الغالية: ولدي خليها تمشي مع عائلتها راه تابعهم سبوع ختها حشومة تخليها ومتحضرش ليها
زهرة: (بقات غير كتشوف شافت فخديجة ياله بغات تهضر)
يوسف: (دار يدو فظهر خديجة) انا نتسناك برا.. (مشافش فمو مفهمش واش بغات تحرجو ولا تصغرو معجبوش الحال وزادت داكشي للي بيناتهم، وفنفس الوقت مهضرش معاها باش حتى هي متحرجش)
زهرة: الله يخلف عليكم ومرحبا بييكم غدا ان شاء الله لمكناس (تبسمت وزادت مع طريق تابعينها بناتها ممخليينش ليها الوقت حتى تجاوب.. وصلو لبرا خلاو مهم بوحدها مع رشيد تركب معاه ربما تصفا الخواطر شوية!! مريم وفاطمة ركبو مع ملاك وراجل فاطمة خدا الولاد ومشا يقضي شي غراض عاد يتبعوهم..
ياله غديماري شافت اورطيغا خارج وكان معاه شي راجل كبير شاف فيها تبسمت وزادت مع طريق متبع ليه العين..)
فاطمة: وااهيااا ناري هادي كتاااار من الشمالية
مريم: حسن عواان خديجة بهاد لعݣووزة
ملاك: الله يهديكم راه حتى خديجة عارفة فين دااخلة وحتى هي مساهلااش
مريم: انا عارفاه مساهلاش ولكن هادي راه بزااف
ملاك: شتي يوسف ولد الناس مغيخليش شي واحد يحݣرها وعاد غيسكنها بوحدها مغيكونش بيناتهم بزاف ديال الاحتكاك
فاطمة: صراحة غزاااال راجلها.. ومصبرش عليها ههه
مريم: هه وراه باينة غير من هاد الزربة مشتيش العرس للي قالك من بعد 15 اليوم ومكره من الفوق هو مبغا عرس
فاطمة: بابا مغيدير ليها والو ؟!!
مريم: اوا راه دارلها فاللول عرس كدااير
مريم: وماما مغتصيفطهاش بلاش ضروري تشريلها حويجات ونديرولها ليلة الحناء ميمكنش تمشي هكاااك وحتى حنا نتعاونو بيناتنا
ملاك: انا معندي فين نعاون (شافت فمريم) ياله كنتكافا مع الطموبيل ووراقها المازوط ودابا الخدماا
فاطمة: ههه وباااز مكتقشرييش متعاونيش ختك؟!
ملاك: عاونتها فطلاقها
مريم: بالصح نتفارضو غير حنا، ملاك راها خسرات بزاف هاد الايام (بدلو الموضوع وشدو طريق لمكناس)
~~~~~~~~
رشيد: فين غتمشي ازهرة!!!
زهرة: ارض الله وااسعة
رشيد: نتي عارفة منقدش نخليك بووحدك راه الا مشيتي لشي قنت غنتبعك غنتبعك ماشي من بعد هاد العشرة غنسمح فيك وعاد نتي عارفة...
زهرة: سمحتي فية نهار تزوجتي ارشيد
رشيد: كنحلف ليك بالله الا ندمت وغلطت، مرة وحدة نهار زيدني با تزوجتها بالفاتحة ديك الليلة مرة وحدة فين شفتها
زهرة: (قلبت وجهها كتشوف فطريق.. عيا يرغب ويهضر وهي مكتجاوبش...)
~~~~~~~~~~
غيثة: (مشات جابت ليها لويزة وجلست حداها فالكوزيينة والمساعدات كيجمعو الدنيا) راه مرتو اماما شنو تتقولي
الغالية: (مفقووووسة) غتلوى علييه انا عارفااها باغية تشدو بلولاد
غيثة: ماما راه حتى خويا نفس الفكرة باغي يكونو عندو ولادو نتي دعي معاهم وصافي وكل واحد حر فحياتو يدير شنو بغا
الغالية: (تفكرت منين ردت عليها الهضرة عرفتها ماشي كما كانت كتبان عرفتها ماشي بهلوولة وعارفة شغاالها وقااادة، وهادشي زاد خلعها كتر)
انا عارفة شنو غنديير
غيثة: شنو غديري؟! (لا رد) ماما تكلمي لالة مفتاحة تتعيط عليك (ناضت الغالية ومشات عندهم مصطنعة الابتسامة وكما كانت عارفة غينتاقدو مرت يووسف وهي خاصها تبين أن ولدها عندو الحرية يختار للي بغا حيت مغترضاش قدام شي وحداات.....)
يوسف: (كان صايݣ طموبيلتو كيتسرااو فشوارع فاس هو يحط يدو على فخض خديجة شافت فيه وتبسمت وهو بقا كيعبز بيدو) فين تبغي الزين ناخدها
خديجة: هه معرفت
يوسف: باباك قالي نجيبك لمكناس قلتلو اه غدا نكونو عندكم
خديجة: ههه لاااااأ غتديني اليوم (شاف فيها) مبقى والو ايوووسف
يوسف: مفهمتش
خديجة: العرس بقاتلو 15 اليوم وانا مغيعجبنيش الحال نمشي فحال... (دارت وجه بريييييء كتغبن) معرفت كفاش نقولهالك زوينة حتى لمور العرس وتكون بيناتنا شي حاجة غتبقى بحلاوتها
يوسف: مكتشوفيش صبرت بزااف
خديجة: وعلاش انا ماشي صاابرة (شاف فيها وتبسمت) حتى انا باغياااك وبزاااف وكتر ما تخيل راه من بين الناس كاملة كنشوفك غير نتا للي راااجل فهاد الدنيا (كتحلون وترمش فدوك شفار)
يوسف: اممم!!
خديجة: ههه والله صافي متحشمنييش ولكن عفااك خليها لمور العرس
يوسف: ولكن احبيبة متافقناش على هادشي!!
خديجة؛ انا دابا غير طلبتك احبيبي، ونتا دير شنو بغيييت هدا غير طلب صغيييييور وصافي
يوسف: (لاحتلو الكورة يعني مغتكونش برضااها وهادشي للي مابغاش هو رجع شاد فيدها كما صبر هاد المدة يزيد يصبر 15 اليوم ويخليها على راحتها مكاين لاش لعناد وتكعرير بقا شي جوج دقايق ساااكت هز يدها باسها وتبسمت) تبغي تمشي تشوفي الدار ديالك!!
خديجة: اممم
يوسف: متخافيش مغيوقع واالو ولكن تاخدي فكرة الا معجباتكش شي حاجة
خديجة: واخا (اصلا كان ماشي ليها بقات كتشوف فطريق كانت الدار فالاطلس دخل فدرب كان مكالمي شافو العساس حل باب الكراج وتمو نازلين لباركينغ لتحت هبطو) ساكن هنا
يوسف: ان شاء الله ساكنين هنا
خديجة: هه ان شاء الله (طلعو فلاسناسور وشحال فرحت بهاد المستوى، وصلو الطابق 4 شافت كان الطابق فيه شي 4 ديور او اكتر محسبتش مزيان وقدام كل دار كاين فاز كبير فيه شجيرات وصقييير فتح باب مع دخلت عطات منو ريحة منعشة، دخلت هي اللولة كتشوف فالدار للي مع الدخلة كان اثاث غزااال اول حاجة بلكار صبابط كولو فالابيض فوقو فاز بيض فيه ورد حمر ومرايا دائرية على شكل سحابة وحداها علاقة سوارت وكاين كرسي باش تلبس صباطك على خاطرك، وجليسة ديال L موراها ڤيترينة كولها كتوبة وداكشي مقاااد فوقهم ڤيزان صغار عاد السيجور مفرش بفتويات عصريين مع وسيدات صغاار وزربية سااامبل اونفاص معاها تلفاز كبيرة وتحتها طابلة صغير.. كولشي كيبان نقي زادت جوج خطوات كيبان ليها الصالون خااوي يعني مزال ممفرش تسد لباب ضاارت)
يوسف: (تبسم) مرحبا بيك احبيبة فدارك
خديجة: (فرحانة) غزاالة ال.ار ايووسف (ضارت كتشوف وهو يعنقها من اللور قلبها ضرب بحال اول مرة شي راجل يقيسها)
يوسف: غتزيد تزيان منين تعيشي فيها....
وصلو لمكناس نيشان لدار عݣوزة نعيمة ستقبلوهم مزيااان وفرحو بيهم بقاو مجمعين وهي تلحق نعيمة للي كانت فالصالون قدات حالتها مزيااااااان.. من بعد الݣوتي استئذنو منهم وخرجو باش للي بغات تكري ولا تشري شي كادو ورشيد ماشي معاهم
مريم: داابا
ملاك: (مغوبشة شافت فباها للي ماشي من مور زهرة) عيطتيلي ابابا
رشيد: لا
ملاك: اااه (رجعت ضارت شافت فيها مريم) شنو!!
مريم: هادي هي سمحلي ابابا؟؟!
ملاك: وصاافي امريم دابا الا قلتلو سمحلي غتجيه فشكل غيقول بالصح غلطت هاد البنت ودارت شي فضيحة.. ويبقى يحسبها بينو وبين راسو ويزيد يتعصب ونصدقو فشدلي نقطع ليك فهمتي!!
مريم: يا ختيييي شحال ديال تفلسييف فيك راه عادي تقولي لباك سمحلي سوا غلطتي ولا لا ولا تقل لهما أف!!!
ملاك: دابا نقولهالو سمعتكم كتقولو تعطيوها فلوس وكادو اوا انا شنو ندير راني عطيت كادو وكادو غاااالي
مريم: ههه ضبري راسك
ملاك: من اللول فاش تافقتو قولوهالي ماشي تخليوني نتحشم
مريم: (شافت شي تكاشط) اجي اجي ندخلو هنا (ضارت) ماما فاطمة (دخلو وباهم بقا برا كيتسنااهم بقاو مدة عاد تمو خارجين كولها هازة ساشي فيدها)
فاطمة: ياله نمشيو ناكلو شي حاجة
رشيد: راه تعطلنا على الناس حشوومة ندخلو حتى يظلام الحال
ملاك: اه بابا عندو الحق
فاطمة: (قوست عينها فيها) على ظهري!!!
ملاك: (لعبت بحواجبها كتقلي ليها السم حتى صونات عليها غيثة ) وي غيثة صاڤا!!
غيثة: صافا زين وصلتو مزيان
ملاك: الحمد لله
غيثة: اممم ملاك صيفطيلي النمرة ديال خديجة ماما بغات تعيط ليهم يديرو الݣوتي وكتصوني على يوسف متيجاوبش
ملاك: اهااااه يمكن غير ممساليينش. ولا مشاافوش
غيثة: وي داكشي للي قلت ليها ولكن خافت عليهم
ملاك: واخا.. انا نصيفطهاليك دابا
(قطعت صيفطاتهالها وهزت راسها كان صقييير كولشي طاالق ودنييه ولكن باهم كاين وصايݣ بيهم حتى وحدة مقدرت تهضر فقط مهم للي دارت حركة بوجهها ان هادشي محماااانش... كانت باينة الام قاسحة ومرضياااش على هاد زواج خافت على بنتها من شي تجربة فاشلة اخرى... وصلو للدار ودخلو كيتسالمو عاد مع العائلة للي لتاحقاات ام حميد حلفت حتى تدير سبوع كبير وتحضر فيه صغيير ولكبير بفرحتها بحفيدتها واخا عندها الاحفاد وهادشي كبر بنعيمة وعائلتها عجبهم الحال بزاااف ..)
يوسف: (كان كيوريها الكوزينة المااعن للي عندو داكشي قليييييل ولكن ديجا مجهزة بالإليكترونيات) غير تجي لدارك غنبقاو نخرجو تاخدي للي بغيتي
خديجة: (تبسمت حيت عجبتها لا ماشي عجبتها حمقاااتها فرق كبييييييير كتفكر نهار مشات مع عمر وهداو ليها الكادوات الي جابت من دارها وخزنوهم على حساب ضيااف..) ان شاء الله
يوسف: اممم بيت نعاس بعتو بغيت شي واحد جديد
خديجة: بالصح!! علاش بعتيه؟! زعما ماشي مشكل وكان خليتي لقديم دابا غيتجمع عليك كولشي العرس ولمسافرة بزاااف دالمصاريف!!!
يوسف: كتخافي علية احبيبة!! (مشا مقرب حداها داير يديه على خصرها كانت قدو فالطول تقريبا وبيد شد يديها بجوج دارهم على خصرو)
خديجة: علاش شكون عندي من غييرك (بدلع وتقاالة) نخمم فيه، ونخاف عليه، ونفكر فيه...
يوسف: (كيشوف فشنايفها) كاين غير انا (كيقرب بغا يبوسها وهي دور بشوية جات لبوسة فحنكها بقا مكوانسي) حتى هادي!!
خديجة: ههه اه
يوسف: (مرجع راسو شوية) وبزاااف هادي هي ديال مكوي بالنااار وعطشاان
خديجة: ههه (بغات تهرب وجرها لصدرو معنقها وحتى هي عنقااتو طالقة تنهييدة) نتا احسن حاجة وقعاتلي فحيااتي ديما كندعي ربي يخليك لية
يوسف: ويخليك ليلي..
خديجة: (بعدت وخلاها على خاطرها واخا فوق جهدو ولكن حتارم قرارها للي باين شحال وهي مقررااه ميمكنش يقمعها وهي كانت كتعاود انها دازت من مرحلة القمع باغيها تبقى بشخصيتها ماشي تكون نكرة وبلا شخصية اه اه لا لا وكولشي بالحوار والنقاش ولكن كتقتلو منين كتدفع عليييه كبير كيزييد يتلهف عليها وعااارف انه غيكون مرتاح معاها فهاد النقطة وهادي اهم نقطة باش كتحدد مسار الحياة الزوجية...)
خديجة: اممم مقلتيليش احبيبي فين غنسافرو؟؟!
يوسف: (مشا للثلاجة حلها وكانت غير حجة باش يضرق *** للي بان)
اممم مفاجئة
خديجة: مقدرتش نصبر قولي..
يوسف: (طل عليها) اوا حسي بية دابا حتى انا
خديجة: هههه (هي راه فاااهمة بقات كتقلب فلقجورة وكطل من السرجم للي كيطل على الجردة ديال المجمع) منظر زوييين
يوسف: اجي نوريك لبيوتة (شدت فيدو وراها بيت نعاس للي كان كبير وخااوي حل بلاكار فيه حوايجو مستفين ومخلي بلاصتها خاوية تبسمت، كان فيه دوش وطواليط وراها 2 بيوت لوخرين حتى هوما خاويين وصغار وعاد طواليط وحتى الصالون خاوي) كولشي من بعد نتي غتكلفي بييه
خديجة: شوية بشوية ونقادو كولشي
يوسف: ان شاء الله (سمع تيليفونها كيصوني) شكون غيصوني عليك!!
خديجة: (حلت صاكها جبدات التيليفون شافت النمرة غريبة) معرفتش شكون
يوسف: (شد التيليفون وعرف النمرة) احم انا نجاوب..
(جاوب)
الو!!.….
اممم كان بعييد...
لا غير مع شفت النمرة عرفتها جاوبتك هادشي لي كاين..
الوالدة من بعد ونجي غنوصل خديجة لمكناس..
اممم..
بلا متشقي راسك اصلا كنت عارضها لكافي..
بسلامة..
واخ واخ... (قطع)
خديجة: (بهدوء) واش خالتي الغالية؟!!
يوسف: اممم كانت بغاتنا نمشيو نديرو الݣوتي معاها
خديجة: وكان مشينا حشوومة هي فرحانة بينا وحنا نقولولها لا!!! مجااتش!!
يوسف: متأكدة!!!
خديجة: متأكدة بزااف ايام الله طويلة مزال نخرجو فينما بغينا.. ولكن اليوم عرضاتنا منردوهاش فوجهها عرفتي واخا مكنعرفهاش ولكن باينة مرااا زوينة وراقية كدخل الخاطر شحال فرحات بينا قبيييلة مسكيينة
يوسف: (غير كيشوف فيها مو شنو كتقول ومرتو كفاش كتفكر)
مكاينش للي زوين فحالك
(زرب عليها دافعها على الحيط بايسها لمدة 20 ثانية حتى بعداتو شوية من صدرو رجع حط جبهتو فوق جبهتها كيهضر بهمس)
ءJe t'aime..
اورطيغا: وعلاش نتا غتحمق راسك الحاج!! راه كاينين خوتو يشوفولو محامي وهو بك.. براسو غيفكها بلا متهز الهم
الحاج: راه ولد خويا
اورطيغا: ونتا راك عياان واش فهاد العمر غتبقى تقلب على محامي الحاج سير ترتاح شوية عرفتي شنو ياله نوصلك تمشي لمولاي عقوب نكمدو لعضيمات شوية نباتو تماك والغد ليه رجعك
الحاج: فهاد الظروف!!!
اورطيغا: اوا هو للي جابها فك.. فراسو داخل المطار وهاز معاه الحشيش!! ماشي تصطيا هادي مبلي يكميه قبل ميدخل
الحاج: لا لا شي واحد كان مقصدو
اورطيغا: ياك قلبو فالكاميرات مكاين واالو!!
الحاج: للي دارلو دارلو وهو برا المطار داكشي للي تيقول هو
اورطيغا: مهم الحاج انا نهضر مع الوالدة غنديك لمولاي عقوب تكمد شي شوية عظامك وتريح راسك
الحاج: مجااتش اولدي فهاد الظروف نسمح فولد خويا (بقا لاخر حتى قنعو واعدو غدا يمشي حيت دابا ميقدرش.. وصلو للدار كولشي كان مجموع تماك اصلا الدار دايرة بحال مقر العائلة لقريب ولبعيد كيجي ليها..
جات حتى مرتو وبنتو ليلى حيت خرجووه من الكوميساريا ولكن الباسبور بقا معاهم حتى يشوفو شنو غتخرجلو المحكمة بقا اورطيغا تمااك شاف ليلى للي كتبكي ومعنقة مها بقا كيشوووف واحد الراس شرييير خادم ليها بلااان م*** ولكن كينعل الشيطان ماشي هو للي يحݣر على لبنات راه فدا دقتو وهي راه دارتلو قرصة أذن كره يعاود يجيب شي وحدة أخرى... كانت دايزة مو) الوالدة الواالدااااا
مينا: هانا احبيبي شنو؟!!
اورطيغا: مهم انا غنمشي غدا نكمل الخدمة وغنجي من مور الحاج نمشيو لمولاي يعقووب تمشي حتى نتي؟!
مينا؛ نمشي
اورطيغا: صافي مزيان غير وجدو راسكم منين نصوني عليكم وجدو راسكم
مينا: وفين باغي تمشي جلس تعشا معانا
اورطيغا: لا لا داير مع دراري، اليوم جامعنا يوسف
مينا: بارك ليه والله الا فرحتلو مسيكين الله يكمل عليه بالخير حتى نتلقاه نبارك ليه ونشوفو لالة السلطانة للي جاب
اورطيغا: مووبلغ
مينا: وعقباالك حتى نتا اوليدي ونفرح بيك وبوليداتك
اورطيغا: (هز حاجبو فيها) ياله تهلااي (خارج مدورش عينو فيها عكسها هي بقات متبعااه حاسة بالذنب حيت مزال الجرح باين فعيينو...)
ليلى: (تم داخل باها وعنقااتو) بابا شنو دارو معاك واش نبقاو هنا فالمغرب؟!
...: نتوما سيرو حتى لحق عليكم
ام ليلى: ( بالفرونسي) لا لا ميمكنش جينا كاملين رجعو كاملين ميمكنش نخليوك فهاد الموصيبة بووحدك اشيغي
اب ليلى: مفهمتش شنو هادشي
ام ليلى: واش عندك شي حساب مع شي واحد!!! هادي راه شي واحد حالف فيك مزياااان
اب ليلى: لا لا معنديش مشكل مع حتى واحد
ام ليلى: (شافت فمينا لي كتشوف فيهم مكوانسيى باغيا تعرف كفاش وفاش وعلاش!! ولكن مقشبلت والو منهم
كملت كتهضر بالفرونسي) وهاد العاهرة (شيرت بوجهها لجيهتها) حتى هي جاية تصنت باش تشفى
ليلى: ماما حشوومة
مينا: (ضورت عينها هاد الكلمة فهمتها pute وشيرت ليها قربت ليهم مخنزرة ودارت إشارة ليها)
لية قلتيها؟!!!
أمينة: معايا كتهضري السَّفَلِيَة؟!!
ليلى: (وقفت) ماشي معاك اطاتي أمينة والله هي تتهضر على الناس للي لعبو بابا
اب ليلى: (مباغيش العيب مع الحاج) حاشا لالة أمينة واش حنا تبدو نزلو لهاد المستوى
أمينة: حتى الاونزلات ليه انا نطلعها لعندي ونهبطها كاااو راها مزالة مكتعرفني
ام ليلى: انا مقلت والو اصلا انا تنهضر فالمشاكيل ديالنا
أمينة: الله يعميها ليك نوريك الݣرسيفية واش دير فيك بقاا اياكم غير خنز لوروب تعايرو بيه لاليااتكم...
ام ليلى: والله معليك نحلف ليك باشما بغيتي
أمينة: (البنت كتعنقها وتبكي وحتى الراحل وقف كيعتاذر مشات مخنزرة.. واهم حاجة مكانش ولدها اما ميشدوها لا هي لا ولدها الا الحݣرة ميقبلوهاش...)
~~~~~~~~~~~~~~
يوسف: (واخا خديجة اصرت تمشي لدار عݣوزتها الا يوسف مبغاش شي حاجة تنكد عليه فرحتو براكة غير عجباتو كفاش خديجة مساالمة باغية غير تعيش بيييس مشاو لكاافي بقاو كيهضرو راه اول مرة ياخدو راحتهم حيت قبل فاش تبقاو فقهوة كانت هي خايفة يشوفها شي واحد ومكملت معاه حتى نص ساعة اما دابا واخدين راحتهم)
صراحة للحلال طعم اااخر
خديجة: علاش؟!
يوسف: معرفتش تنحس براحة خطيييرة واخا مكنتش تنخاف من قبل ولكن معاك وانا هاكا معرفتش راحة فشكل وزويينة
خديجة: (تبسمت وكلات من تشيز كيك ديالها) بنييينة
يوسف: عجباتك؟!
خديجة: اول مرة نذوق بحال هاكا
يوسف: (تبسم معاها) فاللول مع الإكس ديالك كنتو تتخرجو تسرااو
خديجة: اممم إلا هضرت عليه متغيرش؟!
يوسف: انا سولتك غير فهاد النقطة.. حيت بغيت نعوضك على للي معشتيهش ونعيشوه انا ويااك
خديجة: لاأ صراحة قلييل الا مشينا لشي محلابة اما لمسافرة كنا فالصيف كنسافرو لعروبية ديالهم حيت الدار فالصيف كيكريوها للناس للي كيجيو يتصيفو وتبحروو صافي من بعد كرجعو لدارهم
يوسف: (هز حواجبو بجوج) وعلاش!!
خديجة: شنو علاش!! كانو باش كيترزقو هوما كانو ناس على قد الحال وبزاف كيديروها
يوسف: لا علاش كنتي صاابرة حيت باينة مكنتيش مرتاحة
خديجة: (تبسمت) كنت صابرة على أمل شي نهار تبدل الوضعية مجاتش نخلي هاداك ولد الناس غير حيت معندوووش ولكن من بعد العيشة حراااارت بزااف من شلاااا
يوسف: (شد يدها باس كفها) صافي نسااي عليك
خديجة: (تبسمت بهدووء) وانا معاك ناسية حتى راااسي اصلا منين عرفتك حسيت براسي عمرني تزوجت معرفتش علاش كنحس هاكا ههه غتجي حاجة كظحك ولكن كنحس اول مرة غنتزوج ونفرح براسي هاكا.. صعيبة الوحدة تلقا إنسان متفهم وحنين هاكا اصلا هادشي للي كتقلب عليه أي مرا
يوسف: (عجبو كلامها بقا كيلمس يدها بحنية تفكر الخاتم!!! لدابا معطاهاش حتى خااتم وهي مهضرتش كيزيييد غير يتأكد انها صافية معاه مكاين لا طمع كيف قالت مو لا والو هي باغيااه غير هو.. دار صبعو فالبنصر ديالها) باغدووون نسيت قضية الخاتم
خديجة: (هزت كتفها بلا مبالاة) معنديش مشكل حتى يقرب العرس
يوسف: لا لا ضرووري.. ياله نمشيو نشوفو شي واحد
خديجة: اممم واخا (خرجو من القهوة ممكملاش لا عصيرها لا حلوتها وجاتها فشكل تخلي داكشي من موراها بقاو على الكلام الحلو مشاو لذهايبي ففاس جديد عندهم معاه معرفة، دخلو بقا كيورييها وهي كتسول على الثمن)
يوسف: (جرها مبعدها شوية على الناس)
خديجة حبيبة بلا متبقاي تسولي على الثمن داكشي انا نتكلف بيه نتي خودي للي عجبك
(تبسمت ومشات ختارت وااحد كبير شوية وفيه قوة الحجر خلاها على خاطرها واخا... جمعو ذهايبي فبواطة وخرجو عاجبها الحال بزااف دخلو الطموبيل جبد الخاتم من لبواطة ودارو ليها وباس يدها)
تلبسيه بالهنااا
خديجة: ربي يخليك احبيبي ونتا مديرش خاتم؟!
يوسف: اهاااه اجي نرجعو تختاري معايا (رجعو خدا واحد سامبل ورقيق دارتولو تماك وخرجو نيشان مشاو كرااو تكشيطة دلفريييع وشرات فولار ليها مناسبة مع اللبسة ونيشان شدو طرييق لمكناس...)
وصلو لمكناس بقات فالطموبيل معاه مسخاوش ببعضيااتتهم حتى شافو باها وشي رجال خرجت من تماك وهو عياو يشدوه يبقى يتعشا عتاذر ومشا رجع لفاس حيت مو موقفتش من التعياط.. شاف فالساعة كان معطل ودراري غيكونو تجمعو صونا على مو..
الوالدة انا نكمل شي شغاال ونجي عمدم
الغالية: (بانفعال) داابا تكون فالدار
يوسف: مصالحش صحابي تيتسنااوني مجاتش نخوي بيهم وانا للي جامعهم صبري غير جوج سويعات ونكون عندك
الغالية: (بعصبية) دااابا تكون عندي ولا مخلاتكش ديك اللفعة!!!
يوسف: شكون؟
الغالية: نتا عارف علامن تنهضر منين خرجتي قبيلة مقدرتش تعاود تصوني علية ولا تجي طلل علية ولا حتى تهز التيليفون وتسول
يوسف: (كيهضر مبرد) راه قلت ليك شنو كاين انا داير مع صحابي نتلقاو نكمل معاهم ونجي عندك وخديجة راها فمكناس ماشي معايا
الغالية: (بقات سااكتااا حتى قطعت عليه) من داابا تبدل مزيااان تبارك الله ولد وربي وفالتالي يدوور عليك
غيثة: حشوومة عليك اماما واش هو فرحان ونتي تتنكديها عليييه والله حتى حشوومة
الغالية: دابا رجعت انا للي خايبة
غيثة: مقلتش ليك خايبة اصلا موقع واالو هوما عرسان جداد بغاو يبقاو مع بعضياتهم راه مكانوش تيتلقاو فمرة حتى وهوما مخطوبين
الغالية: دايراالي فيها الشرييفة العفييييفة!!!
غيثة: (طلعت لبيتها مقدراتش تسمع هادشي صونات عليها بنت من لفامي)
بالصح مفخباري واالو..
امم حتى ديك ليلى قولي مغتمشيش...
شنو نجي ندير تماك!!
وهي واش تتخدم ولا تتقرا!!!..
اممم..
لا حنا كان ضريب صداق ديال خويا..
انا مفخباري والو.. شغلها هدااك اصلا معندي بيها حتى شي علاقة باش تبقى فية ولا لا..
غير هو واش غيبقاو فرياض ديال عمي بنسليمان؟!!..
اممم صافي قطعي قطعي انا نتأكد (صونات على اورطيغا كتشوف فلمرايا وتقاد شعرها للي طلقاتو غير جاوب تبسمت) وي اورطيغا صاڤا!!
اورطيغا: فين ازين
غيثة: (تبسمت) انا فالدار قبيلة مهضرتش معاك كنت مع ضيااف
اورطيغا: اممم معليش
غيثة: عقباالك حتى نتا
اورطيغا: أش بغيتي عندي اختي!! هه عقبالك نتي باش نفرحو بيك خلاااص
غيثة: (جمعت الابتسامة) حتى انا مبغيت زواااج
اورطيغا: حسن ليييك (شاف يوسف وصل حيت كان برا) غيثة من بعد ونصوني عليك.. واش بغيتي شي حاجة؟!
غيثة: (طلع ليها الدم) واقلة غير تنبقى نصدعك بسلامة (قطعت مكرهة)
اورطيغا: (استغرب ولكن مهتمش شاف يوسف لي جاي) خاي لعريس بديتي بالتعطاال من داابا واش شي مرض تيجي العرسان ولا شنو؟!
يوسف: ههه عقباالك باش حتى نتا تبقى تعطل علينا
اورطيغا: (بقا شاد فيه حتى دخلو عند دراري للي شدو فيه مزياااان دوزو عشا بيناتهم بالظحك والنشاااط.. خلص يوسف لعشا وبقا مع شريف واورطيغا ولوخرين تشتتو)
شرييف الحاج الا بقا مدخل راسو فمشاكل الناس غير غيعيا كتر وصاافي غدا غتشدلي المحال انا غنديه يفوج شوية فمولاي عقوب
شريف: احسن حاجة دير والله
يوسف: شحال غتبقاو؟!
اورطيغا: غنبقاو شي يوماين تماك جيب باك وتبعنا
يوسف: داكشي فاش فكرت نيييت..
يوسف: (شافو شريف غير ساهي باين مأثر من مور متفارق مع خاطيبتو للي كان كيحماق عليها وكولشي عارف داك السيد كيموت على خطيبتو وشحال وهوما مع بعضياتهم ومعيشها على كفوف الراحة...) ارجوع الله
اورطيغا: منين نتا رطب هكا علاش مفارق معاها ومطيح علينا الضييم
شريف: (تبسم) مكاين والو
اورطيغا: اممم يا حْنَيَّنْ
يوسف: نسا عليك اخاي شريف
شريف: مكاين والو والله خويييت بالي نهار أنا للي درت نقطة وقلب الصفحة
يوسف: شوف انا عارفك باغي تزوج والفاميلة للي طحت فيها انا الله يعمرهم الدار، وبلا منهضر على صواب والتربية تشهى غير تزوج منهم وووكااااااينة واحد شنيولة هي فليفلة ولكن مربية وبنت الناس وزوينة
اورطيغا: لااااا متقوليش داااك نص ميترو
يوسف: هنيينا اصاحبي شو واخا قصيورة ولكن مطيييورة هه
شريف: للي شفنا داك نهار فدار نساابك!! ملاك ياااك!!
اورطيغا: (بقا كيشوف)
يوسف: هيااااا هااااديك عشيرتي وبلا منشكرها ليك لحلاوة ديك لبنت فاشما جيتها
اورطيغا: وعلاش متزوجتيهاش نتا؟! حيت باالي تتشكر فيها بزاايد
يوسف: حيت ملاك عشيرتي بحال ختي ألف مرة قلتها لييك
اورطيغا: اممم ومبقاتش حيت صعيبة وحيت السيدة ممحتاجاش راجل فحياتها وحيت وحيت!!!
يوسف: ههه ماشي كيستيون صعيبة بلعكس حنينة وزوينة ووو كتفكر بعقلها وعندها طمووح باغيا توصل بذراعها غير هي بقوة متتخاف على راسها تتهاجمك وكما كانت نيتك مهم هي متحسش بالضعف وتخاف
اورطيغا: اممم
شريف: هي صافي نمشي نخطب
يوسف؛ من سعدك. لكن هي واش تبغي ههه
اورطيغا: تيبيعك العجل أخاي شريييف جوج متسمعش ليهم واحد ياله عريس ومزال فسبعيام دلباكور
يوسف: ههه والتاني!!
اورطيغا: هو نيت للي مزال فسبعيام دلباكور وغيدخل للمسݣي.. يطوال ويعجبك اخاي يوسف
شريف: ههه صافي انا غدا نمشي معاك لسبوع نشوفو هاد لالة لعروسة
اورطيغا: غدا رجلك معانا لمولاي يعقوب تكمد دوك لعظاام.. وحتى داك المحال بنااقص متقابلووش
يوسف: واش نتا مترحم متخلي رحمة ربي تنزل
اورطيغا: (بتقااالة) متزطمليااش خوويا الحبيب
يوسف: ههه عرفتي (شاف فشريف) الا تزوجتي ملاك خاصك عسكري مع هاد الزوج شي حاجة بيناتهم كتر من الكره
اورطيغا: لا لا لا مكاين لا كره لا واالو غير كنت تنبغي نشد فيها وتيعجبني نعصبها شي مرات... اش بيني وبينها باش نكرهها
يوسف: اممم غير كنت تنظل نفاك فيييكم
اورطيغا: (لعب بلسانو فوسط فمو متفكر اخر مرة فاش فاش شافها..
حتى صونا عليهم الحاج باش يجيو يتعشااو) ياله معانا
يوسف: نمشي للدار الوالدة باغاني فشي حاجة..
الغالية: (بقات كتسناه حتى رجع باه وخوه كانو فدار الحاج، غيثة كاينة فبيتها ومرت خوه كتنعس ولادها وهي بوحدها لتحت بقات متبعااه حتى جلس معاها ولكن مكيتبسم موالو شوفاتو كانو باردين معاها عكسها هي للي ساهلة فيها العافية)
عاد طفات عليك الشمعة وتفكرتي عندك مك
يوسف: كنت تنسحاب نتي اول وحدة تفرحيلي فزواجي وتبغيني نتهنى فحياتي وتدعي معايا
الغالية: على زواجك الزين
يوسف: (زفر مرمش عينو.. بهدووء) من التالي الوالدة!!!
الغالية: مكاين لا تالي لا لول زواجك من اللول كان غاالط
يوسف: وااخا... ياك انا غاالط خليني نتحمل هاد الغلط بوحدي كبير وقاد بمسؤوليتي
الغالية: وانا لاش كاينة فهاد الحياة الا مخفتش عليك وحمييتك
يوسف: مناش تحميني مناااش!!! الا انا عاجبني الحال ومرتاااح مع مرتي وباغيها وختاريت الحلال معاها
الغالية: اشمن فرحان ولا مرتاح ونتا ياله اليوم جلستي معاها مزال حتى نعارفها لا كفاش كتفكر لا والو
يوسف: هانتي قلتيها بفمك انا وياه ياله جلسنا اليوم وهضرنا شوية ولكن لقيت فيها شنو باغي، ونتي مزال حتى متقربتي منها، وكارهااها علاش؟!!!
الغالية: حيت داك النوع أنا للي عارفاااه كيتمسكن حتى كيتمكن راها لفعة مزال مطيحت الماسك ديالها
يوسف: راه زواج هدا ماشي حرب لا هي ولا انا داخلين فيها بهاد العقلية من اللول داخلين بنيتنا صااااافية انا كبرت باغي نتزوج ندير ولادي وحتى هي هكااك أنا باغي مرا ديال زمااان نحط عليها الراس وهي كذاالك والاختلاف ضرووري يكون بيناتنا ربي علاش فرق ريووس غير هكاك!!
انا تنشوف خديجة صافية معايا وحتى انا هكاااك
الغالية: صافية (تبسمت باستهزاء)!! بأمااارة مخلاتكش حتى تجي دير الݣوتي مع ماماك من دابا بدات عليك الحكاام
يوسف: انا للي مبغيتيش نجي
الغالية: وعلاش؟!
يوسف: (بقا كيشوف فيها شحاال) مكنتيش هاكا االوالييدة!! تنعرفك بعقلك ومرزنة ماشي ديالك هاد التصرفات ولا هاد الهضوور، مهم غير نبغي نديرلك فراسك واحد الحاجة انا يوسف ولدك هو هو حتى حاجة مغتبدل فقط تزوجت باش نستاقر ونديير وليداتي ونكبرو العائلة صافي!!
نتي مي وانا ولدك بلا متعيي راسك وديري مقارنة معاها..
نتي غتبقاي الوالدة وخديجة مرتي كولها بقيمتها ومرتبة ديالها عندي
(وقف مشا عندها باش راسها وهي منفخة)
انا نطلب منك غير تعامليها مزيان على وجهي حيت مبغيتش نبقى بيناتكم تااايه وهي مغتشوفي منها غير الخير حيت لدابا هي فاهمة انكي فرحانة بييها ومن دابا نقولك أي كلمة جرحتيها بيها غنعتابرها شخصية والهضرة موجهة لية ماشي ليها (زاد ماشي)
الغالية: فين غادي!!
يوسف: (بضجر) عييت بغيت نعس تصبحي على خير.. (رجع ضار)
غدا الا بغيتي تمشي معايا لسبوع عندهم غيعجبني الحاال....
مبغيتيش على خاااطرك..
(طلع لبيتو يرتاح مع بدل وصلا صلاتو تلاح فنموسيتو صونا عليها ابيل فيديو جاوبااتو والضحكة فوجهها)
ماشي حشومة عليييك تخليني ناعس بوحدي هاد الليلة!!!.....
~~~~~~
ملاك: (صونات عليها نمرة بريڤي قلبها ضرب عرفاتو غيكون حمزة مجاوبتش ومبغااش تقطع دارت تيليفونها فجيبها وبقات مجمعة مع خوتاتها وخوت حميد للي عاطيينها غير للظحك والنشاط وعاد شدو فخديجة للي عرووسة وطاايرة بالفرحة وحتى وحدة مبغات تعيب على خاتمها باش متقرسش وتبقى فرحانة..)
نعيمة: هاي هاي على الناس دالخاريج مصااب يجيبك لعندنا نديرو بروݣرام واااعر
خديجة: والله معرفت مقاليش بالظبط اشمن بلاصة فاوروبا
مريم: الا كان داير بروݣرام راه غيساريك شحال من دولة حيت وحدة قريبة لوخرا ودخول سااهل ياك انعيمة
نعيمة: اااه، اصلا شحاال من مرة درناها انا وحميد
فاطمة: عقلتي فاش جيت عندك ديك المرات وضربنا ديك دوييرة طلعات مسارية غزاالة وحتى المصاريف ماشي بزااف
مريم: انا واحد مزوجاه فاش كيبغي يساريني كيديني لمرزوݣة
فاطمة: ههه قتلو البرد مسكين فأزرو كيمشي يكمدها فمرزوݣة باش يرجع ليك موݣض
مريم: هه عرفتي كيموت على شي حاجة سميتها الصحرا العام للي فات مشينا للداخلة هو ودراري غير طاايرين انا واالو غير كندير ليهم الخاطر بغيت نمشي لشي توركيا إندونيسيا ماليزيا
فاطمة: شي مرات نديرو برݣرام نمشيو لتركيا ياك املاك
ملاك: اااهاااه والله مزيااانة
فاطمة: لا ملاك عارفيينك نتي لي مديريهاش
ملاك: كيتك انا فلوسي واجدين، ومن دابا الا بغيتي
نعيمة: هاي هاي هاي على لقريزيزة ديالنا
ملاك: (كتشقلب عينها) قرزازة على الناس ولكن مع راسي مبرعاااه (بقاو مجمعين بالظحك والنشاااط تعشااو وللي نعس تماك وللي مشا لوطيل باش ميحرجوش الناس للي جايين بزاف من عائلتهم...)
اورطيغا: (دخل جلس مع رجال فالصالون للي كيواسيو فيه محمد (اب ليلى) جلس هو وشريف، فلحظة جات عينيه فعينين اب ليلى وهز حواجبو بجوج بحركة مستفزة بعينيه وقلبهم كأنه كيشمئز وهادشي ماشي مهم عندو) الحاااج غدا غندووز عندك
الحاج: جلس تعشا بعدا
اورطيغا: تعشييت مع دراري (وقف مشا باسلو راسو) حقا نوض رتاح حتى نتا راك مزال عيااان مكاين لاش تبقى جالس هنا
الحاج: معليش اولدي
اورطيغا: عليييه راك حتى نتا عياان انا مفهمتش اصلا لاش مجالسش فبيتك
شريف: اه الواليد مراد عندو الحق، نوض ترتاح
اورطيغا: عرفتي شنو طلع انا نجيب ليك عشاااك (ضار عند الناس) سمحونا اجماعة الواليد مزال عياان ماشي ديال هاد الجميييع (كيهضر بتقاالة وقف الحاج للي كيعتاذر وهو مزيدو طلعو لبيتو كيعاتب ليه حيت هو ياله خرج من صبيطار وباقي سهران لهاد الوقت تبعو سعد ولدو للي جابلو العشا ديالو للي كان خاص بيه ديال الريجيم للي متبعو)
صافي غير سير انا نبقى معاه
سعد: محتاج شي حاجة الواليد
الحاج: لا اولدي بقى مع الناس متخليهنش بوحدهم
سعد: (كيشوف فظهر اورطيغا للي كيقادلو الوسادة من موراه وجاب طبيلة لي كيتحط فوقها الماكلة على لفراش حطهالو) بلا متهز الهم الحاج
اورطيغا: (هز الساشي ديال دوا) فينما كان شي دوا شايط ليهم فداك الفرماسيان عطاوه لك
الحاج؛ ههه (قرب لعندو) العين كانت غتمشيلك الله يحفظ
اورطيغا: اممم
الحاج: ومزال ملقاوه؟!
اورطيغا: مزاال ولكن غيلقااوه راه باين فالكاميرات مهم ديها فراسك نتا قييلك من مشاكل لعباااد وهاد تخربييق
الحاج: راه ولد خويا
اورطيغا: ولد خوك قاد براسو الحاج واش هو مزال صغير ولا مرااهق راه كبير وعارف شنو تيدير... (بقا معاه حتى طلعت مينا عاجبها الحال بقا معاهم شوية ومن تماك شد طريق لدار للي فالليدو وصل الدوزيام ايطاج هز راسو فدرووج جات فبالو ملاك حل باب دارو ودخل كيتبسم منين كيتفكرها كتقول)
"المݣرد العزي مقدرش حتى يفرش دارو"
عندها الحق خاص نشري شي مانطة اخرى ههه
(مشا نيشان للحمام شاف فلمرايا ديك الجرحةالغراز براو بقات غير لا طراس تحت الحاجب وشوية ديال زروقية تحت عينو توضى عاد دهن البومادة هز تريكو كيشوف فلمرايا مزال طبايع خفاااف ولكن الألم مكاينش مشا صلا وطاح دووودة ممسوقش التيليفون كما كان...)
~~~~~~~~~~~
اصبحنا واصبح الملك لله...
سهام: (جمعت صاكها فيه تكشيطة وقفطان وتبديلة وحوايج وليداتها ولبست جلابتها ضارت توادعت مع مرت شيخها) اوا الله يهنيك
مرة الجد: بسلامة وردي لبال غير توصلي صوني علية
سهام: نشاعااله والله مكرهتك حتى نتي تمشي تفوجي شوية ولكن لصقو فيك داك الولد ومشاو
مرت الجد: انا للي بغيت نشدو باش متبقاش زهرة مشطونة معاه ونتي عارفة مكنقد على شي طريق
سهام: اوا غير باش تفوجي وكان
مرت الجد: منحتاش انا براكة علية غير هاد دويرة وهاد الغزال نقابلو، اوا سيري وديري عقلك اسهام متبقايش غير داااويا فالخوااا
(قبل متجاوبها ضارت كتهضر مع الولد للي هااادئ وللي شافو كيبغيييه.. اما سهام وراجلها وولادها شدو طريق لمكناس باش يحضرو لسبوع....)
يوسف: (مكانتش عندو الخدمة مع فاق صونا على خديجة للي واخا كانت مشغولة عطاتو وقت كتهضر معاه وهادشي عااجبو وصاها تمشي لكوافوورة مع خوتاتها معندووش مشكل بلعكس بغاها تهلا فراسها وخصوصا معاه وفجماعة تكون طبيعية ولكن المناسبات هانية حتى هي تلبس وتقاد غير متعيقش...
هو ناض قضى روتينو الصباااحي عاد نزل مع الجو مشمس كانو خرجو يفطرو برا فالجردة خرج عندهم لابس الكيطمة محايد البيجامة جلس معاهم غير باااه للي خبرو انه عاجبو الحال من زواجو من خديجة وديك العائلة حتى جلست مو وهوما يسكتو)
غيثة مزال نااعسة!!!
الغالية: (منفخة) اممم
يوسف: وكان جات تفطر معانا، فين نبيل ورجاء؟!
اب يوسف: سافرو اولدي يبدلو شوية الجو
يوسف: مزيان يفوجو شوية
الغالية: (هزت تيليفونها ويوسف كيشوفها مباغيش يدخل مع مو فحرب راه كيبغيها بزااااف وعارفها كتموت عليه وهو عينيها)
الو كاميليا.. صاڤا الحبيبة صاڤا!!..
قوليلي غنجي لعندك انا ولالة غيثة..
ااااه..
شي 2 سوايع ونجيو..
صافي وجدي كولشي..
اه حتى لباسي نبغي داكشي همة وشااان..
لا ماشي ليلي.. اه.. اه.. بسلامة
(قطعت)
يوسف: هادي كوافورة ديالكم؟!
الغالية: (منيييفخة) اممم (مكتبغيش تهضر معاه. اهل بغاتو يهضر معاها ويحسسها انها الكل فالكل، شافت فراجلها) نكملو وخرج معايا نشوفو شي كادو
يوسف: (تبسم) نديك انا لالة غزاالي
الغالية: (ميقت فيه) إتبقييييستر
يوسف: وصافي الوالدة انا نديك فينما بغييتي حتى انا بغيتك تاخديلي شي كادو
الغالية: علاش ذووق الهاانم متيعجبكش!!
يوسف: لا غير بغيت أنا نعطي شي حاجة اما هي واقلة غتعطي فلوس هاكا قالت لي
الغالية: (معاجبها حااال) اممم وجمع يدك شويش راه تابعك تفرش داك الدار.. اجي علاش يعتي دوك لحوايج كاملين
يوسف: (رجع كياكل) معاجبنيش
الغالية: نهار شريتهم نتا والياقوت كانو عاجبينك
يوسف: (ببرود) دابا باغي نشريهم على ذوق مرتي خديجة
اب يوسف: لا حول ولا قوه الا بالله العلي العظيم سدو علية هاد الموضووع، الغالية موضوع الياقوت تسد ولدك دابا مزوج ويدير شنو حب هو ومرااتو
الغالية: مالي أنا شنو قلت بناقص ݣاع.. (وقفت) انا لبس باش نخرج (مشات عاد جاية غيثة كتميل حيت ياله فايقة)
غيثة: صباح الخير مامي
الغالية: اشمن صبااح هدا سير فطر دغيا باش نمشيو لهاد لخلا للي بلاني بيه سيدي ربي..
(مشات لبيتها دارت المكالمات ديالها عاد لبست لقات يوسف كيتسناها، خرجو كيحاول يسايس معاها مشاو خداو الكادو وحتى هو خدا كادو بقا كيشوف فداك المحال ديال
les bébé
وتبسم شاف فمو)
صراحة متشوق نكون أب
الغالية: (بحسرة) ها علاش كنت نندب اولدي مزوج وحدة فايتة فيها زواج وشحال من عام وهي عند راجلها ومولداتتش غير هادي تخليك تفكر ألف مرة
(خرجت وخلاتو مغووبش.. عاد تبعها هز لكادوات دارهم فلكوفر وفسكات مشاو للدار من تماك هي وبنتها مشاو لكوافوورة...)
~~~~~~~~
نعيمة: وااا غير هاد المرة املاك
ملاك: (بقات كتشووف) لا لا بعدووني
مريم: وديريه مباينش غير شوية ماما قالت ليك متعكريش ومتكحليش نتي ديري داكشي خفيييف
ملاك: يا ودي يا ودي على مولات العقل بغات تزيدني للتبرج
مريم: السلامة يا ربي التبرج ݣاع اختي غير خليك هاكا صفرة وشناايفك بحال عاضة فالملحة
ملاك: (بااااااغية دير المكياج ولكن!! بقات كتشوف هالي كتقاد ظفار ها شعر ها الوجه انا خديجة قدات وجهها مزيان واخا ماشي معيق بغات تخلي داكشي تقيل للعرس ديالها..)
اورطيغا: (منين كمل شغلو فبن سودة ممشاش للمحال اتصال بالخدام عندو مغيجيش والحساب يصورلو كولشي ويصيفطو فلواتس حتى يرجع ويتحاسب، بدل حوايجو ومشا عند الحاج للرياض مع دخل علمو باش يجمع حوايجو وحتى مو غيديها طلع لسطح كيتسنااهم بقا متكي على لحيط كيتفرج وكيسمع العود للي كاين فشي رياض سياحي قريب ليهم وقفت حداه ليلى مضااارش شافها بطرف عينو)
كيبرد راسو ميلوحهاش من تماك..
ليلى: مكنتش بغيت داك نهار يوقع هداكشي
لا رد
ليلى: نتا ستافزيتني بزااف ملقيت غير نعيط على بابا يجي يااخدني وووو كذبت عليه قلتلو انا كنت غير بغيت نجلس معاك ولكن نتا بغيت دير معايا شي حاجة انا مباغااهاش... (مكيشوفش فيها) كانت غير ردة فعل مني على داكشي للي درتيلي وكفاش عاملتيني..
اورطيغا: (ضار عندها وعينيه مقوسين فيها) من اللخر باك جا تهجم علية حيت م*ش ومبردتش ليك الدوودة زا* مصيفط ق*** وطلعت لكتابة ولكن (طلعها وهبطها) مزال غتعرفيني مزيااان...
(بزق حدا رجليها مشماائز وتم ماشي بشوية هبط هزهم بجوج وداز على شريف ونيشان شدو طريق لمولاي عقوب...)
~~~~~~~~~~
ملاك: (دارت فوندوتان شوية دمسكارا وفاغاكو خفيف وحتى لعكر كان خفييف شافت راسها فلمرايا عجبها راسها بزاااف ورجعت مسحت كولشي لبست التكشيطة للي كانت زوينة وقدات شالها لبست الطالو بقاو كيشدو فيها خوتاتها حيت ياله وصلاتهم لبسو طالوهم ورجعو طوالو عليها وبقات كتنݣر كترغبهم يلبسو شربيل..
مشاو للقاعة ديال سندباد فين كان داكشي مضخم من السرباية للي لابسين لباس مغربي جابادور فالاحمر جهة هازين صواني ديال الحليب وزهر وجهة هازين أطباق تمر معمر عاد كدخلي كانت القاعة علام اخر مقادة كولها بورد الياسمين للي دخل كيفهى وضواو لاعبين دور كبير شدو بلاصتهم حدا مهم للي شادة بنت نعيمة علقت ليها لويزة ديال ذهب هاد العادة دارتها لݣاع حفايدها واحد بواحد واخا يكون دري تبقالو ذكرى من زهرة ورشيد..
رجال طباليهم كانو بعاد ولعيالات للي أغلبية قراب المنصة خديجة شافت يوسف ومو وختو داخليين وقفت باش يشوفوها ولكن ممشاتش عندهم هوما جاو عندها سلمت على يوسف بالوجه شاف فملاك وتبسم جا يسلم عليها بالوجه وهي تخرج عينها فيه وهو يرجع اللور جلسو معاهم ويوسف مشا قال شي كلمات لخديجة قريب ليها حتى ظحكت وهو مشا جهة درجاال.. بقاو لبنات كيتهامسو)
مريم: بحالا كان غيسلم عليك بالوجه
ملاك: ههه هانتي تشوفي
فاطمة: تي فهمي راجلك راه ماشي كولشي اوبن ماين
خديجة: ههه واخا
الغالية: (كدور عينها القااعة الناس الاكل كولشي كان هاي كلاص يعني هاد الناس مناسبين مع طبقة للي بحالهم حتى هوما شافت فزهرة للي كانت لابسة تكشيطة فالكحل زوينة ولكن سامبل وحتى وجهها مافهش نقطة دالمكيااج حتى الكحل مدايرااهش، درتها كولشي كان سامبل ولاوية عليها كاب Gucci ولكن غارقة ذهوبات مع شافت فيها تبسمت)
زهرة: مرحبا بييكم الآلة الغالية
الغالية: ترحب بيك الجنة ونعايمها الحبيبة.. هادشي غزاال تبارك الله
زهرة: عقبال لبنينة ان شاء الله
الغالية: فحيااتك احبيبة.. (شافت فخديجة للي كانت مقادة مجاتش كطوف بيها غير سلمت عادي وجلست حدا خوتاتها اما غيثة دغيا ندامجت مع لبنات.. تمات داخلة نعيمة فالعمارية هي وبنتها للي كانت فحال شي عروسة ومن موراها حميد للي أصر حتى هو يدخل بالعمارية كان كولشي زوين بلباس بالاكل ام حميد داكشي كولو كان زوين ومهيب خلات كولشي كيتكلم منين نعيمة بقات كتحني الجوق بدا يغني غير وصلو الشلحة للي برحو بيها.. نوضو خديجة للي كتشطح حدا الطبلة مبعدين على رجال وهي بدات تلوز وتشطح خلات الغالية غير مطرطقة عينها وغيثة حتى هي باغا تعاند وتعلم وكدير حركات خديجة عجبتها اللمة ديال لبنات ودخلت راسها معااهم)
وهانتا على الملعووقة.. وانا تنقول الولد مالو ضرب لسق... قول جايبها شيييخة!!!
(مابغاتش تعيق خديجة بزااف جلست ورجعت حمراا شافت فلغالية شوفة للي فشكل بحال كتحداها وكملاتها بابتسامة صفرااا قالبة وجهها كتصفق لبنات للي كيشطحو.. نوضو ملاك تشطح للي حتى هي كتعرف غير معندهاش الجرأة بزااف وفبلاصة تكون عاامرة بناس مكتعرفهمش غير شوية وجلست... كمل سبوع للي كان كولشي فيه زوييين وتمو خارجين الغالية دغيا سلمات عليهم ومشات لطموبيلة ديال يوسف جلست القدام مربعة يدها باش الا جات خديجة تمشي معاهم تجلس اللور، وغيثة للي مجمعة مع ملاك كتصيفط ليها تصاور...)
فاطمة: صافي مزيان احسن حاجة عرفتي انا غنهبط للقيسارية ياك جايبين بيجاماتكم
زهرة: شوفي مع خوتاتك
فاطمة: اه سولتهم جايبين انا نجيبلك شي بينوار ونجيب لينا كاملين حوايج لتحت غير كولون بتريكوه على حساب البرد راكي عارفة مولاي يعقوب كتخرجي سخونة منو وخاص لحوايج
زهرة: صافي ابنتي الله يرضي عليك متعطليش
فاطمة: لا متخافيش ها ولادي معاك اماما وانا درت معاهم ميقلعو لمولاي يعقوب حتى نمشيو كاملين....
الغالية: شنو تيقول هاد الولد ومجمعهم عليه داك الݣجݣيييج!! (مفهمت والو كتشوفو ضايرين بيه باين خديجة ورجال خوتها وهو بحال كيشرح حتى تم جاي متبسم قاطع طريق)
مغنمشيوشااااي خلاص اولدي!!!
يوسف: ياك قلت ليك قبيلة نمشيو لمولاي يعقوب
الغالية: خلاص علية ما فية للي يمشي لتماااك وصلني للدار نمشي لدار الحاج راه من صباح تيصونيو علية واقعة شي مشكل تمااك
يوسف: راه حتى الحاج دازو عند الواليد ومشاو لمولاي يعقوب نلحقو بيهم وهضرت حتى مع نسابي يمشيييو
الغالية: (تعصبت) ومعامن تشاورت!!!
يوسف: فاش نتشاور زعما على حساب اش!!!
الغالية: واش باغي تفقصني باااطل!! اولدي شكون قالها ليك انا منين نبغي نمشي لمولاي يعقوب ندي معايا (دغيا خنزر) نبغي نمشي بووحدي نكمد عظيماتي وانا مكالميااا نتا تتعرفني
غيثة: (طلعت فالطموبيل) حتى انا نمشي معاكم ولا نمشي مع لبنات؟! عفاك اماما خليني نمشي مع لبنااات
يوسف: اهاااه سيري مع لبنات
غيثة: بيييس يخليك ليلي احبيبي
الغالية: الله يا ربي هادو بغاو يفقصوني
يوسف: مفهمتش علاش مكبرة الموضوع راه عااادي.. مهم انا نوصلك وغيثة غتبقى معاي (شاف فيها) نشدو انا وياك طريق (حركت راسها متبسمة.... رجع عند نسابو للي رحبو بالفكرة رشيد ورجال بناتو ومرتو وبناتو اما خوه وسهام خاص يرجعو على حساب يحضيو الدار والقهوة.. توادع معاهم واخا كان مديرونجي شوية ورجع للطموبيل يديهم لفاس..)
نعيمة: انا منقدرش نمشي خالتي مريضة ومكاينش للي يشدلي زينااابة (بحزن) مصاالحش
زهرة: راني شفتها مسكيينة مريضة الا بغيتي ابنتي سيري مع خوتاتك انا نشد ليك بنتك ونبقى هنا حتى وتكملو ونرجعو للدار
نعيمة: اويلي لا سيري اماما تفوجي انا مرة أخرى ونمشي ها حميد ماشي
حميد: لا حنا نمشيو انا ويااك
زهرة: اوا ونتي؟!
نعيمة: مزال ايام الله طويلة ونمشي غير سيري حتى نتي سخني عظيماتك (توادعو مع نعيمة وعائلة راجلها للي استقبلوهم احسن استقبال وكولها فين ركب ورشيد لسق فزهرة للي كانت بغات تركب مع ملاك ومع حشمت من نسابها ركبت معاه وشدو طريق لمولاي يعقوب...)
ملاك: (حيت كولشي بطموبيلاتو ركبت خديجة معاها) داز سبوع غزاااال
خديجة: بزاااف حتى انا واقلة غيدوز شي عرس زويين
ملاك: غيفرحو بولدهم
خديجة: عرفتي مو محملاتنييييش ههههه
ملاك: ههه صراحة باينة عينيها عليك بحال القرطاس ههه
خديجة: وانا حبيتها من قلبي هه
ملاك: شوفي يوسف ماشي بحال مو (تفكرت انها حلفت متعاونها مرة أخرى. ولا تنصحها) ولكن نتي تعرفي حسن
خديجة: وكملي شنو بغيتي تقولي
ملاك: واش انا نوريك اخديجة نتي راكي خبرة فهادشي اما انا راه غير تنهضر وصاافي..
(بدلت الموضوع كيهضرو فسبوع للي داز وخديجة بقات كتعاود ليها على دار يوسف فين جات وشنو مفرش...)
وصلو من مور المغرب كما وصف ليهم يوسف يمشيو نيشان لوطيل ديال vishy حيت مرتابط بالمركز الحراري ديال مولاي يعقوب داكشي ديال VIP كانو فيه اصلاحات خطيييرة بين الأصالة والمعاصرة.. خرجو ماشيين مجموعين
يوسف: (صونا على خديجة) وي حبيبة وصلتو؟!
خديجة: اه واش نتا مزال معطل؟!
يوسف: مزال شوية مهم الا حداك راجل ختك دوزيه لية راه درت ريزيرڤاسيون ليكم كاملين (دوزاتلو راجل فاطمة كما كانو متافقين حيت كان ديجا خدم تماك عندو الصلاحية ديال ينقصولو 50 فالمئة من ثمن الحجز للي داخل فيها الشومبر الاكل وكولشي.. ليه ولعائتلو على ميجيب وراقو ويلتاحق بيهم دخلو لتماك رجال كولها كيحلف يخلص وصدق كولها مخلص على راسو ومرتو باش يخرجو من باب وااسع ملاك بقات كدور عييينها)
ملاك: الاخوان انا على من محسووبة
رشيد: ههه راني خلصت عليك نتي وختك بيت
ملاك: نااااري وكان مخلصش علية شي واااحد!!!
زهرة: وحنا نسخااو بالزين يخرج دوك الفلوس غير مرة طل عليهم ابنتي خرجيهم يتشمشو شوية
ملاك: ها ها ها اصلا كنديرها باش نهار نبغي الفيزا يعرفو الكونط عندي محرك
هههه
(بقات كظحك معاهم وهوما شادين فيها وحتى هي ماشية معاهم فالخط!! حتى كيبان ليها اورطيغا لابس سروال كيطمة والفوق عريان لاوي عليه فوطة غير شافها وقف مستغرب اما هي مشات من مور باها قبل ميجي عندها ويصدقوو فشي صدااع واخا هكاك تم جاي عندهم)
اورطيغا: السلام عليكم اممم نساب يوسف؟!!
رشيد: اه اولدي يوسف راجل بنتي كنتسناوه
اورطيغا: (رجع شاف فملاك للي عاطيااه بظهر) اجي ترتاحو على ميوصل الا بغيتي اسي رشيد الوالد وباين يوسف جالسين هنا فالقهوة كيرتاحو
رشيد: اه اه نمشييو عندهم (شاف فبناتو ومرتو..) كولها طلع ترتاح
ملاك: عطيني ساروت ديالي.. حم مزال معطيتيهلي (خافتو يقمعها قداامو ولكن مد ليها كااارت باش تحل ولمها كارت كولها هزت صويكها وللي تابعينها وليداتها اما ملاك بقات ماشية وكتلفت تشوف فاورطيغا للي دار ودارلها إشارة بشنوو كديري هنا.. دارت راسها مكتعرفوش وكملت طريقها)
مريم: شكون هدا؟!
ملاك: هدا صاحب يوسف
خديجة: ماشي غير صاحبو كان قالي كيجيييهم غير بالصح ريحة الشحمة فالشاقور
مريم: كتعرفيه املاك
ملاك: مكنعرفوش
مريم: هو كان جاي مقصدك وعين فبابا وعين فيك
ملاك: حيت يمكن كان كيشوفني مع يوسف بزااف وصاافي
خديجة: شوفي هدا بلا متسولي ملاك عليه حيت دايرين بحال القط والفار واحد مكيحمل لاخر
مريم: وعلاش
ملاك: (بدلت الموضوع) واش شفتو فاطمة ههه ناري راجلها مكيحشمش قالك بغا حمام مشروك مع مرتو ههه
خديجة: ناااري عنداك يوسف يديرها
مريم: علاش صافي!!!
خديجة: لا لا راه قلتلك حتى مور العرس هي حتى لمور العرس
مريم: ههه عارفااك قادة (مريم دخلت مع ولادها وخديجة وملاك شومبر
كانو ليشومبر غزالين مع إطلالة زوينة لابيسين للي برا..)
ملاك: (تلاحت فنموسية متكية) عيييييت بغيت غير جاكووزي يكمد لية عظاامي
خديجة: عرفتي عمرني عمت فهاد الجاكوزي
ملاك: حتى انا الله يخلف على الافلام وصافي ولكن دابا مشهيااااه كنحس براسي مسخسخة مزيااااان....
هزو حوايجهم جابت ليهم فاطمة لبنات خديجة وملاك دوبياس دالعومان ومريم ومها شورطات بديباردورات وهي غتعوم عريانة مع راجلها... مشاو لبلاصة ديال لعيالات كيعومو
ملاك: هدا ممخلطش!!
مريم: علاه بغيتيه مخلط
ملاك: لا ولكن بعدا نتلقاوهم فشي طريق
مريم: ههه بااز
زهرة: لقديم حسن كندخلو الصابون البلدي مخلط بالحناء وأداد والورد ونجلسوو حك حك والفوار كيخرج منا (معاجبهاش) هدا غير عوم وصافي متمااش حتى لمرا للي كتقول بارد وسخوون كتزيد تحليييه
ملاك: (مشات تخشات فالجاكوزي مرخية فيه كان فيه حتى هو ماء ديال العوينة ولكن مخلط بالما العادي نسبة الكاربون كانت أقل، سدت عينيها معرفت علاش جاها اورطيغا فبالها وهاد منين كان جاي قاصدها واخا قدام باها كيشوف فيها مرة مرة
حتى سمعت خوتاتها كيضحكو حلت عينها ضارت لقات مها كتصوطا فلابيسين تبسمت وهي كتشوف فيها ومن جهة أخرى كاينين شي بنات اخرين رجعت ترخااات تفكرت حمزة كانت سيمانة عامرة ملقاتش الوقت فين تكتائب ولا يبقى فيها الحال شافت منين وقتها عمر مكيناش بلاصتو يعني غير منين كانت فديك الوقيتة مزيرة ومع المشاكل لاحت راسها فيييه واخا لداابا داك الحب ديالو مكيجيهاش كذووب ولكن للي مخليها مرتاحة انها مفكرتش فيييه وهادشي خلاها فرحااانة اهم حاجة خاطرها مزيااان واخا كرامتها حست بيها تهااانت معاه الا كانت ضريييبة باش تعاود تيق فواحد مزوج يعني عتابرااتو غلط ديالها وتخلصت علييه حشات راسها بغات دير لقطة بحال ديال الأفلام وهو يزهق ليها لما جاافت جلست كتكح لما كيخرج من فمها ونيفها... جات عندها خدييجة كظحك عليها ضرب على ظهرها بجوج ضريبات عاد بدات كدير ليها مساج فكتافها زادت ترخاات محولة عينها كنوع من الرضى زكتسمع طق طق.. هزت راسها فيها) تخيلي تكون شي كاميرا كتصورنا وتبيعنا لبور**
خديجة: هههه غنتشوهو
ملاك: (مرخياااا) عرفتي الا رفعنا عليهم شي دعوة شحال ناخدو فيها دلفلوس؟!
خديجة: اوا والشوهة؟!
ملاك: واااا مكناش عارفييين ونيتنا زوينة مهم ربي عارف نيتنا بغينا غا ندوشو ماشي شي حاجة قبيحة
خديجة: هههه عمرك جيتي هنا؟!
ملاك: من شحال هادي (وقفت) نمشي حدا ماما (شافت فختها للي كانت ملطة) مزيان هاكا تهلاي فراسك متعرفي امتى تجيك الضربة
خديجة: هههه (جلست هي بلاصتها اما ملاك عاجبها الحال لابسة غير دو بياس وشحال كيعجبها احساس تبقى عريانة مجرباتش فالبحر بعدا تجرب هنا.. مشات جلست حدا لابيسين دايرة رجليها فلما ولكن كان طاااااايب وريحة الكبريت عاطية منو) اخخخ حح شحااال طاايب!!
مريم: هبطي عومي
ملاك: مكنعرفش
مريم: (كتعوم على ظهرها) هادي زݣلتيها (شافو فمهم للي كانت حوتة فلمااا مخليينها على خاطرها وحتى هي كتفدي لغداايد) فاطمة قلبات علينا
ملاك: كتعجبني هي وراجلها عايشين الحياااة
مريم: (بتنهيدة) والله سعداااتها اما راجلي فاش كيتزاد علينا شي واحد كيتلف ههه كيردني ختو
ملاك: ولكن حنييين فيك غير مكيعرفش يعبر ليك وصاافي
مريم: حتى زين مخطاتو لوولة قوليلي كيف جاتك ماين يوسف؟!!
ملاك: (خرجت عينها حيت شافت غيثة داخلة) حم غيييثة
مريم: (تبسمت معاها ومشات كتعوم مع مها للي لقات راحتها فالعومان)
غيثة: (حطت حوايجها كتشوفها ملاك باااينة كتعتاني براسها ودو بياس كانو واعرين وحتى طايتها زوينة ضعيييفة من جناب وعندها ليهونش الكرش خارجة ولكن شوييية ممعيقاش وعندها لفخيضات جلست حدا ملاك وحتى هي تقرست من لما للي سخون) والله كنت محتجااها فيناا هبا خديجة ؟!!
ملاك: فالجاكوزي
غيثة: مزيااان (وقفت وهي تصووطا ملاك وصلها غير لما على وجهها متبعاها بقات كتعوم مع مريم وزهرة وملاك هبطت ماشية غير مع الحااافة وكتحاول تعلم تعووم...)
غيثة: خالتي أمينااااااا (شيرت ليها باي باي من وسط لابيسين.. شافت فزهرة) خالتي هادي مامات اورطيغا
مريم: اورطيغا!!
غيثة: زعما مراد.. امم هادي مرت عمي بنسليمان (لوخرا تسوطات ملاك كتشوف مكاين غير للي كتسوطا وهي شادة غير فلحديد معرفتش شكون هاد لمرا بقات كتحاول تعلم وهي مرخية وكتهز رجليها تخبط فلما وغير كتعيا وشي عومان مكاين...)
بقاو لعيالات مجمعات مينا عرفت براسها وبقاو كيتعاودو ويهضرو، حتى خرجو كل وحدة لبست بينوار بيض للي موجود تماك وبقاو جالسين دخلت ليهم سرباية لويزة للي طلبو مريم مشات فحالها حيت صونا عليها راجلها بقات ملاك وغيثة وخديجة جالسين مجمعين خديجة كلامها قلييل مابغاتش تبلزها باش ميتحسب عليها واالو..
غيثة: صافي كملت لباك بقيت فالجامعة غير تنمشي وصافي معجبنيش الحال تماك درت ديبلوم ديال موديليست خديتو العام للي فات حتى نشوف شنو ندير تالفة و حاايرة مكرهتش ندير شي مشروع ديالي
ملاك: متبقايش جالسة خدمي وخودي تجااارب باش حتى الا درتي مشروع ديالك تكون عند ديجا تجربة
غيثة: عݣزت ههه ولفت نعاس والخروج ومتابعني واالو
ملاك: واا الراحة زوييينة ولكن مدام عندك ديبلوم زوين مضيعييهش
خديجة: حتى انا فاش دقت الراحة مبقات عندي ݣانة لشي قراية ولا لشي خدمة
ملاك: بلعكس الراحة هانتي مرتاحة ولكن حاولي تكملي فلفاااك اصلا دابا نتي فاس يعني ساهلة لييك تقراي تماك ماشي ضرووري تحضري ݣاع المحاضرات مهم تكوني فالامتحانات وعلى شحال ما جبتي داك الإجازة
غيثة: اه بالصح وحتى خويا يوسف مغيكونش عندو شي مشكل بلعكس حسن عواانك معاه ههه شتي دوك الكتوبة للي عندو فالدار غتقرايهم كاملين
ملاك: ههه وايلي!!
غيثة: هههه أنا راه تيحمقني وعدوووه يناقش معاك شي حاجة ومتكونيش عارفااها المرة الأولى غيقولك قراي التانية التالتة كيبدا ينݣر ينݣر حتى يكرهك فراسك وبالسيف تقراي باش مرة أخرى يبقى ينااقش معاك
خديجة: مقالي واالو على هادشي
غيثة: ههه مبغيتش نخلعك ولكن غير ديريها منك رااسك (تقاداات معاها فالجلسة) شتي مغاديش تجلسي مع العݣوزة يااك ولكن غيكون عندك يوسف الضوبل دالضوبل تريبل دديال العݣوزة
خديجة: ههه علاش؟!
غيثة: انا تيجيني صعييب الا كنتي فحالي مرخية ومعنديكش مع البروتوكول ديال الماكلة وجمييع وداك تبوزييق ديالو
ملاك: لا لا خديييجة حارة من هاد الناحية نقية بزااااف
غيثة: ماشي قضية حارة ولا نقى هو.. تأ غير غتخليوني نبقى نهضر فخوويا وصاافي ههه
خديجة: قولي قولي عفاك
غيثة: مثلا مثلا (كتوريها هزت كاس ديال الما) هدا مخاصوش يتحط بلا صينية ديال لما (هزت موشوار) هدا خاصو يتحط مطوي حدا الطبسيل، اه ولبلا مخاصش يكون مجلخ نقطة متكونش خارجة على سطر ههه (كتعاود وكظحك) وتكوني تتاكلي ممنوع تهضري حتى تمضغي وتصرطي وبزاااااف الفنجان خاص تكون يدو على ليييمن هههه وبزااف
ملاك: اه اه انا عييت غير وانا كنتخيل هههه ولكن لاحظت فيه هادشي
خديجة: واااا هادشي عادي، يمكن!!
غيثة: الا كنتي بحالو غتجيك عادي نااااري كان تيعايرني بيه غيولي يعارني حتى بيييك ههه مشييت فيها (بقاو مجمعين كيظحكو حتى ناضو هي مشات لشومبر ديالها ولخواتات مشاو لشومبر من بعد ملبسو طلبو لعشا للي كانو جوج بيتزاات...)
ملاك: (كلاو وكل وحدة شدت بلاصتها، كانت متكية وكتسمع خديجة كترومانسا مع يوسف وصلو شنو لابسة ما لابس تبسمت وشافت فختها للي زاوݣتها مظحكتش.. ناضت ملاك من تماك هزت داك الكوڤر لوااتو عليها حلت باب البالكون ورجعت سداتو تخلي لوخرا تهضر على خاطرها وهي بقات مستمتعة بداك الجو كان بارد ولكن ممتع وتزاد بجمال الاوطيل وضواوو للي فيه والطبييعة بقات كتشوف شي جوج جالسين عاطيينها لتشلقيم حدا لابيسين وفنفسها
"هوما للي ميجيهمش البرد"
حتى سمعت)
اورطيغا: أرجووع الله البنت!!!
ملاك: (كانت متكية وكتسمع خديجة كترومانسا مع يوسف وصلو شنو لابسة ما لابس تبسمت وشافت فختها للي زاوݣتها مظحكتش.. ناضت ملاك من تماك هزت داك الكوڤر لوااتو عليها حلت باب البالكون ورجعت سداتو تخلي لوخرا تهضر على خاطرها وهي بقات مستمتعة بداك الجو كان بارد شوية ولكن ممتع وتزاد بجمال الاوطيل وضواوو للي فيه بقات كتشوف شي جوج جالسين عاطيينها لتشلقيم حدا لابيسين وفنفسها
"هوما للي ميجيهمش البرد"
حتى سمعت)
اورطيغا: أرجووع الله ألبنت
ملاك: (ضارت كتشوف لقاتو اورطيغا لابس مزيان حتى هو وبيناتهم شي متر ونص بيناتهم غير فاصل ديال لحديد) شنو!!
اورطيغا: شنو نتي؟!
ملاك: شنو انا نتا للي شنو؟! (تلفت) وشنو هاد رجوع الله شنو مالك شنو لقيتني كندير (خرجت عينها) كنتفرج فالطبيعة
اورطيغا: (لعب بلسانو فوسط فمو كيتبسم) الطبيعة اربيعة ياكمااا!!
ملاك: (جات بغات دخل)
اورطيغا: ههه صافي صافي اجي
ملاك: (رجعت مخنزرة)
اورطيغا: طالبة عليها
ملاك: (ميقت فيه ورجعت كتشووف بعيد حتى شعل لبيل فتيليفونو ضوا فيها مع الدورة فيه عمااها متبسم على منظرها وطفا لبيل) بعدا مخليتي البرد منين يدوز ليك
ملاك: (عيات تجمعها وزلقت ليها) هه
اورطيغا: (هز سنيكرز من جيبو مدو ليها شداتو وكانت بحال مترددة) خودي
ملاك: شكرا
اورطيغا: (كان كياكل وااحد بقا كيشوف فلابيسين وكان صقييير هي بقات كتاكل حتى شافت شي واحد خرج حدا اورطيغا) البرد عليك لا!!!
ملاك: ها!!
اورطيغا: سيري دخلي راه لبرد
ملاك: انا عاجبني نبقى هنا
شريف: ملاك صاڤا!!
ملاك: الحمدلله
اورطيغا: (كتكرهو منين كدير داك الصوت، قوس عينو فيها)
شريف: كاين شوية دالبرد
ملاك: (تبسمت) اه كااين
شريف: اوا كيف غادا مع الخدمة وشنو درتي فلفااك؟!
ملاك: مزيان الحمد الله ولفاك باق...
اورطيغا: (شاف فيها مخسر وجهو جاه الحوار حاامض) واقلة هداك باك للي تيعيط ليك..
ملاك: (هزت حواجبها بجوج مباغياش تقلب وتبان مفافية زادت غطست راسها فداك الكوڤر باها غير غيشوهها الا لقاها خارجة مجمعة ومع جوج عزارة) حم واقلة شي واحد كيعيطلي (بلا متلفت دخلت وسدت من موراها الباب)
اورطيغا: انا عييت غندخل نتكى... (تبعو خوه كولها شد نموسيتو وتكاااو...)
اصبحنا واصبح الملك لله
كولها فاق على خاطروو وللي خرج مع راجلو وللي هبط يفطر.. ملاك فاقت مسخسخة ملقاتش خديجة حداها بقات كتشوف فسقف لمدة تفكرت اورطيغا تبسمت هزت تيليفونها شعلت الكونكسيون لقات ميساج من عند حمزة غووبشت مدخلتش ليه قرات لميساج من لفوق "خاص نهضرو ضرووري"
سير **** (بلوكاتو من الواتس ومن التيليفون من الفايس الانستغرام ومسحات نمرتو باش تهنا فخطرة اما باش تحن فيه مرة أخرى مستحييييل احساس واحد للي عندها دابا اتجاهو هو الكره..
دخلت الانستغرام كتفرج حتى طلعت ليها تصويرة حاطها يوسف فيه اورطيغا وشريف باينة مصورينها لبارح بتلاتة عريانين ولكن باين غير شوية من كتافهم ووجههم وفيهم قطرات ديال لما بقات كتزومي فشريف ورجعت كتزومي فاورطيغا حتى دخلت للكونت ديالو كتقلب اخر تصويرة حاطها كان بلا ديال سباكيتي بكروفيت ولكن طريقة تصاور كانت زوينة واحتراافية وطبق كيشهي)
هاد زمر كيعرف يطيب حسن مني.. عليها البنات مݣجݣجين علييه (عوجت فمها) متماااااش اصلا خاااايب جووع مافيه ميتشاااف...
(خرجت من الانستغرام وحطت التيليفون ناضت مشات للحمام قضات روتينها توضات ومشات صلات رجعت للحمام حيدت درت حياتي للي نعست بيها وطلقت شعرها للي كانت مشنتف شوية من لما ديال الكبريت بقات كتشوف فلمرايا شحاال وهي تخرج عينها وقربت كتر بانتلها فارقة شعرها ولقات شييبة)
اويييييلي شرفت!!!
اويلي مزال حتى متزوجت!!!
اويلي مزال محبيت متحبيت!!!
اويلي مزال حتى مدرت شي برهوش!!!
(بغات تقييسها وتفكرت كلام مها الشيب مخاصوش يتنتف ولا غينتاشر بزااف بقات كتحسر على حالتها والبكية فيها مابغاتش تقبل راسها انها كتشييييب....)
يوسف: (كانو كيفطرو بجوج واخا العائلة مجموعة ولكن بغا يبقى معاها بوحدهم كيهضرو فالدار شنو يديرو وشنو يسبقو حتى شاف باه دخل شير عليه) معليش يجي الواليد!!
خديجة: اويلي واش عاد كتسولني (شافت فباه متبسمة غير وقف حداهم ناض يوسف سلم عليه وحتى هي وقفت كانت بغات تبوسلو يدو وهو يهربها) سلام عمي
يوسف: (فهاد اللقطة تفكر ياقوت فاش كانت كتسلم على باه بحال كتسالم مع شي صديق.. تبسم) جلس معانا
اب يوسف: الله يرضي عليك ابنتي.. غير خلييكم وخودو راحتكم
خديجة: لا لا جلس اعمي عفاك نفطرو مجموعين
اب يوسف: معليش ابنتي ايام الله طويلة نتوما عرساان جداد خودو راحتكم... (تبسم معاهم ومشا وهوما جلسو.. مشا لبوفي وصاهم شنو يجيبو ليه وبعد على ولدو باش يجلس فراحتو)
يوسف: بلا متحتاجي تسلمي على الواليد هكاك
خديجة: معرفت انا تصرفت عادي علاش عيب؟!
يوسف: لا لا بلعكس عجبني الحال والله ولكن مبغيتكش زعما متكلفيش راسك
خديجة: ممكلفاش عادي ياك هو بحالو بحال بابا عادي عندي اي واحد فالعمر ديالو كنسلمو عليه هكاك
يوسف: (تبسم) بالصح
خديجة: (شافت ختها وراجلها وولادها حتى هوما دخلو جاو سلمو عليهم ومشاو) حقا علاش مجاتش خالتي؟!! وكان جات حتى هي تفوج داز لبارح غزاااااال كانت ناقصانا غير هي
يوسف: الوالدة!! كانت عيانة شوية وبغات ترتاح
خديجة: خسااارة مسكينة تشهيتهالها، لبارح تجمعنا كولنا حتى مامات صاحبك شنو كتقولولو فسمية؟!
يوسف: اورطيغا!!
خديجة: اه هو نااري مو حلوة غزالة غير كظحك قتلاتنا بالظحك مسكينة عرضات علينا وكتحلف غزالة ديك السيدة
يوسف: بالصح لالة أمينة مزيانة
خديجة: (تبسمت بقاو ساكتين) مالك!!
يوسف: والو..
خديجة: اممم.. (بقات كتاكل وهو غير شاد تيليفونو كيقرا القرطاس للي صيفطاتلو مو.. وهي معجبهاش هاد السكوت ديالو علاش سااكت هو للي خاصو يهضر حتى الابتسامة كتحسها بزز منو.. شافت فمها وباها ومريم وراجلها وولادها داخلين حتى هوما شيرت ليهم) يووسف
يوسف: اممم (هز عينو فيها)
خديجة: بقا نتا مشغول مع تيليفونك انا نمشي نسلم على ماما وبابا
(ياله جا يهضر ناضت مشات عندهم وهو وقف باغي يتبعها، مسح فمو بالموشوار و مشا عندهم حط يدو من مور ظهرها كيسلم عليهم وكما العادة صواب والكلمة الحلوة)
يوسف: بالصحة والراحة سبقناكم فالفطوور (شاف الحاج بنسليمان وومينا جايين وحتى باه تم جاي من الجردة جلسو مجموعين استئذن ومشاو عندهم مسلمين عليهم)
الحاج: فااين مراد وشفيق
يوسف: يقدر يكونو مزال ناعسين، نخليوكم (جر خديجة وتمو خارجين برا) علاش نضتي قبيلة هكاك؟!!
خديجة: شوف نتا للي كتبقى غير سااكت
يوسف: جات لحظة وصافي
خديجة: وحتى انا جات لحظة ونضت
يوسف: مكاين لاش هاد العناد اخديجة
خديجة: ماشي عنااد ولكن نتا للي من شحال هادي كتقول امتى نتجمعو ونجلسوو ونهضرو, هاحنا تجمعنا!!!!
يوسف: متبقايش تكوني متسرعة اخديجة
خديجة: (بقات سااكتة هز يدها باسها شافت فيه)
يوسف: وصافي ازين ديالي اخر حاجة نبغي هي تقلقي مني...
غيثة: (مع فاقت قدات شعرها ودارت ميكاب خفيف لبست كيطمة قطنية مزيرة مع سبرديلة طالعة رشت بارفان ديالها لبست جيلي وهزت تيليفونها وخرجت من الشومبر سداها وتوجهات نيشان لشومبر ديال اورطيغا دقت المرة الأولى والثانية حل ليها شريف.. تبسمت)
صباح الخير
شريف: اهلان اهلان بلالة غيثة
غيثة: (تبسمت كيعجبها للي يقولها هاكا وأصلا هاكا مولفة من عند كولشي) كيف صبحتو؟!
شريف: مزيان الحمد لله، ونتي؟!
غيثة: (دارتلو إشارة زعما راها نشيطة) ههه بيخير
شريف: بالصحة والراحة
غيثة: فينو اورطيغا؟! مزال ناعس؟
شريف: اه مزال ناعس مبغاش يفييق
غيثة: امم وميهبطش يفطر؟!
شريف: (تم خارج وجر لباب من موراه) حنا نمشيو حنا نفطرو
غيثة: ومغنفيقوهش؟!
شريف: حتى يفييق شوية ويهبط عندنا (جرها معاجبهاش الحال ولكن مخاصهاش تبين.. كما كان الحال شريف راه صاحب خوها!! هبطو لتحت جلسو مع العائلة للي السرباية كل مرة كيزيد طابلة وكراسة..)
~~~~~~~~~
حمزة: (شاف فتيليفونو كانت قرات الميساج ولكن مجاوبتش شوية كيشوف التصويرة للي دايرة مبقاتش باينة رجع صونا على نمرتها عرفها بلوكاتو.. كان متوقعها من عندها حط التيليفون دخل عند مو كانو حاطين الفطور وكاينة حتى مرتو للي لدابا مكيهضرش معاها جلس مبعد عليها كيفطر بهدوووء حتى واحد مكيهضر معاه حيت ولا على سبة وغير معصب وخاصو معامن يداابز)
نجية: ولدي خاص تمشيو لطبيبة على حساب لحمل
حمزة: (لا رد)
اب حمزة: فوقاش غتكمل السربيس ديالك
حمزة: مغنكملش كاين سطاج وبغيت نمشيلو
اب حمزة: عاد كنتي فيه
حمزة: (شاف فيه بنظرة تحدي) وفينما كان شي واحد غنمشي فيه..
اب حمزة: وعلاش؟!
حمزة: حيت بغيت (لوخرا حطات الخبز وناضت من حدااهم ممسوقش ليها.. وقف جبد من بزطامو 500 درهم حطها فوق الطبلة من جهة مو) حدا القهوة ديال عمي رشيد راها كاينة تماك طبيبة سيري معاها ولا تمشي بوحدها ولا ضبر راسها
اب حمزة: (كيشوف فولدو للي تسيف مبقاش كيما كان ومبقاش حتى داير ليه اعتبار كما كان..)
حمزة: (خرج من تماك مشا لبيتو هز صاك جمع فيه شي حوايج وهي دخل أميمة) خرجي من هنا
أمينة: غير نهضرو احمزة
حمزة: مبقات فيها هضرة (هز صاكو وتم خارج من الدار شاف فسطح دار ملاك عارفها مكيناش من مو مكرهش يتلقاها ويهضرو يشرح ليها ويفهمها...)
أميمة: كتعاملني بحال الا بززت عليك هادشي
حمزة: اول حاجة سولتك ديك الليلة واش كتشربي داك الق*** شنو قلتي
أميمة: وراه بالصح والله مكذبت (هز صاكو وزاد مباغيش يسمعها ولا يشووفها)
حسابلك غنخليك ترجع لديك نص بناااادم والله متبقى فيها على هادشي فين راني عاايشة!!!!
ملاك: (كانت رجعت تنعس مفقوسة مغبونة فيقوها غير بالصونيط ناضت لبست حوايجها دارت فولارها كتفكر ديك الشيبة للي لقات كتفقص، مدارت والو لوجهها هزت تيليفونها وسوارت وخرجت هبطت لتحت لقاتهم تفرقو من غير مها ومينا للي جالسين كيهضرو جلست من بعد مسلمت عليهم) ماما فين لبنات؟!
زهرة: مريم وراجلها مشاو لازرو وخديجة مزال مرجعت هي وراجلها وفاطمة هاديك مكتشدش ههه
أمينة: خديجة مزال جديدة ݣاع مترجع ليك دابا هه
زهرة: هه الله يهنييها..
أمينة: اااح شحال كنت نتمنى تكون عندي شي بنيتة
زهرة: زوج لولد يولد ليك لبنات راك مزال صغيرة وتربي معاه
أمينة: احياني على داك الولد عندي عدووه تجبديلو شي زواج تعقدلي مسكين راني عاودت ليك واش جرا لينا
ملاك: (خاصها تجيب لفطور ولكن غير سمعت سيرتو غتجيد مابغاتش تزݣل هاد الحوار هزت يدها للسرباي تم جاي عندها خدات فطور وبقات طالقة ودنيها)
زهرة: ها باش لولاد يبقاو بعاد على مشاكيل لكبار ولكن كتابت عليكم اختي امينة لا هو كبر مرتاح وحتى نتي دازت عليك
أمينة: (تنهدت وزفراااتها) ارااسي ومداااز.. وباقي ههه
زهرة: ربي يفرجها من عندو..
ملاك: (مقالو حتى جملة مهمة من غير دازت عليه للي فهمت وصاافي) مزال غتحممو؟!
زهرة: انا مبقالي جهد ابنتي وعاد خاص رجعو خليت خوك
ملاك: (جابلها لفطور وعوجت كمارتها من ديك خوك)
أمينة: وعلاش مجبتيهش معاك
زهرة: مزال صغير مسكيين خليتو لمرت حنينو تقابلو
أمينة: شحاال عندو
زهرة: شي شهرين وشي حاجة
أمينة: راكي عاد والدة
زهرة: لا هو ربيبي ماتت مو بقا عندي (ملاك هزت بلاطوها ومشات لطابلة اخرى قبل متنوضها مع مها) غير نتي ولدك مع زواج وانا عندي هاد شنيولة مع خوها
أمينة: واش كان مزوج وحدة أخرى؟ ومال هاد راجلك عور ولا مكيشوفش؟!
زهرة: ههه هاديك قصة أخرى!!
أمينة: ݣولي علاه شنو تابعنا حنا.. (زهرة ماشي من عادتها تعاود البراني واخا يكون حتى قريب ولكن فهاد الموضوع كانت محتاجة تفرغ وتعاود حيت من لداخل ديالها مظغوطة بزاااااف وخاصها تخرج لواحد معايش معاهم تعاود وتخوي قلبها كما دارت حتى أمينة للي سرسبات ليها كولشي....)
~~~~~~~~
رشيد: انا غنديها فينما بغات باش نخليها ابنتي بوحدها لا
فاطمة: ولكن أبابا راه واعدناها
رشيد: انا للي عارف ابنتي علاش مخاصهاش تبعد على عيني نديها فين بغات نبقى تابعها من اللور ولكن باش تبعد لا راه متعاودو تشوفها لا نتوما لا انا نخااف عليها
فاطمة: (معرفت متقول ليه) وا شوف هي شنو تقول أبابا
رشيد: يكونو خير ابنتي غير براكة (بحزن) متزيدو تعمروها علية
فاطمة: والله مكنعمروها حنا بغيناها غير ترتاح قبل ميخرج فيها شي مرض
رشيد: (حرك راسو باه... وتمو داخلين... باش كولها فين غيمشي....)
اورطيغا: (ناض من نعاسو كان محتاج هاد الحمام بزاااف حس بعظااامو تقاادو وخفافو علييه شاف فالساعة كانت 11 من 9 وهوما كيصونييو علييه د الحاج أمينة شريف غيثة... ناض دار روتينو الصباحي صلا صلاتو لبس مزياان دار كاسكيط والقب الفوق وخرج هاز التيليفون) فييين
شريف: (كانو خرجو يتمشااو فالارجاء) حنا خارجين
غيثة: فاق؟! عطيهلي
شريف: هاك غيثة (عطاها التيليفون)
غيثة: من قبيلات وانا تنصوني عليك!
اورطيغا: ياله فقت ازين
غيثة: اممم وشنو غدير دابا؟!
اورطيغا: غنفطر من موراها غنمشيو فحالنا
غيثة: صافي واخا، مهم أنا نركب معاكم زعما غير باش نخليو العرسان ديالنا على خاطرهم.. بسلامة (ردات ليه التيليفون) كملي حيت هي قبيلات صونات علية قالتلي زعما باش نهضر معاك من تيليفوني ونحطك امام امر الواقع مبغيتش حتى نقولهالك
شريف: مزيان منين مدرتيهاش
غيثة: واش صافي متصالحووش؟! نتا وخويا تفارقتو مع صحابات دقة وحدة
شريف: المكاتيب ولكن هو بعدا دابا طاح على بنت الناس وعائلة مزياانة
غيثة: اه بالصح المهم يكون مرتاح معاها عقبال ليك حتى نتا
شريف: ونتي منفرحوش بيك
غيثة: (زفرت بتيسيمة) دوك للي تيجيو معرفت ماااا متيعجبونييش
شريف: وعلاش؟!
غيثة: انا مكرهتش شي رااجل للي نكون معاه وحاسة بيه غيحميني ديال بالصح يعني يمووت على قبلي متتهمنيش المادة قد ميهمني يكون رااجل
شريف: اممم لالة غيثة كبرااات
غيثة: ههه غير نتوما للي حاݣريني
شريف: لا لا محاݣرينكش ان شاء الله مزال يجيك للي تبغي خااطرك
غيثة: ولكن يوسف متتعجبو حتى حاجة تنديرها ورجع تيريكلتمي على كولشي حتى لباسي ومع صحباتي واصدقائي وحتى الخروج ودخوول
شريف: هو من خوفو عليك شتي يوسف قيسو فعينو ومتقيسوش فغيثة
غيثة: (تبسمت) وحتى انا تنبغييه ولكن راه رجع تيقولي عمل الفولار
شريف: ههه مزيااانة فكري فيها
غيثة: شريييف حتى نتا!!
~~~~~~~~~~
اورطيغا: (داز خدا فطورو زائد ووصا على جبانية ديال البيصارة و4البيضات بالخليع ومشا جهة ديال مو حنا باس راسها) زييين
أمينة: هدا هو اختي زهرة ولدي
زهرة: تبارك الله
اورطيغا: (من بعيد) السلام عليكم خالتي
زهرة: عليكم السلام اولدي
أمينة: هادي ماين خديجة مرت يوسف
اورطيغا: مشرفين اخالتي
زهرة: الله يبارك فيك اولدي
أمينة: واش هاد نعاس احبيبي؟!
اورطيغا: نهار العطلة هدا الوالدة، اش نفيق ندير مع النبووري!!
أمينة: وسير فطر احبيبي باش نمشيو (مشا شاف ملاك جالسة حدا الزاج كطل على لابيسين دار للسرباي إشارة يجيبو لطبلتها مع جلس حداها كانت خاشية فمها خبز فيه البيض والأمهات طرطقو العينييين)
احااي!!
ملاك: (بقات كدور عينها وشاف فيها زعما شنو!!)
زهرة: (حاضية لباب الا دخل باها مكاينش للي يفك ومغيحشم من حد وهو غير حدا لباب كيهضر مع فاطمة)
أمينة: (اخر حاجة تبغي هي تعايب مع هاد الناس للي عجبووها ورتاحت معاهم وعارفة ولدها غير زااهي وكاع لبنات ديالو..)
ملاك: (كملت لمضيغ ودوزت جغمة بأتاي شافت فاتجاه مها للي دارت ليها إشارة بعينيها مخرجاهم تنوض من تماك) يييخخ غير محرمها علية
اورطيغا: (تبسم فاهم لبلان وأصلا عارفها غتنوض) بالصحة ازين
ملاك: يوحل ليك فركابي
اورطيغا: (غمزها) يفوت غير المعدة ويوحل فينما بغاا (خنزرت فيه مغددة وزادت مشات خرجات لبرا مشابعااش دورت عينها كتفكر الحساب على باها اصلا، عيطات لسرباي دموندات كريب بالشكلاط وعصير مونغ يجيبو ليها برا.. اما هو بدا ياكل حتى سمع ميساج قلب بيدو كانت تحت سربيتة من جيهة فاش كلات ملاك مسح يدو وهز التيليفون مدايرا ليها لا الشيمة ولا الكود دخل لميساجات نيشان كيمضغ قراه)
"غنجي لعندك لفاس، بغيتك غير تعطيني فرصة نشرح ليك"
اورطيغا: (لوا شنايفو وخرج من لميساجات حتى جاه اخر)
"براسي مكنت عارف والو وكل كلمة قلتها ليك كانت خارجة من قلبي، كنبغيك املاك غير سمعيني وعطيني فرصة غنشرح ليك كولشي وغتفهميني"
اورطيغا: (تبسم طاانز)
باقي الصاط شي حد تيتعنب هاكا!! طيحتو الدل علينا..
(مسح دوك الميساجات وبلوكا ديك النمرة ورجع التيليفون فين كان مكمل فطورو حتى شافها جاية مخنزرة مقصدااه مهضرش معاها وهي خدات تيليفونها ورجعت بلاصتها كتصور داكشي لي دموندات وهو دار كيشوفها دايرة جلسة تصوير للعصير ولكخيب تبسم وضار مكمل فطورو...)
~~~~~~~~~
الغالية: (بغات تنفارد بخديجة ووالو صونات على ولدها يجيبها عندها ومبغاش بحجة خاص تمشي مع واليديها عندهم شي شغل رجعت صونات على بنتها للي كانو راجعين فطريق) فين خاااك؟!!!!
غيثة: (طالع ليها الدم مخلاهاش تركب مع اورطيغا) ها هو صايݣ
الغالية: جاية معاكم هاديك؟!
غيثة: خديجة!! لا هوما مشا لصفرو
الغالية: (زادت تفقسات) مزيااان (قطعت وبقات سير واجي مابغاتش تصرط ليها مطلقة وكبيرة فالعمر وعاد لسانها طويييل حسابلها غتغلبها بالهضرة ساعة حتى لوخرا بخبيزتها ودافعة كبييير)
علاه مالها متكون بخبيزتها وهي مطلقة وداية وجايبة فالوقت ايييييه اولدي شحال رغبتك وهانتا غتفهم علاش محملتهاااش من اللول!!
اب يوسف: تهلا اولدي راك طحتي فنقرة نسااب الله يعمرها داار
يوسف: بالصح
غيثة: خوتاتها كولهم حلوة وحدة تنسيك فلوخرا واكترية مريم
يوسف: متنعرفهاش بزااف انا تنعرف غير ديك البرغووتة
غيثة: ههه رجعو دابا عندك جوج برغوتات ولكن من هنا بلاصتي متاخدها حتى وحدة
يوسف: لا لا نتي لالة غيثة بووحدها وحتى ملاك عندي عزييزة (شاف فباه) فيلسوفة تتمشى على رجليها
اب يوسف: لا تبارك الله البنات بعقلهم وباهم رزييين
غيثة: شنو زعما انا متتشكروش فية ݣاع هاكا!!
يوسف: ههه بدينا!!
غيثة: اوا شوية هاكا وشوية هاكا
يوسف: نتي راك بزااف منهم ݣاع ههه سمعت الحاج بنسليمان تيعرضهم
اب يوسف: اه عرضهم عتاذرو قالو مرة أخرى
يوسف: يعني حتى هوما بغاهم؟!!
اب يوسف: معلووم.. ناس فالمستوى
يوسف: سبحان الله كولشي بغاهم الا الوالدة صباح صيفطاتلي ميساج دوختي مفهمتش مالها معايا الا بقات هاكا انا بناقص علية من داك العرس للي يكون مخبع فيه السم مع العسل، من ديبااار انا مابااغيش
اب يوسف: دابا نهضر معاها اولدي
يوسف: الله يهديها وخلاص....
وصلو لصفرو دخلو مسخسخيين زهرة نيشان مشات عند أنير توحشاااتو بقات كتراري بيه وملاك غير مخنزرة فيها لدابا مقرباتوش.. خاصمات عليهم سهام حيت حتى هي بغات تمشي لمولاي عقوب ووعادوها يعاودوها على حسابها مرة أخرى..
خديجة: (دخلت بيت مها تجاوبو واخا هي تماك حيت مقدرتش تطلع لسطح وخصوصا مخاصش البرد يقيسها..) يوسف!!
يوسف: حبيبة كيف وصلتي؟!!
خديجة: الحمد لله ونتوما وكيف لقيتو خالتي الغالية
يوسف؛ صاڤا الحمد لله صرااحة كنا محتاجين هاد الحمام
خديجة: ااااه
يوسف: المرة جاية نمشيو الراس فالراس باش نحكلك وتحكيلي
خديجة: ههههه اممم
يوسف: حداك شي واحد
خديجة: اااه
يوسف: حقا ملاك غترجع لفاس؟!
خديجة: اه غدا قالت لينا غترجع مزال عندها الخدمة تماك
يوسف: مزيان باش متقوليش لية لااااا وكدا
خديجة: ههه علاش؟!
يوسف: وشكون يعمر الدار غتبقاي مع خييتك منين نكمل الخدمة نخرجو نشوفو داكشي للي نااقص
خديجة: اممم وقولها لبابا
يوسف: اه.. اه ضرووري ناخد إذن نسييبي وانا نقدر ندير شي حاجة بلا بييه
خديجة: ههه بحالا كطنز
يوسف: ههه لا ولكن ههه عاجبني هاكا مزيان صرااحة هاكا غتربيلي بنتي وولدي ياك ياخدو مني الإذن اكترية البنت وديرلي قيمة
خديجة: (تبسمت) بجوج بينا نتعاونو
يوسف: اااه ولكن نتي بزااف نتي غتكوني معاهم فالدار كتر مني انا
خديجة: ان شاء الله
يوسف: اوا شنو تديري
خديجة: والو جالسة حدا ماما وأنير
يوسف: زوينة هاد سمية شلحة!!
خديجة: اه
يوسف: شنو تتعني؟!
خديجة: بحال تقول بالعربية أنوار ياك أماما (حركت راسها باه) بحال تقول القمر ولا الهلال النور بحال هاكا
يوسف: طرباتني
خديجة: اممم
يوسف: ياله حبيبتي حتى تكوني بووحدك نكملو فالواتس.. (قطع معاها وهبط من بيتو كانت مو جالسة مع ختها مهضرش نيشان مشا لبلاصة التلفازة جالس كيتفرج)
الغالية: (بغات تصالحو)
ولدي خاصك تمشي باش دموندي على القاعة ماشي حتى يقرب العرس ويبقاو يتفرعنو علينا
(حرك راسو باه)
ونتا تكلف بدراري ديال عيساوة ودقايقية والفرقة راه فيهم صحاابك يااك!!
(غير كيحرك راسو)
خاص خديجة تجي باش نمشيو لعند النݣافة تختار لحوايج ولمشيطة.. وعاد خاص نمشيو للخياط ندفعو دهاز باش بحرا يوجد
يوسف: ان شاء الله
الغالية: (شافت فختها وهضرت بشوية) شفتي!!
الخالة: اوا هادشي للي تيخلي لولاد يهربو عند عيالاتهم وينفرو موااتهم حتى نتي سايسي ورديه لعندك ماشي هربييه يبقى بعدا حاط الرأس عليك وتبقاي نتي الري وشوار..
أصبحنا وأصبح الملك لله...
ملاك: (فاقت معطلة شوية واخا فطرو حداها وصداع الا كانت مرخية مقدرتش تنوض حطت ليها خديجة لفطور بقات كتاكل وتفكرت بلان اورطيغا لبارح تبسمت بلا متشعر واكتر حاجة مفرحاها هو رجوعها لفاس وزوينة المدير عجباتو خدمتها وكانت عندها بريم..)
خديجة: ملاك، يوسف بغاني نجي لعندك باش نبقاو نخرجو نتقداو فراش الدار
ملاك: شوفي مع بااك!!
خديجة: ونتي تبغي؟!
ملاك: (عيبتها) ونتي تبغي؟! وتي سييييري من داك تخربيق ديالك حسابك انا هي نتي
خديجة: حشومة عليك شنو درت انا
ملاك: ههه (بغات تهضر وهي تسكت اصلا مزاجها زوييين متحتاجش ضيعو) مهم نتي شوفي مع بابا
خديجة: بيناتهم هو ويوسف انا قلتلو تفاهم مع بابا
ملاك: مزياان.. (جاها ميساج من عند وفاء كتسولها امتى تجي) حقا فكرتيني قول لماما تقادلي فطوايص داكشي درفيسة
خديجة: على حساب صاحبتك
ملاك: اه.. (تغداو بقاو مجمعين طلعت لسطح تجيب حوايجها شافت فسطح دار حمزة تبسمت مكتحس بوااالو!!!) ناااااااااري انا مكربيش الكبدة اه اه شحال خايبة انا هههه..
(هبطت كظحك حتى كتشوف يوسف جا زادت ظحكت ووعرفاتو طااايح فختها مبقاش كيخوي من عندهم وفلحظة تفكرت ان فاس مغتبقاش فيها ديما، غترجع سوا من بعد سيمانة جوج او تلاتة وختها غتزوج وترجع للدار ولحياتها لقديمة المملة وتبقى تعصب غير بوحدها ودابز على السداري للي حدا السرجم وتسناهم يخويو باش تنعس، رجعت لسطح فثانية تقلب مزاجها اول واحد جا فبالها هو اورطيغا واخا معندهاش معاه او يمكن #مكانش عندها معاه الا كيفوج عليها كيخليها بعدا ناسية مشاكلها ماشي بالضرورة بظحكو ولكن حتى بطنيزو مدابزتو مهم كيلاهيها.. وحتى يوسف غيتشغل مع مرتو وهادشي طبيعي ميمكنش يبقى مقابلها راه الوحدانية للي كانت كتخليه معتابرها صديقتو متقبلة منين غيتزوج غينقص شحال من حاجة وختها للي واخا كانت هازة من جهتها وكان عندها موقف كبييير وصل لحوايج خايبين الا كانت مونسااها عاود شافت فسطح حمزة لقات براسها كتحس غير بالكره وصافي.. معرفتش شنو دير باش تعطي لراسها طاقة ايجابية خممت وعاودت خممت مزيان حتى قنعت راسها انها غتبدا القرايا فلفاك وغتحجج الويكاند ديما دوزو ففاس تجيب بوليكوبات ومرة فالسيمانة تهبط واخا مصاريييف ولكن ااااامممممم تبقى مع وفاء (دارت ابتسامة عريضة) غير مع راسها كتقاد مزاجها ..
سمعت كيعيطو ليها تبسمت ها هي لقات لراسها مخرج ميمكنش تدفن راسها فصفرو بين الخدمة والدار.. هبطت هازة حوايجها دخلت لبيت مها حطاتهم تماك حتى كتشوف أنير فايق ويديداتو كيتحركو مكيبكي مواالو قربت لييه كطل عليه مزال صغيييييور بزااف زعيعر وعويناتو زوورق كيشوف فسقف حتى ظحك حلت عويناتها هازة حواجبها كرد فعل لأي واحد كيشوف ملاك كيظحك تبسمت ورجعت دغيا جمعتها)
خاينها مع وحدة زعرة ويجي يقول (كتعيبو) ندمت حتى عضيت فالحجر الله يمسخك ونتا كنتي متع راسك بزعورية وتجي ديرلي فيها فقيه وتقول بايت فالزاوية (خلعها منين طلق غوتة)
اويلي تاااا ماالك.. (شافتو رجع حمر كيتعصر ويبكي)
ويلي الشيييطاان غيقولو غير قرستك (ياله بغات تهبط من النموسية تبعد دخلت مها)
زهرة: شنو درتيلو؟!!
ملاك: والله ما انا والله مقستو (ضربتها لكتفها) والله مقستو زمر كدااير والله مقستو
زهرة: خرجي لمك (خرجت كتلقى يوسف وباها جالسين فوسط الدار حسابلها جالسين فالصالون)
ملاك: سلام
رشيد: ضربتييه؟!!
ملاك: (خرجت عينها مرضاتتش واكترية يوسف للي شاد الظحكة) مقستووش
رشيد: (جنو وجنونو تخراج عينيها) هه حسن علوان هاد الولد راك عارف مع صغيرة مبغاتش للي ياخد ليها بلاصتها
ملاك: ايخااان لوااه (قالتها فنفسها قوست عينها فيه باينة كتقول كلام مقادراش تقولو بفمها للي خلا يوسف يظحك خنزر فيها باها وهي كتشوف فيه هكاك وهي ترجع للبيت كتحيح وتنݣر ولكن بصوت خاااافت باش ميتسمعش ولكن كتحرك يدها راسها تجننات...)
رشيد: صافي اولدي شي يوماين ونهبطها لفاس
يوسف: (كان بغا يديها معاه ولكن صوابهم ومعقولهم مقدرش يهضر) مرحبااا اسي رشيد
رشيد: انا نيت غنهبط خاص نجيب شي سلعة (بصوت خافت) وان شاء الله عندنا شي تسافيرة (رفع صوتو) هبط باك واجيو تقهواو عندنا وحتى الحاج بنسليمان
يوسف: اهاااه ضروووري اسي رشيد غير دابا راه مشطونين مع العرس وتوجاادو، (وقف) انا غنمشي يمكن ملاك غتدي طموبيلتها اما نوصلها معايا
رشيد: غتديها على حساب الخدمة ونيت متبقاش كتسنى فالطاكسيات وتعذب
يوسف: اه داكشي نييت (خرجت زهرة أنير وخديجة حطت اتاي وحلاوي والفاكية جات مرت حنينهم ومرت عمهم بقا شاد أنير كيلعب معاه وحداه خديجة مقشبيين طلعو لسطح دارو سيلفي بتلاتة وعاطيينها للظحك وجمووع
اما ملاك كانت غضبانة فبيت مها كتسنى يوسف يمشي فحالو باش حتى هي تمشي..)
~~~~~~~~~~~~
تلقاو فدروج هي طالعة وهو هااابط
وفاء: عاش من شاااافك فين غابر مبقيتيش جيتي هنا ݣاع
اورطيغا؛ بقيت فالدار لوخرا
وفاء: (جات تقيسو فوجهو وهربو جمعت يدها) الحمد لله راك بريت وحتى العين مبقى فيها والو
اورطيغا: ونتي درتي عقلك شوية!!
وفاء: عفاك متفكرنيييش راني متبعة مع طبيب
اورطيغا: معاودش تعرض لييك؟
وفاء: هددتو فالتيليفون يعاود يبان نمشي نديكلاري بيه كرهتو وكرهت الشوفة فيه ونهار للي تلاقيتو فييه
اورطيغا: حسن، ياله تلاحي
وفاء: حقا اليوم غترجع ملاك
اورطيغا: اممم (تم هابط فدروج معلابالوش وهنا تأكدت ان مبيناتهم واالو متسوقش اصلا شحال مبقى عمر هنا فدارو ولا حتى سول عليها.. طلعت لدارها صونات على ملاك لقاتها قربت تدخل للحومة... مشات للبيت حلات السرجم باش يتهوا البيت وكانت ديجا مخملاه ومبدلة الكوڤر والوسادة خير ملاك عمرها تنسااااه..
عطرات الدار وحطات عصير وشي تخربيق فوق الطبلة حتى سمعت لباب كيتحل مشات عنقااتها ودخلت معاها حوايجها هاد المرة جابت باليزة دايرة حساب الدار ماشي لوطيل جبدت ليها حقها من الحلوى ديال سبوع وكانت معا طيبت ليها ملاوي كيكة قراشل وجابت رفيسة سخنوها هي وبداو كياكلو مجمعين كتعاود ليها الجديد وأنها بدات حصة مع طبيب نفساني..
صونا عليها يوسف للي شد عليها انها غاارت من خوها وهي كتحلف مدارت ليه واالو حتى قلبوها ظحك عاود ليها انه كان باغي يجيب خديجة ولكن فشل يقنع نسيبو يعطيه بنتو ظحكت عليه بقاو مجمعين حتى بغات تمشي تنعس باش ترتااح... عيا معاها باش تمشي معاه للدار ولكن مابغاتش بحجة أنها كتحشم ولكن هي مكترتاحش لمو للي منين كتشوفهم وهي كتشوف فيهم بشوفة دنيوية وهي مغتقبلش على راسها يتقلل منو ومن جهة كاين يوووسف للي غدير بوجهو اللهم متمشيييش....)
اصبحنا واصبح الملك لله..
فاقت معطلة دغيا لبست حوايجها باش تمشي للخدمة ركبت فطموبيلتها ومشات نيشان لتمااك دوزت وقتها خرجت مع 2 صونات عليها غيثة مجاوبتهاش خافت تقولها تجي للدار عاودت صونات جاوبت ومصممة تقول لا هي ل..
ملاك: وي غيثة صاڤا!!!
غيثة: الحمد لله احبيبة غتكوني جيتي لفاس ياك
ملاك: اه
غيثة: الا بغيتي نتلقااو نتغداو الا كنتي مزال متغديتي
ملاك: اهاااه مرحبا فين كاينة؟!!
غيثة: نتي فين!! انا فالسعادة نصيفط ليك لوكاليزاسيون؟!
ملاك: واخا انا فالأطلس مهم غير صيفطي.. (قطعت) نااري هاد فاس شحاا فيها دالمصااريف واقلة نعيط ليوسف يجي يخلص!! لا لا اويلي حشوومة مجايااش ݣاع
(مشات للݣيشي جبدت فلوس وهي حاضية جنابها) الرعب...
(ركبت فطموبيلتها دايرة أبليكاسيون #ويز باش تديها نيشان البلاصة ومن طريق مختاصرة ومعامرااااش)
~~~~~~~~~
اورطيغا: اهلان اهلان اهلان بالزين دالعالم
غيثة: (مفرنسة بدلع) salut
اورطيغا: (كيقطع شي لحم) بيخير!
غيثة: صاڤا الحمد الله ونتا؟!!
اورطيغا: الحمدوو لله شنو جابك هنا؟!!
غيثة: دايرة انا وملاك خت خديجة نتغداو اونصومبل هنا وتنتسناها تجي
اورطيغا: امم (لعب بلسانو فوسط فمو) مـــــمزيان، فين غتمشيو؟!
غيثة: والله مزال معرفت عرضتها ومعرفتش فين ههه ومعرفتش هي شنو تتبغي؟!
اورطيغا: سيرو لريسطو **** تماك بلاصة نقية
غيثة: اممم صراحة كانت شهوتي فالسوشي ولكن معرفتش ملاك واش تيعجبها ولا لا!!
اورطيغا: هاد الريسطو فيه كولشي للي بغات شي حاجة طلبها
غيثة: مزيااانة، اجي تغدا معانا
اورطيغا: ممساليش ازين
غيثة: وا عفاااك غير 10 دقائق (قوس عينو بحال كيفكر) عفاك عفااك!!
هانتا قبل متجي قولي شنو ندموندي تلقاه وااجد باش متبقاش تسنى وترجع لخدمتك دغيا
اورطيغا: صافي باشما نجاوبك.. سيري باش متعطليش على لبنت
غيثة: انا نعاود نصيفطلها سمية ديال الريسطو بااااي (دارتلو بيز من لبعد) متعطلش...
اورطيغا: (تبسم مشات وكمل خدمتو.. شي 5 دقايق تمو داخلين شريف ويوسف)
واش هاد المحال تقلب زااوية!!!
(بقاو كيظحكو حيت باينة جاو قبل منهم شي وحدين.. عرضوه لغدا وجاتو يصيفطهم لفين كاينين لبنات باش ميبقاوش بوحدهم وغيلحق عليهم وميكونش متطفل..)
~~~~~~~~
ملاك: (غير شافت يوسف داخل فرحت لغدا على حسابو اذا ولكن حيت كاين الزايد واخا شريف وكتعرفو مغترتاحش شوية جات مهم عندهم كانت فالسعادة كتوجد للعراسية خرجو عندها برا حيت مابغاتش تدخل عندهم، بقا شريف شافت فيه كان زويين ولكن باقة عاقلة قلبت عليه فالانستغرام ويمكن مزوج ولا خاطب مهم ديال شي وحدة وأصلا معندها ݣانة لهادشي وعاد تكون مع واحد مشروووك..)
شريف: كيف غادية مع الخدمة؟
ملاك: مزيان الحمد لله (بقاو كيهضرو هضرة كتجبد هضرة... حتى جلس حداهم اورطيغا كان عاود عليها على شي موقف مضحك مع يوسف بقاو كيضحكو)
اورطيغا: شنو مظحككم!!! (شاف فملاك بجمووود هاز حواجبو وفخوه ورجع شاف فيها زعما شنو)
ملاك: (بقات ساكتة كتشوف فيه وقلبت وجهها بحال مسمعاتوش هز حواجبو بجوج كردة فعل!!)
شريف: فييين!!
اورطيغا: فين!! ( رجع شاف فملاك للي قلبت وجهها شاف فيها شوفة فشكل خلاها مفاهمة ومعارفة متقول!!! حتى دخل يوسف وغيثة جلسو مجمعين كيهضرو أغلبية شادين فيوسف للي باينة متحمس لهاد زواج كل واحد شنو خدا فالماكلة كيتسناوها)
ملاك: (تيليفونها صونا كانت بريڤي ياله بغات تهز تيليفونها شافت اورطيغا كيشوف فيها) شنو!!
اورطيغا: شنو للي شنو (قلب وجهو، شاف فيوسف) اش تمااا
يوسف: حقا هضرلي مع دراري ورصي معاهم نهار 15
اورطيغا: كيف واالو كنت باغي العسري
يوسف: ههه هداك حتى لسبوع ان شاء الله
اورطيغا: صافي ضرباتك الحزقة من داابا!! قلتلك من الاول اش داك لشي زواج
غيثة: زعما مغتزوجش نتا فمممممممرة؟!
اورطيغا: (شاف فيها ديك الشوفة ديال بنيتك هز كاس ديال ماء شرب وتحط الغدا بداو كياكلو ملاك ركزت فهضرة ديال غيثة وشافت فيوسف كفاش كيقطع ستيك ديال لحم وياكل ويمسح جناب شنافتو حتى جابلها الظحك)
يوسف: اوا وونتا اشريف
شريف: انا هاد الساعة دااير بووز ولكن الا لقيت بنت الناس غنوي الحلال
يوسف: بنات الناس مجوودة (غمزو اورطيغا غير حاضيهم بعينييه)
اورطيغا: وكان عرفتكم غتكونو غاملين فهضرتكم هاكا منجييش بحال شي مراهقين غير زواج زواج
يوسف: منين غتكبر غتفهمنا
اورطيغا: (شاف فيه ميق)
غيثة: حتى نتا خاصك تفكر فزواج
اورطيغا: حتى نزوجوووك نتي ونشوفو معايا ديك الساااع
غيثة: اممم
شريف: حقا الحاج كريمو كان بغا كموند كبيييرة وانا غدا مسافر شدها نتا
اورطيغا: واش انا عندي فين نحك الراس اشريف باش نشد خدمة اخرى
شريف: سعد ولاخر حتى هوما مبغااوش وانا محتاج هاد تسافيرة بزااف
اورطيغا: اودي غنوحل غير فدوك لوراق اما شي لاخر هانية مولفين تماارة.. مهم صافي غير سير نتا انا نشوف كنديرلها
شريف: الله يحفظك لية اخويا
اورطيغا: (كمل ماكلتو بالزربة ووقف حيت خاصو يرجع باش يصيفط الدري يتغدا) انا عارضااني ملاك
ملاك: (بلا متحس خرجت عينها فيه) معرضتكش
اورطيغا: ههه انا عارضك الآلة (جبد 200 درهم حطها فوق الطبلة)
ملاك: لا ل(خرج زربان كيجاوب فتيليفونو شافت فلوخرين)
يوسف: (دارلها إشارة بعينيه زعما عادي بقاو مجمعين وهي غير كتسمع حيت كيهضرو فأمور عائلية فهمت شريف مبقاش مع خطيبتو.. ناضو دراري كل واحد مشا لخدمتو وبقاو لبنات كيجمعو فداكشي ديال العرس خداو ديسير وكولها كتخطط فلباس والمكياج وحايرين شنو الكادو للي يديرو لخووتهم جا السرباي باش يجمع الطبلة)
غيثة: عفاك تيراميسو كيتكات اومبوغطي (كانو دراري خلصو) هدا ناخدوه لاورطيغا للمحال.. امم معليش املاك نمشيو عندو! هو المحال ديالو غير هنا!!
أمينة: (كانت جالسة جارتها للي كتبيع ليها داكشي المخدوم باليد زكيشربو أتاي فوسط الدار ومجمعين حتى شافت أب ليلى داخل وبان فيه الهم بزاااف وموراه شاب فقياس ولدها باين ولدو للي مجاش المغرب منين كان صغيير، بقات فبلاصتها من نهار دابزت معاهم معاودت هضرت معاهم شافت مو جات عنقااتو وحتى ختو والهضرة غير بالفرونسي مكاين حتى كلمة بالعربية خرجت مفتاحة كترحب بيهم دخلو للصالون، قالت فنفسها)
الخايب هنا هو للي جا يدخل لهاد الدار
...: اوا نخاليك الحبيبة مع ضياافك
أمينة: بسلامة جيبيلي الكحل للي وصيتك عليه وديك التبريمة (بقات جاالسة كتشرب فأتاي حست بالقنط معندها لا فين تجي لا فين تمشي مشات لبيتها لبست جلابتها دارت فولارها هزت صاكها صونات على الحاج للي كاين على برا علماتو غتسبقو لدار للي فالسعادة هبطت خرجت من تماك نيشان شدات تاكسي ومشات...)
اورطيغا: (كان خدام فجوج حوالة كيفصل فيهم بالماكينة حتى كيشوف غيثة داخلة هي وملاك للي كدور عينها فالمحال وقف الماكينة ومشا جيهتهم)
غيثة: (حطات ساشي فوق الكونطوار) جبت ليك الديسير وللي تتبغي
اورطيغا: (هزو متبسم) يخليك ليلي
غيثة: (تبسمت بدلع)
ملاك: (بقات كتشوف فيه اول مرة تعرف خدمتو مزيان وتشوفوو خدام لا هي كتعرفو عندو شي علاقة مع لحم ولكن اخر حاجة توقعاتها هو يكون ݣزار!!! لابس طابلية فيها بقع صغيرة ديال الدم وداير ليݣات جاها فشكل حسابلها غير كيبريكولي مرة مرة وفلوسوو موجووودة كاينين.. بقات كتسنى غيثة تكمل حتى شاف فيها وقلبت وجهها زعما مكنتش كنشوف فيك المحال عمر)
غيثة ياله نمشيو خلي السيد يخدم
اورطيغا: (هز حاجبو فيها)
غيثة: اه اه.. شوف الا درتي شي برݣرام عيط لية.. زعما لينا حنا مزالين هنا فالسعادة كندورة
ملاك: انا خاص نمشي غدا خدامة بكري
اورطيغا: (حرك راسو باه ومشا كمل شغلو ولبنات خرجو ولا ملاك جرات غيثة للي مسخاتش تخرج..)
غيثة: واش بالصح غتمشي حيت مزال انا باقية غندور
ملاك: ااه عييت منعستش لبارح بكري وفقت على النبوري وتسخسخت
غيثة: صافي احبيبة سيري ترتاحي انا نعيط لصاحبتي مرة أخرى ونعاودوها باش نيت نوجدو للعرس
ملاك: اهاااه مرحباا تبغي نوصلك لشي بلاصة؟!
غيثة: انا نتسنى صاحبتي تجي هنا (تسالمو ملاك مشات وغيثة رجعت دخلت للمحال بقات جالسة فالجنب)
اورطيغا: دخلي تسنايها لدااخل (دخلات وجلست مبعدة شوية كيقطع) مشات صاحبتك
غيثة: ااه قالت عياات، مسولاهاش حتى اشمن اوطيل جالسة فيه
اورطيغا: (بقا سااكت خدام حتى كيشوف مو دااخلة وغير شافت غيثة معاه لداخل عجبها الحال حيت كتعزها بقاو مجمعات حتى جات صاحبتها مشات وبقات مو حدااه) طلعي للدار غتخنقك الريحة هنا
.أمينة: شنو كانت كدير غيثة معاك؟!
اورطيغا: راك شفتيها كانت تتسنى صاحبتها هنا
أمينة: امممم
اورطيغا: وا سيري سيري
أمينة: فوقاش دير عقلك كولشي موجود وحتى العروسة غير نتا ميبس راسك
اورطيغا: غيثة راها بحال ختي
أمينة: ايييه تيقتك انا نطلع متعطلش على لعشا اولدي
اورطيغا: شوفي غير خليكم على خاطركم داير مع شي صحابي
أمينة: غتسد المحال تمشي لاصال غتجي تلقى ماكان موجودة كولها وسير
اورطيغا: واخا الشاف
أمينة: واخا ياله بسلامة....
وفاء: ياله معايا اصاحبتي غيعجبك الحال
ملاك: مفياااش
وفاء: بااز اختي منين جيتي ونتي الخدمة الدار الخدمة الدار مكتملييش!! راه اراي مترجعي لصفرو وتبقاي من خدمتك للدار
ملاك: (باغية تخرج) معرف!!
وفاء: واا غير ياله.. غيعجبك الحال اصلا الناس نقيين وكلااص ومنتعطلوش
ملاك: (فكرت ياك غير حفلة شنو غيوقع تمشي حتى هي تبدل الجو شوية وتعرف على ناس وتخرج من ديك القوقعة وهي نفس الناس للي عرفت من صغر هوما للي كتعرف.. ناضت لبست تريكو لاسق وسروال دجين ومن الفوق مونطو دارت شالها رشت بارفان خفيف وخرجت لقات لوخرا لبساات) مغنتعطلوش؟!!
وفاء: وصافي كوني هانية
ملاك: (خرجو من تماك ركبو فالطموبيل كتوريها فاتو مرجان وفاتو ولاد الطيب.. خرجو برا فاس وشدو طريق ايموزار) واش مزال بعييد!!
وفاء: لا لا قربنا فهاد القهوة (دخلت ملاك تماك كان منتزه فيه قهوة ريسطو بلاصة الالعاب قاعة حفلات وجردة مقادة كانو بزاف الطموبيلات كانت حفلة بين طلبة الماستر ولي برف... هبطو بجوج)
شوفي الا قنطتي قوليهالي نرجعو فحالنا
ملاك: واخ (مشاو للقاعة دخلو لداخل عطات لانڤيطاسيون ديالها وللي من حقها تجيب شخص واحد معاها ودخلو الصالة كانت بريڤي داك نهار حيت مكرية لقات ضواو والاجواء ولبوفي زوييين والموسيقى كلاسيك عاد اهم حاجة التيتيز التيتيز التيتيز، تبسمت نقطة ضعفها الزيين)
هادشي زوييين
وفاء: قلت ليك غيعجبك الحال
ملاك: (بقات كتشووف شوية وفاء مشات لشي كليكة مكاين غير التسلام بالوجه والتعنااق اصلا عقلية اوبن ومكاينش غير كووول وشرب... ضورت عينها وفخاطرها ميمكنش قوة هاد التيتيز للي هنا وعاد قرايين وكاين للي خدام خدمة زوينة وغير مكمل قرايتو مشات وقفات حدا طابلة مكاينش كراسة كتبرݣݣ حتى شافت واحد هاز ݣيتار طلع للخشبة للي كانت تماك والاضواء عليه بقا كيضرب الݣيتار وكولشي منتابه حتى بقاو كيغنيو معاه بالطاليانية بقات غير كتشوف عجبها الجو بزاااف مكرهتش تصور ولكن خافت من شي قمعة بقات مستمتعة بداك الجو كولشي كيغني وعاد هزو يديهم هازين بيل وماشيين فايقاع وااحد جا فبالها اورطيغا وفاش شافتو خدام وفاش كان مغدي معاهم تبسمت فاش قال عارضااني ملااك.. شافت شي وحدين مشاو هزو من لبوفي حتى هي مشات هزت طبسيل كتعزل واخا كولشي كان زوين من المملحات والحلويات.. عاد كتوصل لميني بار ختارت موخيتو فروي غوج ورجعت الطابلة كتاكل وتشوف جات عندها وفاء معاها شي واحد مكانش زوين وباينة كبير شوية ولابس كلاص)
وفاء: هادي صاحبتي ملاك.. هدا بروف ديالي وفنفس الوقت عندو مكتب
ملاك: (ممدتش يدها غير تبسمت) مشرفين استاذ
....: قالتلي وفاء كنتي بغيتي تقيدي فلماستر
ملاك: (شافت فوفاء ورجعت شافت فيه) اه
...: واخا قبل ميبدا التسجيل غتجيبيلي الوريقات ديالك وان شاء الله يكون خير
ملاك: (تبسمت) ميغسي
وفاء: (غمزتها متبسمة) انا جاية...
يوسف: (كمل خدمتو ومشا لدارهم وهو كيهضر مع خديجة فالتيليفون غير وصل قطع معاها لقا باه ومو جالسين فالجردة مشا عندهم سلم عليهم ولكن مزال الاجواء مكهربة مع مو جلس)
الواليد شريف راه لقا ليك داكشي للي بغيت فكازا وغدا غيطلع تماك
اب يوسف: تاصل بية قبيلة وقالهالي
يوسف: مزيان، فكرت علاش منديروش عرس خفيف ضريف هنا فالجردة عندنا الدار كبيرة وتييسع لحبابنا وصحابنا بلا قوة الهرج والخسراان
ام يوسف: (كتبغي ترطبو معاها) وااا صباح اولدي رصينا مع قاعة البهجة
يوسف: غير ضياعت المصاريف وصافي
ام يوسف: نتا اولدي كون هاني كولشي علينا حنا، راك الفرحة للي كنت تنحلم بيها من نهار تزاديتي (بقات كتبكي) انا عندي داك نهار هو احسن نهار فحيااتي نشوفك عرييس
يوسف: (وقف عنقها كيمسح دموعها بلا ميهضر، حتى بردت بقاو كيهضرو غير على العرس وقالهم خديجة غتجي هي وباها يوصلها عند ملاك واصرو عليه باش يعرضوهم) اوااا نمرة سي رشيد عندكم نتوما تاصلو بييه
اب يوسف: اه ضرووري
الغالية: اوا الا هاكا اولدي خاص نخرجو نجيبو شي حاجة لخديجة
يوسف: بحالاش؟!
الغالية: دخلتها اول مرة عندنا ومنكونو شاريين ليها والو حشومة ݣاع!!
يوسف: اممم اهاااه
الغالية: وخاص نخرجو انا وياها فاش تجي ونمشيو لكاميليا باش تختار داكشي دالعرس ميمكنش نلبسها على ذوقي ربما تكون شهوتها فشي حاجة
يوسف: (تفاجئ) اممم حتى ذوقك الوالدة مكاينش بحالو (تبسمت) ولكن بالصح بغيتها تختار هي شنوو تبعي..
صافي واخا غدا وهضرو بيناتكم فاش تجي..
(بجدية) الوالدة انا مبغيت حتى شي مشاكل بيناتكم غير تيقي فية خديجة بنت الناس درويييشة مع الوقت غتفهميها وتبغييها
ام يوسف: ولدي غتكبر وتولد وليداتك وغتفهمني انا معنديش مشكل مع مرتك راه اي وحدة كنت غندير.. هاديك كانت ردة فعل عاادية ونتا عارفني اولدي شي مرات متنتحكمش فراسي فالكلام للي تنقول ولكن للي خاصك تعرف انك نتا طرف من قلبي وعويناتي وللي درتيه وبغيتيه انا معاك فيه..
يوسف: (هز يدها باسها) عارف الوالدة
اب يوسف: الله يهديكم ويهدينا اجمعيين حتى نتا اولدي تهلا فيها الا كانت بغات تقرا ولا تخدم عاونها
يوسف: لا لا انا وياها متفاهمين
ام يوسف: شوف نتا خرج هاد السوق انا غنعمر ليها وقتها
يوسف: (تبسم) وقتها بغيتو يعمر غير بية
ام يوسف: ههه كوون هااني
يوسف: بغيتها تعرف هاد كاميليا وحتى توريها spa ومنين تتقداو وو حتى ندخلها fitness مهم بحال هاكا
ام يوسف: ضرووري اولدي راه مدام يوسف ولدي الغزال..
يوسف: صافي، مهم انا نطلع نبدل حوايجي باش نخرجو نجيبو شنو خاصك
ام يوسف: صافي واخا أنا نتاصل بفاطمة باش تجي تطيب على حساب غدا
يوسف: اهاااه..