ماشي معاها بالسياسة، مهم فالليل ونبان عندك الوالدة ملصقة فية ولد ختها
يوسف: زفر الله يعزك
اورطيغا: باشما قولي شنو كاين غير بشوية غتجبد منها الهضرة.. هبطت خديجة مخلوعة
انا مشيت طل على غيثة
من بعد ونجي نشوفك.
اورطيغا: مشا لطموبيلتو داز من حداه يوسف مزروب معجبوش هاد الوضع دابا تشدت وعندها الحبة رجع هز الساشي كانو حبات فالابيض وولي جاب يوسف كانت فالازرق جلس فطموبيلتو كيشوفهم هاد النوع للي قرا الرقم فيها، شايفو عمرو تعاطاااه ولكن شايف حالات وصلو لحماق ولحبس بسبابو
#الإكستازي
عارف هاد النوع دالقرقوبي بالظبط صعييب مقسوم على زوج كيخليك فحالة ديال الهلوسة ومنشوي، وفنفس الوقت كتكون نااشط وشي مرات بشكل هيستيري... وغير كتفوت ديك 6 سوايع او لا 8 على حساب المبلي كيتسالا تأثيرو واخطر الااعراض الجانبية فيه هو فقدان الذاكرة...
صونا على ملاك مجاوبتش كتب ليها ميساج
""الزين فين غابرة""
ديمارا مصوني على عمر لقاه مزال كيتسناه المشكل مبقات عندو ݣانة ولاخر باغي يتسارا ومن صباح وهو كيتوحم ليه على صلاد فروي.. مشا وقف حدا القهوة وهو يركب عمر وتمو ماشيين للبرج
يوسف: داها ليرجونص دخلوها كتغرز كيفكر فشنو غيدير فهاد الموصيبة واش يعيط لمو؟ ولا حتى يستنطق غيثة جات عندو خديجة وقفت
فين كنتي؟
خديجة: غير طواليط قولي شنو وقع بالظبط
يوسف: عاودلها على كولشي ندمت علاش متبعناش ديك لبنت
خديجة: وهي كتقول معندها متخسر يعني مراد عندو الصح
يوسف: معندو ميقول بقاو ساكتين حتى كملو لغيثة ودخلو عندها لاويين عليها الفاصمة فراسها صاڤا
غيثة: مقادراش تشوف فيه مشات عندها خديجة عنقتها
خديجة: تبغي نمشيو؟ حركت راسها باه.. وتمو خارجين فجو مكهرب..
ملاك: فاقت داايخة كانت بوحدها ناضت دخلت للحمام توضات وخرجت صلات هزت تيليفونها خرجت عينها كانت 6 دالعشية مموالفاش تنعس هادشي كامل خرجت حدا مها كان بدا يظلام الحال شوية جلست حدا مها للي كانو حاطين الݣوتي بقات كتاكل واخا مقادااش قرات ميساج ديالو حطت التيليفون معندها خاطر ولا ݣانة منين مها كتهضر معاها
والله اماما الا عييت علاش متخليونيش نعس فبيت عمي راه نهار يجي نخويه ولا غير داك لبيت صغير يجيو لبنات نخويه
زهرة: واش بيدي ابنتي
ملاك: وبيد من؟ اماما هضري مع بابا ولا غنفرع لباب وكل نهار ندير مشكلة ونغصها علييكم والله حتى ندير الشووهة فينما بغات توصل توصل...
وصلو للدار من بعد مجاو من عند طبيب، يوسف حط سوارت تابعينو لبنات بقا واقف حدا لباب متبع غيثة للي حانية راسها ومسندة على خديجة للي دخلتها نيشان للبيت قدات ليها لوسادة بغات تكى
خديجة: صبري تبدلي حوايجك، عامرين بالدم
غيثة: حركت راسها باه عاونتها خديجة مسحت بليلانجين رقبتها لبستها بيجامة ديباردور بسروالو وتكات حشماانة ولكن كتحس براسها مخنوقة غتنفااجر كولشي تجمع عليها وهاد عقلها بقا مع الكينة للي كانت غتكتلميها..
خديجة: شنو نوجد ليك تاكلي ؟
غيثة: حركت راسها بلا وهو يبان يوسف باين عليه الحزن حنات راسها
خديجة: هانتي تكاي شوية على منطيب شي حاجة ونجيبها ليك خرجت ويوسف بقا واقف حدا لباب دخلت للكوزينة كتحاول تفكر غير فهداك للي شافتو معاها هداك نهار للي بانولها من بيتها، والو معقلتش عليه حلت الثلاجة فيها غير بسكوي وعصير حيت مزال متقدات
يووسف يووسف
يوسف: سد على غيثة لباب ومشا عندها جالس فوق الكرسي شاف ف200 درهم للي خلات فوق ورقة ديال تقدية جمعها مع ألف درهم للي عطاتو خديجة وي
خديجة: معندي منطيب خاص نتقدااو
يوسف: بنرڤزة واش هدا وقت تقدية وطياااب
خديجة: شافت فيه مدة، هزت حاجبها
متعاودش تغوت علية انا بغيت باش نطيب لختك وليك ولية ماكلة نقية ديال الدار
خرجت من الكوزينة وهو دار يدو على وجهو بتعب، وقف تابع خديجة للي دخلت كتبدل حوايجها فبيت نعاس
يوسف: خديجة متزيدينيش حتى نتي
خديجة: مقلت والو ومزدتك والو
يوسف: متقلقيش
خديجة: سمع ايوسف انا معاك ولكن باش تغوت علية على والو مغنقبلهاش كما متفهماك حتى نتا فهمني وحتارم هادشي للي كندير معاك
دخلت للحمام وهو بقا جالس فوق النموسية حااير فشنو يدير فيه واحد الغضب كبير للي يمشي يدير فختو شي عاااهة وفيه واحد الحزن كبييير للي يمشي لشي بلاصة يبقى فيها بوحدو وفيه حييييرة كبيرة واش يخبر مو ولا يدي ختو تداوا قبل خرجت خديجة مشا وقف حداها شد فيدها كيشوف فعينيها بترجي
عااارفك تديري كتر من جهدك
خديجة: مكنديرش كتر من جهدي كندير داكشي للي انا مرتاحة فيه غيثة بحال وحدة من خوتاتي عادي نتعامل معاها هكاك تبسم معاها
مهم موقع والو..
يوسف: شنو نخرج نجيب؟
خديجة: معرفتش، صافي خلي تقدية من بعد هاد الوقت بقا فيه مع ختك ودموندي على شي حاجة...
ملاك: رجع صونا عليها حيت مجاوبتش نهار لعشية كااملة طلعت لسطح معندهاش الخااطر وللي زاد كمل عليها كتصوني على وفاء للي كتر من 10 ايام وهي غاابرة وتيليفونها طاافي معارفة عليها والو وفين هي..
تقنتت فبلاصتها كترجف واخا لابسة مزيان ومكاينش شي برد قااسح
الوو..
اورطيغا: كيهضر مع عمر انا جاي، بعد عليه فين أبنتي غابرة علية؟
ملاك: غير فالدار
اورطيغا: نجي نشوفك؟
ملاك: بلاش امراد
اورطيغا: علاش؟ وكفاش هاد بلاش؟
ملاك: ما فيا للي يخرج عياانة
اورطيغا: كفاش مفيهاش للي يخرج؟
ملاك: بنرڤزة ورائها ضارها مبغيييتش
اورطيغا: اهاااه واخا قبل متهضر تشرح قطع قبل ميتعصب عليها ويخصر الهضرة حيت عصباتو شحال كيتسنى يشوفها وهي كتهضر ببرود ومباغيااش رجع لعند عمر للي جا عندهم شريف جبد ݣارو كيكمي جاه ميساج من عندها قراه
"متعاودش تقطع علية"
هز حواجبو بجوج كان كيحسابلو غتعتاذر منو حط التيليفون فوق الطبلة قاالبو غتحمقو
عمر خاص نرجع للمحال هانتا مع شريف حتى تشوفو شي قنت نمشيو نحشيو وجهنا فيه
شريف: مغرجعوش للدار؟
اورطيغا: بلاش الا بغيتو نتوما سيرو حتى تكملو ولحقو علية لبلاصة المعلومة
شريف: كيخليه على خاطرو صافي
اورطيغا: ياله هو هدا ناض مشا ركب فطموبيلتو حك ذقنو رجع صونا عليها مجاوبتش تبسم بعصبية غياكل ريتو على هادشي للي كديرلو مشا للمحال طلق الدري يمشي وبقا تمااك صونا عليه يوسف
فين اخااي
يوسف: فين شادها؟ باقي مع ولد الخالة
اورطيغا: انا فالمحال دابا
يوسف: بوحدك
اورطيغا: زفر بعصبية عفا الله..
يوسف: هه انا جاي كان فطموبيلتو مشا نيشان عندو دخل حداه كانو شي كليان كمل معاهم اورطيغا حيد ليݣات غسل يدو وجا حداه
اورطيغا: كيف بقات غيثة؟
يوسف: نعست
اورطيغا: اوا شنو غدير؟
يوسف: حرت واش حالتها خاصها داوا ولا شنو؟
اورطيغا: مهضرتوش
يوسف: واخا تشوفني هاكا الا هضرت معاها دابا نقدر نضربها عييت وانا ساد راسي معاها هي ماشي شي وحدة صغيرة باش تدار بيها ولا تبع هاد السم راه كبيرة والمشكل كولشي موفر ليها شنو ناقصها مفهمتش
اورطيغا: امم صعييبة الواحد ميقدرش يتحكم دغيا فراسو ولكن غنصحك دير بحاجة انا وكان كنت فبلاصتك مكنتش غنديرها ولكن للضرورة أحكام خاصك المهل معاها العشيير باش نتا تفهم شنو خاص يدار ولكن ايوسف الصمطة خاصها تزير شوية حيت لبزيم ترخف..
ملاك: بقات لاسقة فمها على حساب لبيت ومالقات للي يجاوبها ومها كتقولها تسكت بقات كدور عينها ميمكنش تسكت وبصوت عالي مرت عمي
زهرة: عارفها شنو غتقول ملاااااك
سهام: ههه خلعتني ماالك البنت؟
ملاك: شنو فيها الا شديت داك لبيت للي خاوي نعس فيه ؟
سهام: مݣلعتلكشاااي راه لبيت دخلي فيه مالي وقفت ليك فيه
ملاك: اوا وفاش يجي عمي؟
زهرة: ملااااك
ملاك: زفرت انا فية نعاس دابا خرجو بغيت نعس سيرو للصالون وجلسو وتجمعو تماك
زهرة: خرجت عينها كوني تحشمي
ملاك: نطلع لسطح؟ نعس فسطح غدا خاص نفيق بكري بغيت نعس مجاوبوهاش ناضت زااعفة دخلت لبيت مها دارت شالها وعبايتها وخرجت من الدار قاصدة قهوة باها ركبت فدماغها ديك الفكرة وخاص طبقها والسلام صونات على باها مجاوبهاش وقفت حدا طموبيلتها كتسناه يبان.. شافت فحمزة وقف بطموبيلتو حداها خرج شافها وقلب عينيه حلت مرتو لباب كانت اول مرة تشوفها من مور شنو وقع ليهم حنات عينها باغيا تعاود تصوني على باها حتى جات عندها شافت فيها ولوخرا من عينها كيطلقو شراار شافت فحمزة
أميمة: دارتلها يدها فحنكها مدورة ليها وجهها شوفي فية انا ماشي فيه متشوفيش فراااجلي
حمزة: أميمة
ملاك: محست حتى دفعتها خليني محتارمة هادشي للي دزتي فيه واخر مرة تقيسيني
حمزة: كيجرها وهي كتغوت على ملاك وباغية تضاارب ريحي ولا غنتفااهم معااك طلقت حلقها كتغوت وتسب
ملاك: دي دي هاد لمريضة من هنا قبل ميخر.. للأسف الناس كتفرجو وباها جاي جيهتهم، بقات كتشوف فيه
خ**....
حمزة: مبغى صداع جرها وهي كتنتر ليه مبعد على ملاك وباها للي ضار شافو كيوبخها تمات حتى هي جاية كاااعية، زرب بلوخرا دخلها للدار ساد لباب
ملاك: جاية كتنݣر كانت خارجة تهضر على حقها صدقت هي للي ممزياناش الفكرة ديال اورطيغا كدور فراسها باش تشري دار تبعد ولكن واش غيخليها باها ولا مها تعيش بعيد عليهم وعاد خدمتها هنا دابا بغات تهضر معاه دخلت حيحت عليها مها على لخروج لتماك حيت رشيد عاود لمها حيت مصلاحش يطلق القهوة ويتبعها...
طلعت لسطح جلست معصبة كازة على تيليفونها صونات خديجة مجاوبتش كتسناه هو يهضر معاها..
اورطيغا: بقاو مجمعين على داكشي للي كانت كتشرب كيشرح ليه النوع ويعطيه أمثلة مكيزوقش ليه الهضرة باش يعرف جدية الأمر، دخل شي كليان بعد يوسف كيهضر مع خديجة كمل مع لكليان وهز تيليفونو صيفطلو شريف انه أمينة أصرت يمشيو يتعشاو معاهم صونا على مو
انا الخدمة عندي مزيرة والدري صيفطتو...
صافي يتعشا ويتم جاي عندي...
وصافي اصاحبتي انا نصيفطلو لوكاليزاسيون ولا غنهضر مع شريف يلوحو عندي...
واااا ماشي تشوفيني هاكا تااااا.... وااا هنينا الوالدة
ياله بسلامة..
لا متصيفطي والو انا غنصيفط على شي لعبة ناكلها... قطع شاف فيوسف واقف
شنو فيها؟
يوسف؛ خديجة عيطتلي غيثة كانت بغات تخرج ترجع للدار
اورطيغا: صافي سير اصاحبي وقف على شغلك مشا يوسف وهي تصوني عليه بريڤي جاوب
وي....
ألووو..
مكيسمع واالو قطع شاف فالساعة كانت 9 ونص جاه الكليان للي كان جامع ليه شنو بغا كمل وناض كيرجع لحم لفريݣو مسح الدنيا تماك طفا ضواو سد المحال هاز بلاستيكة فيدو طلع للدار دخل للكوزينة نيشان شرمل ستيك ديال لحم وحط الروز كيتسلق، دار تيليفونو يتشارجا ومشا دوش خرج صلا لعشا ورجع للكوزينة كيلاهي راسو حيت افكار +21 كدور فراسو وكيحس براسو تزير سمع تيليفونو كيصوني مشا لقا بريڤي رجع جاوب
وي...
حتى صوت سير الله ****** ****...
ملاك قطعت بالزربة هاربة من هاد الوابل ديال تخصار الهضرة
رجع كينݣر مشا للكوزينة صاوب داك ستيك لحم مع صوص بلونش والروز وحطو..
جلس كياكل داير فلم فMBC جا مع لقطة الاحضان والقبل
ولاد **** باغييني *****
قلب داير ناسيونال جيوكرافيك
على هاد الز**ة للي ضارباني غيجيبو شي سبع **** شي ضبع
كمل خدا داكشي للكوزينة غسل الماعن ورجع جلس مصوني عليه عمر كيعلمو انه جاي.. قطع ورجع صونا عليها جاوبت هاد المرة دغيا
ملاك: ألووو
اورطيغا: غير للي يشد مك دابا فشي بيت معندو لا باب لا سراجم
ملاك: جابلها الظحك كتمسح دموعها من التصبينة للي صبنها باها على خروجها والكلام ديال أميمة
اورطيغا: مال مك هاد نهار جاتك علية
ملاك: بصوت مخنوق كنت مريضة
اورطيغا: ونيت راكي مريضة، ولكن ديريها فين تجييك
ملاك: مراد..
اورطيغا: رية مرااد.. مالكي؟ ومال صووتك جاتها البكية وتقجت بقات ساكتة وحتى هو سكت حيت قال شي واحد طلع عندها حتى قطعت مربعة يدها على وجهها كتبكي واخا عاد راجعة من سفر ولكن كتحس براسها قنطانة ومخنوقة كتر مكانت قبل سفر
اورطيغا: تسناها تعاود تصوني والو مصوناتش مابغاش يجبد ليها صداع ويصوني حيت معارف والو شنو كاين وعاود مصيفطاتلوش ميساج كتخليه ديما يفكر شنو عندها
جا عمر بقاو مجمعين شوية حتى هو عيا مع الخدمة والافلام للي كيتفرج حبسهم حيت غير كيتزير.. صيفط ليها ميساج
باغي نهضر معاك قبل مننعس...
ملاك: فبلاصتها مقهورة "حتى لغدا ونهضرو انا فبلاصتي والدار مزال فايقين"
اورطيغا: "متوحشتينيش؟"
ملاك: بقات كتشوف فلميساج شافت فمرت عمها للي كتغطي ولادها للي مجمعة معاهم وكيظحكو بصوت مرفوع حيت غدا غيبداو لقرايا واخا غيمشيو غير يقيدو دفاتر والكتوبة حتى الاثنين عاد يقراو نيشان، كانت كتحلف عليهم للي مقراش غتجلسو من لقرايا
سهام: ياك املاك غتخدمي معاهم؟
ملاك: معندها خاطر ضرووري
سهام: متديش على باك ݣبيل راه حتى ديك لهبيلة دمرت حمزة خاصها شي طرحة دلعصا
ملاك: اودي..
سهام: معليكش للي موصلكش تفقس منك ياله تصبحون على خير خليو بنت عمكم تنعس طفات الضو وهزت تيليفونها هي عارفاه مكيبغيهاش تعطل عليه بقات كتفكر هاد الصد ديما ليه ماشي حل وحتى هي بغات تشوفو كترتاح بالجلسة معاه وهضرتو واهتمامو مشات ترجمت توحشتك بسبليونية وصيفطتهالو باش ميفهمهاش وفنفس الوقت باش ميقولش مجاوبتش..
ملاك: ""Te extraño""
مجاوبهاش عرفت غيكون نعس وراس كيقولها ولا غيكون كيهضر مع وحدة اخرى
مخاطبة دماغها: نعس نتا الا مفقستنيش متجلسش هاني
يوسف: بقا شاد أعصابو بستة وستين كشييفة باش مينفاجرش عليها شاد ليها يديها لي كيرجفو
انا خوك احبيبتي عاوديلي كفاش وقع
غيثة: بلعت ريقها الا قالت الحقيقة ممكن تخسر خوها دوك لبنات تعرفت عليهم فلفايس، أنا للي غلطت اخويا عفاك سمحلي
يوسف: وعلاش؟ شنو ناقصك؟
غيثة: عقل.. ناقصني لعقل ولكن تنواعدك عمرني نعاود
يوسف: مكيحسش براسو تايق فيها، اصلا الثقة للي كانت تهرسات متأكدة غدا غنمشيو لطبيب
غيثة: علاش؟ خويا واش بغيت تردني وحدة شمكارة بالسيف انا خديت يمكن شي 3 ولا 4 عفاك نساو هادشي كاامل بحال عمرو وقع انا غنبدا الخدمة وغندير غير داكشي للي بغيت
كتهضر وقلبها غيسكت ودمها كيغلي ولكن مبغاتش تمشي معاه دير تحاليل مبغاتش تزيد تشوف شي خيبة أمل فعينيه.. وصل لعشا ناضت باش ميزيدش يمرض جلسو فوق الطبلة وخديجة كتحط جرت يدو وباستها كانت اول مرة ديرها
عفاك سمحلي اخويا
بعينين عامرين دمووع وبغصة كبييرة فحلقها...
عفاااااك
أصبحنا وأصبح الملك لله...
الغالية: شافت حتى واحد من دوك الجوج مسول عليها بقا فيها الحال لا يوسف لا غيثة
فاقت بكري مشات لباتيسري خدات فطور ومشات لدار يوسف تفيقهم وصلت للدار بدات تدق حل ليها يوسف كان لابس عارفة ولدها كيفيق بكري بقات كتشوف فيه غتمشي بلا متفطر
يوسف: تبسم صباح الخير بعدا سلم عليها دخلي شد من عندها ميكات للي جايبة
جيتي بوحدك؟ مجاش الواليد
الغالية: خاك وباك خليتهم غيمشيو للخدمة من بعد مفطرتهم
يوسف: اممم
الغالية: فاااين دوك لخميرات شافت طبلة لفطور متنوعة شافت خديجة لابسة كسيوة قصيرة وهازة طبسيل فيه حرشة
خديجة: مرحبا مرحبا حطت الطبسيل وتمات ماشية عندها سلمت عليها زيدي دخلي مالكي واقفة
الغالية: حسابلها مغتلقاش لفطور، تبسمت معاها ودخلت فين لالة غيثة
خديجة: ناعسة دخل يوسف للكوزينة حط شنو جابت مو
الغالية: نمشي نفيقها تفطر معانا
خديجة: لا لا غير خليها مرتاحة، نعست معطلة لبارح
الغالية: عاود شنو قلت؟
خديجة: كما سمعتي كانت عيانة منعستش بكري جات تجاوب الغالية وشافت فيوسف جاي كانت ملامحو ماشي كما موالفاه بديك الابتسامة سكتت فكرت يكون مدابز مع مرتو جلسو والغالية كتشوف فديك الحرشة للي حطت عليها خديجة رابعة ديال الزبدة خالتي نقطع ليك ولا تاكلي بيدك
الغالية: انا ناكل هادي؟
يوسف: شوفي هاكا قلت فاللول ولكن ذوقي بعدا شاف فخديجة تقطع لو طرف
خديجة: ههه راه تاكلها بيدك حسن ههه الحرشة بالفرشيطة ايوسف
يوسف: وصافي اخديجة
الغالية: عذرها مموالفاش
خديجة: شافت فيها وهو يشدها يوسف من يدها مهم.. سكتت لسانها، قطعاتلو الحرشة وحطات ليه فطبسيل وبمعلقة هز الزبدة وحطها فوق الطرف ديالو وبقا كياكل
يوسف: اممم احسن حرشة كليت فحياتي
الغالية: ميقت فيه فحياتك ݣاع لواه لواااه
يوسف: هادي حرشة بالعشوب شنو هاديك العشبة؟
خديجة: مانتا، كتشرح ليها ولكن بدلع كتفقسها وكتزيدي عليها بصلة محكوكة وزعتر مهم نتي شنو لعشوب للي كنبغي وكطيبيها... بقات كتاكل صونات عليها ملاك جاوبت زين صاڤا وقفت ومشات من حداهم...
يوسف: الوالدة غيثة لبارح تضربت فراسها طاحت وتجرحت
الغالية: الله يا سيدي ربي على بنتي فاين هي؟ ناضت ومتعلمتيش واش جاتها شي ضربة قبيحة فوجهها؟ واش خسر ليها وجهها؟
اورطيغا: فاق بكري كان ديجا علم عمر أنه غيغبر صباح كامل بحكم الخدمة، داكشي الخاص ديالو خباهم فالمجر للي كيسدو، ومشا لبن سودة مكانتش خدمة كثيرة قرا ميساج ديال ملاك تبسم صونا عليها مجاوبتش حيت مزال مكتفيق لقا سعد تماك استغرب حيت ماشي هو الي كيكون فهاد الوقت، مسلمش عليه كأنه مكاينش ݣاع، دخل لبيت كيبدل حوايجو لبس بوط لميكا وخرج من تماك كيشوفو كيهضر مع دراري تماك
مغنبدااوش الخدمة هاد نهار
سعد: دراري ممخلصينش فخدمتهم دلبارح
اورطيغا: هز جوج جناوا ديالو كيضربهم على شكل إكس بحال كيمضييهم وهو مقوس عينو فييه
مغنخدمووش؟
سعد: هدا للي نتوما تتبغيو تخدمو معاه
اورطيغا: كيشوف فهاد بنادم من ديما كيبغي يحايد ليه خدمة ذبيحة، شاف فهادوك كيشوفو فيه واقفين فبلاصتهم
مبغيتوش تخدمو ألف واحد باغي يحرك كتافو ويخدم
سعد: شحال ونتوما خدامين معانا فالتالي ها شنو غتسمعو من واحد خدام معاكم بحالو بحالكم
اورطيغا: من ديما كيستافزو هاكا قدام الناس
هانتا هضرت ال**** انا بحالي بحالهم غير خدام ماشي تنخلص فلعباد، رافع صوتو انا داخل 5 دقايق متبعني حد وااا بربي لا حط شي واحد رجلو هنا
تبسم بسخرية
حيت كلمتي من كلمة الحاج
دخل كيشوف مكاينش ريوس بزااف هاد نهار ولكن كانو يديه كياكلووه على سعد شاف الخدامة كيدخلو وكل مرة كيقرا درس باش ميتيييقش فالناس..
دخل سعد مخسر كمارتو كيتمشى ببطئ وداير يديه من مور ظهرو كيتمختر فمشيتو اورطيغا كيسلخ فحولي بالزربة جبد دوارة شقها على زوج لاحها قداام رجلين سعد داك الخنز تفرق عليه مجلخ ليه حوايجو
واش ابنادم داخل المووسم
سعد: مخرج عينيه فيه وفحوايجو مزال غنتحاسب معاك
اورطيغا: دابا ولا بحال ديما غتخليها كريدي ضار كيكمل خدمتو هز كرشة اخرى ضار كيقلب عليه ولاخر زرب خارج كينݣر قبل ميجي فيه زبل.. كمل شغلو مخلي لوخرين كيكملو صݣايط ومشا للبيرو كان سعد ومعاه اب ادم
خلاصي
سعد: حسب شحال من راس وبدأ يحسب الفلوس حطهم فوق الطبلة مكيهضرش حيت فوقو الكاميرا ولكن بيناتهم نظرات ديال القرطاس حسب اورطيغا فلوسو تماك ملقاهمش ناقصين عاد تم خارج نافخ صدرو كيتمشى بشوية
شفتي
اب ادم: غير تنشوفو تنحس بالطونيسو طاحلي زعما الحاج مدار فيها ما يصلح
ملاك: كانت على غير نشاطها عاود صونات على اورطيغا مجاوبش عرفاتو غيكون غاارق خدمة..
جاتهم حتى هوما خدمة ديال شي طرقان.. بقات ملاهية فيها رجعت صونات على وفاء جوج نوامرها طافيين جاها إحساس خااايب انها تكون وقعت ليها شي حاجة ولا علاش غتطفي نوامرها واكترية النمرة للي قالت انها عاطياها غير المقربين.. صونات على مريم تشكات ليها على القهرة للي فيها عاود ولكن لوخرا راه سبقتها فهادشي وملقاتش حل ما عليها غير بصبر
وانا لقيت حل
مريم: عاود تقولي تخرجي تكري
ملاك: لا نشري نيشان
مريم: هههه كتعجبيني بعظا كتطلعي النيڤو
ملاك: كنهضر معاك بالصح امريم
مريم: ملاك بابا مغيخليكش تخرجي وحتى ماما
ملاك: اوا
مريم: انا نعاود نهضر معاه دابا
ملاك: راه مشا لبلاد صباح هو وحنيني، شوفي انا نكمل شي خدمة ونعاود نصوني عليك
مريم: غير متقلقيش
ملاك: وحتى ونتفرݣع شكون مسوقلي فديك الدار ولكن غير صبري دابا نشوههم
مريم: ههه عاود
ملاك: اه قطعت معاها وجاوبت خديجة مشات شعشبونة
خديجة: احم الحمد لله ونتي
ملاك: عضت لسانها بدات كدور عينها متقوليش سمعت
خديجة: ههه سمعي انا رغبت ماما وقالتها لبابا باش تجي عندي هاد لعشية
ملاك: بالصح
خديجة: اه غير عيطي ليها ياك غدا ويكاند تجلسي معانا هاد لعشية تبدلي الجو شوية
ملاك: امم خاص نطلع لفاك نمشي نقاد شي حاجة نكمل وندوز عندك
خديجة: دخلت لبيتها وسدت لباب عفاك اجي املاك راه غنتفرݣع هنا من صباح وانا كرغبك عفااك
ملاك: خديجة مافيا للي يسمع ديك زمر دعݣوزتك، واش يوسف حداك؟
خديجة: لا فالخدمة
ملاك: اختي انا براسي بغيت نرتاح شافتها ساكتة شوفي نكمل من لفاك ونجي عندك
خديجة: واش دايرة مع مراد؟
ملاك: خديجة من بعد ونهضر معاك عندي شي خدمة
خديجة: صافي انا نتسناك قطعت معاها وبقات متكية على ميجي يوسف حتى سمعت الهضرة خرجت لقات غيثة ومها لابسين حوايجهم وخارجين
فين ماشيين؟
غيثة: اماما والله حتى بيخير غير خليني مرتاحة هنا
الغالية: زيدي نشوفو هاد لخياطة للي فراسك شافت فخديجة منين يجي قولو حنا مشينا للدار يتبعنا هو بوحدو الا خليتييه
خديجة: طانزة لا عفاك مشتاقة نجي عندك
الغالية: دابا تشتاقي تبقاي فهاد الدار غير صبري علية قد مطوال يعجبك اديك الهجالة وهاد الدار من اللول كانت لمولاي يوسف ولالة الياقوت
خديجة: سيري سيري استغفري مولاك وصلي ركيعات هوما للي غينفعوك اما الا لقيتي مقابلاني غادي غير تحماقي ومتوصليش لشنو باغية
غيثة: كتسمع وكتشوف ولكن عقلها فعالم ااااخر لا غرجع هنا اماما مرجعش معاك...
الغالية: بعصبية زيد علية نتي خلاص وانا تتقول مال لبنت مدوخة وهي جالسة مع مكلخة
خديجة: الله يعفو عليك ديها فبنتك حسن متبقاي مقبلاني..
الغالية: زربت خارجة مخلية لباب محلول جارة غيثة انا نوريييك لالاااك اش سااوية
اورطيغا: رجع للدار لقاها عامرة كاينة مو وختها بنتها وعمر سلم عليهم من بعيد دخل نيشان يدوش كينݣر تعطل تماك كان باغي ينعس شوية عاد يهبط للمحال غير يتكالما حيت عيا يبين البرود ولكن سعد عصبو هاد نهار
خرج من تماك مشا لبيتو سد لباب جبد خلاص اليوم خبعو فين موالف كيخبع الفلوس حتى الجمعة ويديه للبنك كما موالف.. لبس حوايجو صلا الظهر دخل للكوزينة كانت مو كتحط ليه غداه
حطيهلي فالصالون
أمينة: باش تعاود توسخ الزربية، ياله جات قبيلة هادي تاني مرة كنصبنها وعمر شي ضيف جلس فيها
اورطيغا: واش انا مومو تتقردي فية هاكا
أمينة: ضارت عندو كتشوف فيه مالك كتبان ماشي هو هداك ياكما على حساب ختي وولادها للي جاو؟
اورطيغا: ااابناقص من شي غدا خرج من الكوزينة
عمر: مرااد وااامرااد
اورطيغا: شاف فيه كان فلبيت، بنرڤزة شنو
نعيمة: اجي اولدي جلس ترتاح جاية مو هازة بلاطو فيه غداه طبسيل كسكسو وكاس لبن
أمينة: اجي احبيبي تغدا اورطيغا غير كيشوف تبعها جلس شاف فلبنت للي تماك لابسة داكشي محتارم حانية عينها اول مرة يشوفها مكملش ثانية فيها جلس اولدي
اورطيغا: رجع هز لبلاطو واش واحد ياكل نتوما جالسين انا نتغدا فلكوزينة قبل متهضر مو مشا للكوزينة حط كياكل هز تيليفونو مدوز نمرة ملاك مجاوبتش شاف فالساعة كانت 2 ونص رجع صونا جاوبت
فيين اتووت
ملاك: بملل دايرة يدها على حنكها باقا فالخدمة، ونت؟
اورطيغا: انا ياله جيت للدار
ملاك: مزيان
اورطيغا: نجي عندك؟
ملاك: لا.. عاد تفكرتني شحال صونيت عليك هاد صباح
اورطيغا: ملاك سد باب الكوزينة برجلو داز صباح **** بحال ***""
ملاك: واا مرااااااد
اورطيغا: عيوون مرااد.. بغيت نشووفك البنت نهرب بيك شوية
ملاك: هه فين غتهرب بيا؟
اورطيغا: معرفت مهم نتلاحو لشي كوان نديرو سانديكا متحركة وانا وياك راس فالراس وجبيكا
ملاك: هههه شنو
اورطيغا: مديريش فبالك هادي غير لغة عوازا تنفهموها غير بيناتنا
ملاك: ههه
اورطيغا: شنو منشوفكش
ملاك: انا نقدر نهبط لفاس نمشي لفاك نقاد شي ورقة وغندوز عند خديجة
اورطيغا: مسمعتش سميتي فهاد لپَّاسِيُووو
ملاك: ههه
اورطيغا: جا معاك الظحك ابنت رشيد
ملاك: غير قال سميت باها غوبشت
اورطيغا: امتى غتجي وكان؟
ملاك: معرفتش شي ساعة ونص نخرج من الخدمة ندووز للدار بعدا عاد غنجي
اورطيغا: علميني غتلقايني تنتسناك فالحومة
ملاك: اوكي...
الغالية: خداتها عند طبيبة تجميلية للي خبرتها ان الجرح مزال جديد خاص يبرا بعدا ضرووري عاودت ليها الفاصمة ورجعو فتاكسي
اش غتمشي عندهم ديري
غيثة: معجبهاش الحال تديها لطبيبة بغيت نرجع عند خويا كرتاح عندهم
الغالية: واش مشفتيش مرتو كفاش محاملة حتى واحد يجي عندها مسمعتش شنو قالتلي واش معندك نفس الحمااارة
غيثة: بعصبية هضري على راسك انا خديجة باغياني شنو بغيتيها تبقى غير تتسمع منك ومتجاوبش
الغالية: هاااه هاد الأخلاق تيمشييو, ياك ابنتي
غيثة: ماما خليني مع يوسف هاد الايام
الغالية: صونا علية ادم راه فرنسا واش عارفة؟
غيثة: قلبت وجهها مباغياش تسمع سميتو حيت هادشي كيخليها كتر باغية ديك الكينة
الغالية: علاش ابنتي مقبلتيش بيه ولد مأدب وباينة باغيك
غيثة: واش بالسيف؟
الغالية: بقاي متبعة ديك الهجالة حتى تخرج عليك وصلو لحي خرجت من الطموبيل زادحة لباب عليها
سمحلي اشريف راه هاد الجيل غير الله يستر معاه وصافي
خلصاتو وخرجت تابعة بنتها كتنݣر عليها
زهرة: من بعد مقطعت مع مريم بقات كتفكر شحال ولكن محست حتى نطقتها وينوض صداع اللهم صداع ولا بنتي تحماق
مشات لبيت هزت الساروت ديال ديك الغرفة واخا جاية حدا طواليط ولكن اللهم شحال وهي كتفكر فهاد الحل
حلتها فيها كيحطو ربل ديال الدار والزيت البلدية، بقات كتشوف البيت صغير مساحتو 2 متر ونص على 3 يقضي الغرض مشكل للي فيه خاصو صباغة ضرووووري حيت حيوطو مقشرين ويتنقا مزيان وخاص فراش وهادشي للي هنا يتلقالو بلاصة حيت فيه طونات ديال الزيت البلدية للي كيحتاجو العام كامل، دخلت مرت الجد
غنرد هدا بيت لملاك تبقى تنعس فيه
مرت الجد: مسكينة لبيت حالتو
زهرة: نقاادو ميمكنش نخليها هكاك شفتي لبارح شحال بكات بغات حتى هي فين تخشا وتلبس لي بغات وتنعس بيه وتخبع حوايجها
مرت الجد: انا من عندي نبدا نخمل معاك
زهرة: هاد الزيت للي معرفت فين نديرها
ملاك: دخلت للدار لقاتهم مجمعين فداك لبيت، مشات لبيت مها نيشان كاعية تبدل حوايجها وتقاد راسها باش تمشي تشوف للي كيطير عليها هاد الغمة حتى دخلت عندها مها
غنمشي لفاس اماما عندي شي حاجة فلفاك وندوز عند خديجة شوية ياك عيطاتلك قالتها ليك
زهرة: باتي معاها شافت فيها ملاك ممتيقاش راني قلت لباك باش تعاونيها فالتخمال ونيت راجل ختك عندو شي خدمة فرباط وختك غتبقى بوحدها هاد اليوماين
ملاك: بقات كتشوف فيها وتخطيطات فراسها وجاية مع الويكاند مقالتليش
زهرة: عاد عرفت حتى هي، واالكن
ملاك: مكاينش واالكن اماما معندي فين غنمشي كوني هانية...