اورطيغا: ههه حتى لفلوس معندكش ياما ارحميني
ملاك: هههه الااااا غير... شوف خليني حتى نتشاور مع ماما وبابا ونرد عليك ولكن قولي شحال مثلا التسبيق للي يبغي هاد السيد وشحال كيحسب للمتر
اورطيغا: عندك 10؟!
ملاك: (خرجت عينها) 10!! هههه تكون عندي 10 ݣاع متلقاني حداك
اورطيغا: وفين تكوني؟!
ملاك: وا غير تعبير مجاازي وصافي.. ميبغيش مليون (شافتو تبسم) جوج؟!! (بقا كيظحك) هدا حدي؟!!
اورطيغا: تشاوي بعدا معاهم ونشوفوو
ملاك: وداكشي قانوني
اورطيغا: على ظماانتي أنا نرد ليك رزقك الا وقعت شي حاجة
ملاك: وباش نتيق!! سمحلي امراد هادشي راه مافيهش تيقي فية رتاحي معايا!! هادو راه فلووس
اورطيغا: هه انا ولاَّ الفلوس؟!!
ملاك: (تبسمت) نتا متقدرش بكنوورز الدنيا
اورطيغا: (بغا درعها بيدو وهي تهرب) مال مك
ملاك: ومالك نتا نيت؟!
اورطيغا: حتى هادشي لا؟!! وبزااف انا مباغي والو ولكن هاد لعيبات تيعنييو لية
ملاك: وااامرااد! تأ!!! مقلتيليش شحال لمتر!
اورطيغا: كاينة دار تكون فيها شي 60 كدا و60 متر بشي 14 يمكن ولا 15 مهم هاكا
ملاك: مزياااااان!!! والله الا همزة مضخمة!!!!
اورطيغا: منستاهلش شي حاجة!!
ملاك: احم (شمت) ريحة ليكخييپ!!!
اورطيغا: (حرك راسو بلا حولة سابقها مشا كيلعب أنير واخا صغييور ولكن غير شادو كيلعبو وهي كتصورهم كانو دوزو وقت زويين طلب 2 دليكخيپ هي بنوتيلا وݣلاص وهو بأملو جلسو فلݣازو كياكلو مجمعين حتى بدات الشمس كتغرب)
ملاك: وااقلة خاص نمشيو
اورطيغا: (حرك راسو بلا)
ملاك: ههه وراه جلست بزااف من 2 وأنا معاك
اورطيغا: ومال مك تتحسبيلي فسواايع
ملاك: ولااا غير مي حلو غتشوش علية ومسكينة مكتعرفش حتى تصوني بلاتي نصوني عليها (بقات جالسة حداه هو متكي وأنير جالس فالارض كيعب فربيع حاضييه علماتهاا انه شوية وتجي)
اورطيغا: هنا كاين شي اوطيل؟!
ملاك: موحاال علاش بغيت تبقى هنا؟!
اورطيغا: تنقول!!
ملاك: بسلاااااااامتك!! غتوصلني لفين حطيت طموبيلتي وغتشد طريق بكل ثقة وظراافة لداركم وتمشي تكمش تما (هز حواجبو) واخا كبيدة!!
اورطيغا: (تبسم حتى تقوسو عينيه) هانا على الناس تيعرفو يهضرو!!!
ملاك: (حشمت) وااا غير خرجت
اورطيغا: وغير بقاي تخرجي الآلة بحال هاد لاتويااات
ملاك: (دورت وجهها حشماانة بقاو شوية وهوما يشدو طريق طالقين موسيقى مساخيينش ببعضياتتهم وأحاديثهم مكتساليش.. وصلها لحدا طموبيلتها هبطت وركبت أنير اللور كتقاد الصمطة) خاص نشريلو هداك الكرسي
اورطيغا: (باسو وشاف فيها) نبوسك حتى نتي
ملاك: (هربت جلست فبلاصتها) باي باي امراد سير بحرا توصل
اورطيغا: (وقف حداها وهي راكبة) الألوو بيناتنا...
ملاك: (تبسمت كتشيرلو باي باي) باااي...
تبعها بعينيه حتى مشات وغبرت.. وعاد مشا رجع لطموبيلتو ركب وشد طريق لفاس وشحال رجع كيحب هاد المدينة مينكرش انه لقا راحتو مع ملاك ومبقاش كاين شي شك باغييها ومخلي الوقت شنو غتجيب!!!
شعل تيليفونو بزاف دليزابيل دابا ممكن يجاوب.. خلاه مشعوول وهي تصوني أمينة جاوب داير مكبر الصوت
اورطيغا: وي
أمينة: ياك اولدي ياك تخليني بحال الحنش للي مقطوعلو راسو متصوني متجاوب تخسر علية جوج كلمات وترجع تطفيه
اورطيغا: ياك فوسط عائلتك!!!
أمينة: (بقات سااكتة) الله يهديك اولدي انا راه كندير غير فصوااب
اورطيغا: وشنو المطلوب مني انا ياك لبارح بقيت معاك حتى لصباح عاد جيت فين الغلط ديالي عااود!!! ولا صافي غير تسمات علية انا ممزيانش
أمينة: الله يرضي عليك اولدي حتى واحد مݣال هاكا
اورطيغا: للي بغا يهضر يهضر اصلا معلابااالي بحد
أمينة: حنا غدا صباح غرجعو ان شاء الله
اورطيغا: مزيان
أمينة: نتا فينك
اورطيغا: غير هنا..
أمينة: ولدي عفاك متهزش فخااطرك من جيهتي
اورطيغا: فين عمري هزيت من جييهتك الوالدة!! صافي شفت الحاج تمااك هو راه قااايم بالواجب وانا رجعت فحالي
أمينة: ݣالك متخدمش غير رتاح
اورطيغا: نشووف!! (عيات ترطب معاه وهو كيبين ليها راه عادي ومحدو منفاجرش عليها الا ممتيقاش انه بيخير!!! قطع معاها صونا شريف)
اتشديييت تماااك المعلم
شريف: ههه معليش ميمكنش نخلييهم المهم نتا عييش
اورطيغا: بصحتو هه
شريف: وصلت لفاس؟!
اورطيغا: تقريبا
شريف: بلا متخدم سير للقنت ديالك راه شهر جاي مدبووز بالخدمة وتابعو رمضان
اورطيغا: ان شاء الله (حرك راسو باه) ياله تلاح (قطع صونا عمر بقا كيتأفأف ويمل راه أبيل تابع أبيل!! جااوب)
وي عمر!!
عمر: مشيت اصاحبي بلا منشوفووك
اورطيغا: كان عندي شغالاتي ورجعت
عمر: غنجيو شي سيمانة لفاس نتلقاو؟!
اورطيغا: (زفر) مرحبااا الله اودي
عمر: الله يحفظك ياك امور هانية
اورطيغا: الحمد لله، عمر الا وقعت شي حاجة تماك، مع الوالدة!! علمني
عمر: متخافش مكانش مزال لي يحاديها
اورطيغا: مهم نتا غير علمني وقولي كفاش ماشية الامور تماك معاها...
ملاك: (وصلت للدار فرحاانة عاجبها لقائها معاااه وكفاش ممبسلش عليها ومحتارمها. واخاا الداخل السافل ديالها معندوش مشكل يتبسل عليها كيعطي لديك الأنوثة ديالها الدغدغة ومن بعد العقل يتحكم!!
وعاد اهتمامو لأنير واخا جاي معصب وطايرة ليه ولكن معاها كان كما والفااتو دائما بلعكس الاهتمام زاااد واعجاابو بيها كبر وباااين..
مع أذن المغرب صونات عليها وفاء انها غتغبر شي يوماين تمشي تشوف داارهم وترجع)
ولكن حوايجك بقاو هنا
وفاء: مغنتعطلش غير غنشوفهم ونرجع باش نيت تكون حجة رجع دغيا
ملاك: صافي واخا
وفاء: (قطعت وقلبها غيسكت بالخلعة وهي كتشوف راسها بين لقبوور!!!!)
~~~~~~~~~~~~~
مشا لدار مو دوش بدل مشا جاب عشا من الزنقة تعشا وبقا مع ملاك فالتيليفون أبيل ڤيديو...
اما أمينة فاراااتها مع خوها لكبير للي عيا يلمحلها تمشي فحالنا ووجودها غير مرحب بيها وسطهم وأنها مبقاتش ختهم كيعتابروها ميتة ولكن هادشي غير منين مكيلقاش راجلها حداها، وهي تنفااجر عليه وداكشي للي خاف منو بيناتو بالوااضح حقها فالورث مغتنازلش عليه ولو فرنك!! وهادشي زاد عصبو ولكن مقادرش يهضر حيت واخا مشا اورطيغا جاهم الحاج !!!
امينة؛ (خرجت معاها برا) وقفتك معايا اختي زهرة عمرني نسااها فحيااتي
زهرة: مبيناتناش أختي أمينة
أمينة: للي ندعي معاك هو نشاعالله حتى نتي تلݣاي عائلتك
زهرة: (تبسمت بحزن) نتي عارفة انا مكنقلبش عليهم، وربي يدير للي فيها الخير
أمينة: ربي غيجازيييك بالخير راك سبقتي اخرتك على هاد الدنيا الفانية
زهرة: (تنهدت) فوقاش غترجعي؟
أمينة:غدا، نحضرو للتفرقة ونمشيو اوا من بعد غتجي عندي نعيمة راك شفتيها شحال لسقت ومَّا غير تحيد حق الله تجي عندي
زهرة: معليش مافيها باااس للي غلب يعف
أمينة: اودي يلݣاو سلاك معايا وميلݣاوه مع ولدي
زهرة: اوا حتى نتي رخفي علييه الا لقيتي حبييبك عسل متلعقووشي كاامل
أمينة: اوا
زهرة: اوا صافي خليه على خاطرو بغاهم يهضر مابغاش حتى يبغي ماشي بين ليلة ونهار اجي بوس عمك ميمكنش!! راه كبير وكبر وهو حااقد وكااره خليهم هوما يخليوه يبغييهم ونتي مدخليش ولا غتمرضي غير فراسك وصحتك متبركي لا عليه لا على راسك
أمينة: الله يصاوب وصاافي
زهرة: أمين وا نخلييك نمشيو لوطيل انا ورشيد
أمينة: حتى نجي لفاس ونعرضكم نتي ولبنات مساكن عزاوني كاملين الا ديك الوزغة
زهرة: هه شكون؟!
أمينة: ملووكة
زهرة: ههه عولتي عليها بكري هاديك عندي والو
أمينة: لا لا هاديك راه بعقلها تبارك الله عليها مهم حتى نتلݣاو فاس
زهرة: ان شاء الله... (مشاو لوطيل باش بكري يشدو طريق لصفرو يوصلو قبل متخرج ملاك للخدمة باش أنير ميبقاش بووحدو...)
أصبحنا وأصبح الملك لله
خديجة: (فاقت بكري قبل من يوسف دخلت للحمام خدمت السشوار نشفت شعرها حيت مع دوشت طاحت نعست قدات ميكاب خفييف لبست بيجامة طوييلة من هادوك للي خيطات خرجت لقات يوسف جالس فوق النموسية ياله فاايق)
صباح النور
يوسف: (بحرا كيحل عينييه دارلها إشارة تجي عندومشات وهو يرجع بيها احضاانو ناعسيين) ولفت لهييه
خديجة: ههه نرجعو؟!
يوسف: مكرهتش شي عاام تماك معااك منولي نعقل على حتى واحد
خديجة: هه ياله نوض نوض، غتمشي للخدمة؟!
يوسف: غنمشي شي 2 سوايع من بعد غنخرجو نتغداو مجموعين برا
خديجة: اه سمعت عمي لبارح كيقولها
يوسف: متقلقيش من الوالدة
خديجة: واش أنا صغيرة ايوسف باش نبقى نتقلق على دوك لحويجات صغار!! عادي من حقها ميعجبهاش هادشي للي جبت ميمكنش الواحد تناقشو فذوقو مرة جاية منين تبغيو نشريو ليها شي كادو نتشاورو معاها
يوسف: ولكن عيب داك..
خديجة: يووسف صافي نسا!! قولي بغيتي شي حاجة لفطوور
يوسف: (كيزيد غير يحبها) بغيتك نتي هاد الساعة!!!.......
~~~~~~~~~~
ملاك: (فاقت دارت روتينها الصباحي صلات صلاتها لبست حوايجها سمعت صوت مها برا جاو معاها عباار خرجت عندهم كتسلت من لبيت باش متفيقوش سلمت عليهم وجلسو فطرو)
انا مشييت، بابا بلاتي غرجع من الخدمة وغنخرج نشري لأنير شي حاجة خاصااه
رشيد: (شاف فمرتو وتبسم) شي حمار مات
ملاك: انا!! منين وليت حمار صافي بلاش بنااقص ݣاع
زهرة: ههه صافي غير ظحك معاك باباك
ملاك: راه غير إنسانيا وصاافي، غنجي نتغدا ونخرجو معايا
رشيد: وشكون يشدو ليك فاش تكوني صايݣة
ملاك: وراه على داكشي باغا نخرج (مدت يدها لعندو) عطيني باش نشريلو الكرسي انا جات مع التالي مزال متخلصت غير يخلصوني وندير..
رشيد: ههه وكمليها شنو ديري
ملاك: غير يخلصوني ندير داارت راه مزال خاص شحال من حاجة
مي حلو: اغير لمن كتجمعي دوك لفلوس
ملاك: لزماان امي حلو
رشيد: واخ شحال كيتباع هاد الكرسي
ملاك: معرفت راه خاص حتى بوسييت لبارح خرجتوا منين عيا ملقيت فين نحطو بقيت هزاه حتى عواجيت من يدي
رشيد: صافي انا نمشي للسوق ونشوف
ملاك: لا بغيت نختار لي عاجبني (خرجت عينها) ولا منعاودش نخرجو
زهرة: (غير مكمشة عينها فيها وكتحرك راسها)
رشيد: صافي حتى ترجعي ونوجد ليك لفلوس
ملاك: ياله بسلاااامة....
ملاك: (دارت لكيت كما العادة وتمت ماشية داز باين حمزة من حداها قلبت وجهها مكتحملووووش، صونا تيليفونها حسابها مراد لقاتو يوسف)
اهليييين
يوسف: مصدووم فيك
ملاك: ههه علاش؟!
يوسف: وصلنا لبارح فصباح تنقول هاهي غتبان ها هي غتجي واالو!!!
ملاك: وراك عارف ايوسف لبارح مكان حتى واحد فالدار وبابا وماما ياله وصلو هاد صباح
يوسف: على الاقل قولي نجيو عندك
ملاك؛ وميمكنش نتوما ياله جيتو من سفر ونقولكم اجيو حتى ترتاحو ونتلقاو
يوسف: بلاتي انا وخديجة غنجيو عندكم
ملاك: نقدر نخرج ماشي زعما متجيوش اجيو غير انا غنخرج نتقدا شي حاجة
يوسف: من التالي قولي عندك شي رونديڤو هه
ملاك: (تبسمت) موهييم حتى نعلمك باش بلا متجبدلي صدااع ويبقاو علية ختك وراجلها
يوسف: ههه واخا لالة
(قطع معاها مشا لطبلة الفطور جالسين مجموعين فالجردة) غيثة مزال مبغات تبدل العادة وتولي تفطر معانا!!
الغالية: من بعد من بعد.. قولي الحاج واش غنمشيو بلاتي للريااض؟!
اب يوسف: معلووم خاص نديرو الواجب مع لالة أمينة
الغالية: (ميقت فيه) لالة!!! اوا تبقييستر (شافت فخديجة) نتي عائلتك حتى لغدا وسيري شوفيهم
خديجة: (بهدوء) لا غنمشي بلاتي (شافت فيوسف) ياك؟؟
يوسف: اه (مكمل فطورو)
الغالية: اوا متمشيش تعزي هاديك!!! ياك هي حبيبتك ومنعرف شنو تظلو حاطين الراس على الراس
خديجة: ضرووري غنمشي عمدها ولكن غنسبق دارنا اصلا علمتهم ومن بعد غنمشيو عندها
يوسف: (كمل فطورو مسح شنايفو شاف فخديجة) نقرب نجي باش توجدو راسكم..
~~~~~~~~~~~~~~~
اورطيغا: (فاق من نعاس معطل ومزال كيفكر لقا راسو باغي يتخلوا شوية، هز تيليفونو كانت 11 صونا على ملاك مجاوبتش رجعت صيفطاتلو ميساج انها فاجتماع ناض دار روتينو الصباحي فطر وخرج شرا شي اغراض ورجع للدار مشا للسدا جبد لاطونط ديالو (الخيمة) الكرسي الطبلة داكشي للي كيحتاج ومجموع مقاد نقي فالقنت جمع حوايج للي يحتاج وهبط للطموبيل صيفطلو شريف انهم غيشدو طريق لفاس بغا يصوݣ وهو يصوني يوسف جاوبو علمو راه فالريسطو قريب ليه يجي يشوفو صاݣ لحدا الريسطو وصونا باش يخرج ليه...)
يوسف: (بقا كيتسناه برا الريسطو مقالهمش غيتلقاه باش متلسقش ختو تسالمو بالاحضان)
البراكة فراسك من جهة هداك السيد
اورطيغا: امتى جيت؟!
يوسف: لبارح فصباح كنا بكري هنا، شوف حاول متسوقش فهادشي للي تيوقع، كمل حياتك عاادي كأن شيئا لم يقع
اورطيغا: (ببرود) اصلا مكاين والو
يوسف: اه دير مكاين واالو، نتا ماشي مجبر باش تسامح شي وااحد وللي معجبو حال يعاوها لمو
اورطيغا: (حرك راسو باه كيتبسم) هانتا تخضرتينا العريس شي سيركوي تحرق ليك تم!!!
يوسف: ههه تتوقع
اورطيغا: فين خديجة لباس عليها؟!
يوسف: الحمد لله، دخل تغدا معانا
اورطيغا: مزرووب شوية سلم على جماعة اه ورد البال لغيثة
يوسف: علاش؟!!
اورطيغا: سمعت شي تنقنيقة منين كنت مسافر معجبنيش الديكور، مهم المرة جاية نحصلها انا غندير معاها شي تصرف مغيعجبهاش
يوسف: (تشوش) قولي شنو كاين
اورطيغا: شوف كان عادي نخبع عليك، ولكن هادشي غيضرك نتا وهي بزااف وعاد واليديك ردو ليها البال ايوسف غيثة راها ختي بحال كما هي ختك منبغيهاش دير شي حوايج بعاد بزااف عليها
يوسف: مراد شوشتيني
اورطيغا: راه بينت ليك الحبيب رد لبال ليها دير داكشي ديالك للي تدير مع البراني تصاحب معاها وخليها قرييبة ليك باش تعرف كولشي عليها
يوسف: قولي شنو دارت؟!
اورطيغا: كانت فشي بواط وحتى هضرتها كانت فشكل وهادشي ماشي ديالها
يوسف: (تشوكا!!!! حرك راسو باه ودار يدو على كتفو) العز
اورطيغا: مزال نهضر معاها ولكن ماشي دابا ونتا سايس معاها مهم تنعرفك عندك مع داكشي دالحوار والنقاش.. ياله تهلا
يوسف: (ودعو وبقا حدا لباب بكثرة معجبوش الحال ولكن تصرف اورطيغا كان صحيح اللهم ينبهو من اللول ماشي يقول ماشي شغلي وكان ممكن يستاغلها ݣاع شحال من مرة ومبغاش!!
دخل عندهم كيحاول يتصرف عااادي وبدا كيلاحظها طاافية مكاين لا نشاط لا حيوية كما مولفها!!!)
~~~~~~~~~~~~~
ملاك: (كانت مزال فالخدمة جاها ميساج من عند اورطيغا واش مسالية خرجت من البيرو صونات قطع ورجع صونا عليه) أهلييين
اورطيغا: واخا تكوني تتصنعي دوليبران متكوني مشغولة هاكا
ملاك: ههه الخدمة مزيرة
اورطيغا: خرجي عندي
ملاك: (طرطقت عينها) فين كاين ؟!
اورطيغا: حدا الخدمة خرجي عندي انا فالدوورة...
ملاك: امم واخ... (مشات هزت صاكها مشات للحمام قدات شالها عكرت رشت ديودورو وخرجت عندو كان فالدورة تحت شجرة بقات كتشوف فيه وسط الطموبيل رجع كيعجبها بزااف) الا بغا يبوسني هاد نهار غنخليه...
ملاك: (وصلت لطموبيلتو حلت لباب وطلعت قاانية على شنايفو جلست سادة لباب وعقلها وقلبها منوضين حالة ضارت شافت فيه وعقلها ربح منين مد حنكو وبعدت وجهها) وااا مراااد!!
اورطيغا: (هز حاجبو) الصحرا وحميد زهير معاك
ملاك: وصافي هضرنا
اورطيغا: مهضرناش انا اصلا مقلت والو وتنبغي نبوس ونتباس
ملاك: (بقات غير كتشوف فيه)
اورطيغا: بلݣي عينك فية
ملاك: (جات بغات تحل لباب وشد يدها للي بقا مكوانسيها فبابها مقرب ضورت عينها وطلعت معاها الصهدة شافت الفووق) صافي صافي منخرجش
اورطيغا: (فنفس الحال بقا كيطل عليها من تحت راسها وهي مدورة وجهها كازة على شنايفها، تبسم بعد باش يخليها على راحتها رجع بلاصتو مقاد الجلسة مفرق رجليه كيشوف فيها) غنسافر
ملاك: (دغيا ضارت عندو) عاد كنت مساافر
اورطيغا: ماشي شي مساافرة غنمشي غير هنا
ملاك: فيين؟!
اورطيغا: جهة خنيفرة
ملاك: علاش؟!
اورطيغا: بغيت نبقى بوحدي
ملاك: علاش؟!
اورطيغا: حيت باغي نبقى بوحدي املاك اصلا كل عام تندير هاكا تتوصل واحد لوقيتة تنهز مسائل ديالي ونمشي
ملاك: (متقبلاتهاش بقات غير سااكتة)
اورطيغا: مالكي؟!
ملاك: معرفتش نتا عاد كنت مساافر شنو مزال باغي عارفة دزتي بوقت خايب ولكن (مقدرتش تقول وانا لمن تخليني!!)
اورطيغا: ماشي مسألة دوزت شي وقت ولا شي حاجة انا هاكا تيعجبني راه قلت ليك تتوصل واحد الوقيتة تنهز خيمتي وتنمشي لشي قنت نجلس شي يامات رتاح من الخدمة والبشار وترجع
ملاك: (حركت راسها باه باينة معاجبهاش الحال وهو مفهمش!!! شد يدها شافت فيه)
اورطيغا: شنو مقلقك؟! انا مولف تنمشي نبقى بوحدي
ملاك: (نترت يدها) منين باغي نبقى بوحدك علاش جيتي تقولها لي
اورطيغا: مال جد أمك راه غنمشي ولكن حتى حاجة مغتبدل معاك نتي (كتشوف فيه متايقاش، بقى كيفهمها هو عزيز عليه يمشي لشي طبيعة يحط لاطونط يجلس بوحدو يصيد كيصفي دماغو فيها مزيان وكيرجع ودابا غيجلس غير 3 أيام)
ملاك: (بقات غير كتشوف حتى فرحت باش تبقى تخرج عندو تبدل الجو حيت كتفرح بزااف وهي معاه وتزيد تعارف معاه كتر ها هو عاود غيسااافر!!!)
اورطيغا: واااا لبنت
ملاك: اوا انا كتقولي سفر لا ونتا غير هاز صاكك ومدرح
اورطيغا: (تبسم) تبغي تمشي معايا
ملاك: سير تزمر (شدلها فك فمها كيديه ويجيبو وهي كتنتر) صاافي صافي طلق
اورطيغا: سمعي مبغيتش نتقابل مع الوالدة دابا حيت معصب على داكشي للي دارت وفمي تيكون قبيييح منين تنتعصب
ملاك: حتى هي معذوورة امراد تنوض تهز خيمة وتطج؟!
اورطيغا: ملاك باغي نبقى بوحدي كما قلت ليك تنصفي عقلي راه ماشي غير هادشي راه حتى الخدمة عيااتني فعقلي كتر
ملاك: اممم!!! مهم انا خاص رجع
اورطيغا: صافي هاكا الناس تيتوادعو!!
ملاك: هاكا انا كنودع (خرجت من حداه وحتى هو هبط مفاهمش واش مساخياش بيه ولا شنو!!!)
اورطيغا: اجي اداك البخووشة
ملاك: ملاك الله يخليك
اورطيغا: لالة غزالتي ملاك.. (عوجت فمها، كانت لابسة غير سبرديلة مكانتش عوالة تلقاه مشا الكوفر جبد كرسي ديال الطموبيل تبسمت عاجبها الحال بقا كيدير بحال كيقلب عليها) واش مكتشوفنييش
اورطيغا: (حنا راسو) حسابلي مشيتي!!
ملاك: (دارت يدها على خصرها كطلع وتهبط فيه وهو كيظحك) بنادم!!!
اورطيغا: هزي ديك الكرطوونة (هزاتها كانت ديال الألعااب سد باب الطموبيل برجلو وتمشاو) شي نهار غتفرݣعي
ملاك: (ظحكها ولكن اكتفت بابتسامة) شكرا
اورطيغا: هادو لزريقة
ملاك: ههه وينووو شحال حنيين كيفكر لأنير (هز حاجبو فيها مكيعجبوش للي يقولو حنين، وصلو للطموبيل ديالها جبدت الساروت من صاكها حلت الكوفر دخلو هداكشي وسد لكوفر)
غتمشي دابا؟! ولا غتقدا
اورطيغا: شنو غنتقدا؟!
ملاك: لحم ودجاج وداكشي للي غتحتاج
اورطيغا: وشنو الهدف من هاد الخرجة الا تقديت هادشي
ملاك: معرفت على الاقل دي معاك غير شي خرووفة تماك شويها
اورطيغا: اهااه وندي معايا دوا لحمر والفاصمة كل مرة نقطع منها شوية ونداويها!! ههه فين غنحطها ابنتي وانا تماك تنصيد هنا فين كاينة الحلاوة
ملاك: (عوجت فمها) موووهيييم
اورطيغا: انا نوصل ونصوني عليك علميني بشنو تديري!!
ملاك: طريق سلامة فين غتمشي حقا!!!
اورطيغا: مزال معرفت بالظبط الألوو بيناتنا
ملاك: وبووحدك؟!
اورطيغا؛ (تبسم هاز حواجبو)
شوو طريق شنو جااايبة!!!
(عقدت حواجبها)
ياله دخلي لخدمتك الدعوة ناشفة عندك أبنت رشيد
(تمت ماشية دخلت وهو بقا متكي على طموبيلتها حتى وصلت للباب ضارت دارتلو باي باي تبسم معاها عاد دخلت وهو مشا لطموبيلتو ونيشان شد طريق خنيفرة...)
ملاك: (كانت مور باب منين شافت طموبيلتو مشات خرجت لطموبيلتها حلت الكوفر، شافت كرطونة اللعب للي جايب ليه عجبها الحال واخا مفهمتش ديك باربي واش ليه ولا ليها بقات غير كظحك، رجعت دخلت كملت خدمتها وهي تصوني عليها وفاء علماتها غترجع فلعشية واش خاصها شي حاجة!!)
خاص غير نتي ترجعي
وفاء: فلعشية هاني عندك ازين...
أمينة: (وصلو دازو لدار السعادة سولت العساس واش ولدها الفوق علمها انه خرج رجعت صونات عليه) فينك اولدي
اورطيغا: مسافر الوالدة
أمينة: واخا اولدي هانا وصلت لفاس
اورطيغا: على سلامتكم، شي 3 ايام ونجي لتم
أمينة: الله يجيبك على خير اولدي (رجعت للطموبيل موجهة الهضرة للحاج) مشا سافر (ركبت)
مفتاحة: اوا وخدمتو؟!
أمينة: سيريلها بلاصتو
الحاج: (حنحن وهوما يسكتو كل وحدة ضارت كتشوف فالقنت لاخر، وهو مهضرش حيت كان باغيه يخرج باش يصفي راسو اصلا هو للي علمو هاد القضية وكان كيشجعو عليها كما كان حتى هو فأيام الشباب ديالو وصلو للرياض مشاو يدخلو شريف هو للي كيخرج الحوايج ودخلهم أمينة طلعت لبيتها نيشان تابعها الحاج)
شوية دابا أمينة!!
أمينة: غيجيك الظحك الا قلت ليك دابا عاد رتاحيت من جيهة دارنا واخا مات بّا الله يرحمو ويغفر له
الحاج: علاش نظحك مكاينش حسن من الصلح مع العائلة ولكن مك ويمكن شي خووتك
أمينة: انا كيهمني غير مّا راك شفتي تفارقت معايا غير بدموع (تنهدت) اوا للي فات الله يسمحلها علييه
الحاج: معليييش نتي مولات القلب لكبير
أمينة: (تبسمت معاه حيت مزال وااقف معاها كما نهار اللول كبرو مبدل فيه واالو معاها) لهلا يخطيك علية ابنسليمان
الحاج: (حرك راسو باه كيحط حوايجو ناضت كتعاونو) حاولي متصونيش على مراد هاد 3 ايام غيبرد ويرجع كما كان
أمينة: منقدرش واخا نسمع غير صوتو...
~~~~~~~~~~~~~
ملاك: (كانت كملت خدمتها صيفطاتلو ميساج واش وصل صونا عليه) فين وصلت؟!
اورطيغا: عين اللوح
ملاك: زوين تما؟!
اورطيغا: حتى هنا موصلتيش؟!
ملاك: معقلتش كنت صغيرة واحد المرة مشينا لمنابع ام ربيع واحد نهار، نتا تماك غتمشي؟!
اورطيغا: دابا راها عامرة غنمشي نتكمش فشي قنت مبعد على البشري
ملاك: مزيان ولكن مكتخافش فالليل؟!
اورطيغا: لا، بلعكس هادشي تيربي فيك متخافش غنجيبك شي نهار معايا
ملاك: لاااا نخااف كتعجبني الطبيعة اه ولكن باش نبات فيها هاكا فلخلا!! لا منقدرش
اورطيغا: معايا غييير مغتخافيش بلعكس غيعجبك الحال (بقات سااكتة) داك دماااغ!!!!
ملاك: لا غير تفكرت شي حاجة
اورطيغا: اممم علية، ولكن بالصح تيكون جو غزاال غتنساي رااسك فيه..
ملاك: (بقات كتهضر معاه حتى وصلت للدار حطت الطموبيل كتشوف فلمرايا باها جاي) مراد بابا واقف كيتسناني
اورطيغا: صافي غير قطعي حتى انا نشوف اشمن طريق نشد حيت الطموبيل غنحطها بعيد شوية
ملاك: (قطعت ممعيقاش حيت باها واقف حدا لباب حلت لباب متبسمة معاه) بابا!! (باستو فيدو)
رشيد: (الله يرضي عليك) دابا مزيان فالصوݣان
ملاك: خصني غير نشد بيها شي طريق طويلة باش زعما نجرب
رشيد: كتمشي بيها لفاس
ملاك: لا طريق طول
رشيد: سيري لفاس ورجعي وعاودي سيري
ملاك: ههه وعلاش الخسران نمشي لشي مدينة فيها لبحر نعوم ونرجع (جا يعبس) وغير مثلا ابابا غير مثلا وأصلا منمشي حتى لشي قنت الا مكنتيش معايا
رشيد: اممم حتى لشي نهار
ملاك: (حركت راسها باه وللي فنفسها غير على الملامح للي فوجهها) حقا راه شريت كرسي لأنير باش يبقى يخرج معايا
رشيد: (مشات الكوفر تابعها حلاتو ووراتو كرطونة االلعاب عاجبو الحال شاف فالمونيكة هازها) حتى هادي (بقات كظحك حل الكرطونة ديالها كانت مونيكا بالدوبياس خرجت عينها اول مرة تعرف كاينة مونيكا غير بالدوبياس!!!!)
ملاك: (محشمة مكانتش قلبتها حيت كانت فالعلبة ديالها) تحم ولد لحرام بدلهالي يمكن ولا بالغلط كنت جبتها زعما لبنت عمي
رشيد: معليش (ردها دغيا للكرطونة) رديهالو.. الله يرضي عليك ابنتي
ملاك: امم هاد اللعب أنا للي شريتهملو ولكن الكرسي محسوب عليك (بابتسامة عريضة )
رشيد: ههه (هزو كيشوفو كان جديد) بشحال
ملاك: (نسات مقلبتش على الثمن ديالو) عطيني غير 500 درهم مخساراش فأنير نقيمو انا وياك صبر
رشيد: (كيظحك على هاد البنت للي عندو جلدة جبد من جيبو فلوس حسبهم وعطاهم ليها، وقف حداهم حمزة) اهلان اهلان
حمزة: (سلم عليه ومد يدو لملاك للي خلاتو بلاكة وهزت االكرطونة حطاتها فالكرسي باش تهز كولشي جمع يدو محرج)
كداير اعمي لباس عليك
رشيد: الحمد لله اولدي كداير مع السربيس
حمزة: هاحنا اعمي كنسلكو، ملاك لباس عليك
ملاك: الحمد لله، بابا انا مشيت
حمزة: نهز معاك شي حاجة اختي ملاك؟!
ملاك: (كتسبو فنفسها) لا شكرا (زربت كتمشي مخليااهم حتى سمعاتو كيعيط باسمها وزاارب غير وصل حداها طلقت غوتة على جهدها) شفااااااااااااار واااا عتقووو الرووووووح شفااااااااار....
ملاك: (خرجو الناس تماك وهي ببرود كملت طريقها متقلها داكشي لي هازة خرجت نجية كتسول)
نجية: شنو طاري؟!
ملاك: معرفت شي وحدة مشات كتغوت من الجهة لوخرا يمكن تݣريسات
نجية: الله يحد الباس هاد الزنقة من ديما كانت نقية وصلوها حتى الشفارة
ملاك: مزال يخرج منها العجب (كدق باب دارهم حلت ليها بنت عمها) بسلامة خالتي نجية (شافت حمزة جاي مخنزر دخلت للدار وسدت لباب كانو شي ضيااف مشات لبيت مها نيشان كان خاوي حطت داكشي مفاهماش هاد حمزة للي العام كامل حداه ومدارش عاد الحالة علاش دابا كيدير هاكا؟!! علاش باغي يخلق ليها المشاكل ميمكنش يكون هادشي حب!! واش غير حيتاش معطاتوش وقت وموصلهاش!!! شنو كان متوقع منها دير هو بمرتو وهي تكون العشييييقة **** ديالو!! دخلت مها لقاتها عاقدة حواجبها وجالسة)
زهرة: مالكي؟!
ملاك: هداك حمزة مبغاش يبعد مني
زهرة: ولد نجية؟!
ملاك: اه راه ديما واقف علية وكيبغي يهضرني بالزز طلعلي فراسي
زهرة: دارلك شي حاجة؟!
ملاك: (بزعفة) مدارش ولكن راه جهل واش هو بمرتو شنو باغي مني يانا؟!
زهرة: دابا نهضر مع مو
ملاك: هضري معاها اماما راه بزاااف على داك تبرهيش للي كيدير غيخلقلي غير المشاكيل
زهرة: مع باك؟!
ملاك: نتي عارفة بابا الا لقاه داير لي هكاك راه يقتلو وعاد غيشوهني مع الناس
زهرة: معامن؟!
ملاك: كفاش معامن راه كيتبعني فزنااقي تبعني حتى لفاس هو مزوج وكيجي يوقف علية اي واحد شافني شنو غيحسابلو انا !!
زهرة: (معطلتهاش هزت تيليفونها كتصوني) نجية اجي عندي الا كنتي مسالية (قطعت) واش دارلك شي حاجة خايبة
ملاك: اه دارلي غير يوقف علية راه دار، يبعدني ولا غنوصلو لشي شوهة خاايبة والله حتى نمشيلو بلاصة خدمتو!! (دخلت للحمام هازة بيجامتها، دخلت نجية كتسمع هضرتهم توضات وخرجت عندهم)
زهرة: نجية هضري مع ولدك يبعد ملاك
نجية: (باحراج شافت فملاك) علاش شنو دارلك ابنتي
ملاك: خالتي فهميه هو راه مزوج شنو بغا مني انا راه كيظل تابعني فالخدمة فالزنقة نتي عارفة بابا ولا عمي مغيتفاكوش معاه وعاد زعما كيبغيوه صافي انا ويااه مكتابيناش لبعضيااتنا يتهلا فمرتو وفبنتو ولا ولدو ويقيلني عليه انا
زهرة: نهار اللول قال هادشي ممسلكوش صافي يبعد من لبنت هضري انجية،
حيت صاحبتي وعزيزة علية هضرت معاك نتي اللولة منخليوش هادشي لرجال للي مكيعرفوش حتى يتفاهمو!!!
اورطيغا: (وصل لبحيرة أݣلمام كانو ناس قلال كما كيعجبو الحال حط لاطونط ديالو تحت ظليلة بين شجر قاد الكرسي حط حويجااتو فأمان حيت ماشي أول مرة يجي هنا وعارف ناس المنطقة موقرين الناس للي كيتريبييو، حط التيشورت للي لابس وهبط غطس فلما شي 5 دقايق وطلع جلس فوق الحجر كيرد النفس وكيشوووف بعييييد سااهي...)
~~~~~~~~~~~
خديجة: (حست باحراج كبيير كولشي كياكل بالفرشيطة والموس بقات غير كدور عينها فيها الجوع ولكن مغديرش دير فراسها الظحك كلات غير الخضرة مبعدة من ستيك دلحم شافت فيوسف للي مكلاش بزااف وغير سااهي همست ليه)
مالك؟!
يوسف: والو، متتاكليش؟!
خديجة: لا.. نتا لي مكليت واالو!! (مجازبش) يوووسف مالك
يوسف: والو اخديجة من بعد غير كملي فداك احبيبة...
الغالية: يوسف مالك احبيبي شنوو شد الشهية ديالك!!
يوسف: والو، غير كليت شي حاجة فالخدمة!! (شاف فغيثة للي كانت دايرة لكيت وكتاكل) غيثة!!! (حركتها مها هزت راسها وزولت لكيت)
تتشوفي من الاداب نكونو مجموعين ونتي عازلة راسك؟!
غيثة: لا غير كنت تنتصنت
يوسف: هادشي ديريه فبيتك ماشي وحنا مجموعين ولا حنا عندك زايدين ناقصين؟!
خديجة: (بغات تدخل تبرد السوق وخاافت من شي قمعة مغدخلش فشي حاجة للي ترجع عليها بالخايب كما كانت فزواجها اللول, واكترية كتشوفو معصب من جهة اختو ومغيكونش هدا هو السبب حيت غير قبيلة كان تعامل معاها فشكل ودابا فشكل)
الغالية: خااك عندو الحق ابنتي
غيثة: (كتأفأف حيدت الكيت من ودنيها) مزيان هاكا
يوسف: مزال خاصنا نهضرو على بزاف الحوايج (شافت فمها واش عاودااتلو) الا كملتو نمشيو؟!
خديجة: (فنفسها وااخيييرا تمشي للدار وتاكل شي حاجة على متعلم لهاد الموس والفرشيطة!! ناضو من تماك من بعد مكملو ركبو فطموبيلاتهم ونيشان للدار)
غيثة: انا غنخرج عند لبنات
يوسف: دخلي اغيثة بغيت نهضر معاك
غيثة: خويا نتا مزال هنا نمشي دغيا عند لبنت ونرجع
يوسف: واخ (تم خارج معاها مستغربة) انا نوصلك عندها
غيثة: (كمدتها ومشات معاه موصلها عند صاحبتها دخلت وهو بقا برا، صونات على ادم للي كان كيتسناها)
مصالحش يوسف لاسقني..
غنجيو بلاتي للرياض...
علاش مغتجيش؟؟
لا اورطيغا مكاينش.. اه متأكدة
سمعتها غير من عند خويا..
معرفتش.. للي تنعرف تيمشي للطبيعة يتريبي..
اممم.. صافي انا نتسناك..
راسي تيضرني بزااف...
صافي واخ..
(قطعت مشات سلمت على صاحبتها ودارت حجة جابت من عندها شي حاجة ورجعت عند خوها للي كيستفسرها على أحوالها...)
من بعد مخرجت نجية من عندهم مفقووسة عارفة ولدها باقي باغي ملاك ولكن ماشي لدرجة يتبعها ويخنقها ملاك بقات جالسة فلبيت مع مها
زهرة: بنتي غير هادشي للي كاين مدارلك حتى حاجة خايبة
ملاك: كتر من هاكا مكاينش راه تبعني لخدمتي لفاس وحتى فين سكنت دارلي الشوووهة!!
زهرة: ولد لحرام المفشش الي ولدو!! صافي ها مو غتهضر معاه شنو هادشي
ملاك: شريتو لأنير فين هو؟!
زهرة: سبحااااان الله (بفرحة بقات كتشوف الكرسي وهزت كرطونة ديال اللعب هزت ديك باربي) ليك
ملاك: اه عجباتني
زهرة: ههه هبييلة ومالقيتي غير هاد لباس
ملاك: ويييه
زهرة: (عنقتها بيد) هانتي درتي عقلك
ملاك: اوا عقبالك
زهرة: ههه اوا الله يمسخك (عجبها الحال) مزيان بعدا تخرجييه
ملاك: اوا غير على وجهك
زهرة: اممم على وجهي يانا (ضرباتها للقرفدة) ولا لقيتيه بعدا سبة
ملاك: (تبسمت كتلعب بحواجبها) بجوج
زهرة: والله يااا مك و...
ملاك: متحلفي علية منحلف عليك الا 30 قربنالها شنو بغيتي ندير نبقا حداك غير كنتنهد ونتغبن خليني نضبر على راسي الله يرحم بيها الواليدين
زهرة: وكتزيدي تخرجي عينيك يا الكلبة
ملاك: اوا زعما راني تربيتك معندي لا هاك لا هاد مكاين غير أغراس أغراس (نيشان)
زهرة: نوضي تعاونيني راه ختك وراجلها غيجيو
ملاك: شنو ندير انا
زهرة: نديرو شي شهيوة غيجيو غير لكاسكروط حيت غيتعشااو عند مينا باش يعزيو
ملاك: نعاونكم ولكن تعاوديلي بالنقطة والفاصلة على خالتي أمينة...
~~~~~~~~~~~~~
خديجة: (صونات على وفاء لقاها فاس وغتمشي لصفرو وعلماتها حتى هوما غيمشيو تسناهم ويديوها معاهم.. مشات للكوزينة فيها الجوع مكيناش الخدامة تمااك ومزعمتش تحل الثلاجة حيت كتحس براسها غير ضيفة بغات تخرج وهي تجيها الغالية للي حاضيااها)
الغالية: اش كنت تتعمل فكوزينتي
خديجة: والو كنت بغيت نشرب
الغالية: تشرب؟!! علاش مكاينش الما فبيتك؟!
خديجة: كنت باغية لما بارد
الغالية: خرج علية من كوزينتي
خديجة: (تصدمت بقات كتشوف)
الغالية: باغا تسحرلي يا المشعودة؟! قالك باغيا الما خرج ولا نجيبلك البوليس!!!
خديجة: (حتى بغات تهضر وخرجت حابسة البكية فيها متنتفها ݣاع وتشتف عليها فديك الكوزينة ماشي غير تهضر ولكن!! طلعت لبيتها معصبة مفقوسة حيت مردتش عليها بقات تماك كتاكل فراسها...)
اورطيغا: (شاف فتيليفونو كتجيه غريييبة ميساجاتها اتصلاتها قلاااال حتى حبيبة كنبغيك داك لكلام منعدم ولكن مرتاح معاها وإعجابو بيها كبير وللي حيرو انه كفاش صاابر ومخلي الامور ماشية دقة دقة اما هو كيبغي يحرق المراحل عاد يسول على سمية لبنت!!
صونا عليها مجاوبتش عاد رجعت هي صونات قطع وصونا عليها)
فين غابر الزين ديالي
ملاك: (تبسمت) كنت تنوجد مع ماما فلكوزينة
اورطيغا: اممم الحداݣة نعاماااس!! شنو تتصرعي
ملاك: ههه كنصعّر غير بناادم هاد الساعة
اورطيغا: هه هادي عارفها، بالصح شنو تتعرفي طيبي؟!
ملاك: الا قليت بيضة متقولها لحد
اورطيغا: الله يبشرك بالخير وشنو كنتي تديري مع مك؟!
ملاك: كنعاون وصافي نغسل ميعنات نقرب ليها شي حاجة بحال هاكا!! جاية خديجة ويوسف يجلسو معانا فلعشية
اورطيغا: اممم مزيان غير هو تبتي شوية
ملاك: علاش مالي كيفاش كتشوفني
اورطيغا: معرفت داك الظحك بزاف مع يوسف وتوشويش متيعجبنيش
ملاك: راه بحال خويا وراجل ختي وانا ويااه كنا اص..
اورطيغا: هاد الهضرة كوليها تبتي الله يرضي عليك
ملاك: بففف
اورطيغا: تفرݣعي متنقولش شي حاجة فسما للي باين باين
ملاك: واش نتا مكتيقش فية؟!
اورطيغا: ماشي مسألة ثقة ولكن تنبغي داكشي يكون غير لية متنبغيش نتشاارك فييه مع حتى شي واحد كما بغا يكوون
ملاك: حتى هضرة عادية؟!
اورطيغا: نتي عارفة شنو تنقصد
ملاك: انا ويوسف جامي تعدينا الحدود هو كيعتابرتي ختو وانا هكاك
اورطيغا: يوسف ختو هي غيثة وخوك نتي هو أنير هو راجل ختك نقطة ورجع لسطر
ملاك: عندك شي مشكل مع يوسف
اورطيغا: واش صايط لمك الريح فداك العقل الهضرة للي قلتها ليك تنعني بيها كوولشي ماشي غير يوسف انا مكافيكش باش تعاودي وتظحكي وݣاع داكشي لي باغية
ملاك: الا كانت غتطبق هاد الهضرة علية وعليك
اورطيغا: (هز حاجبو) معامن تتشوفيني معمر وقتي؟!
ملاك: معايا ولكن كاين شي حوايج حتى انا مكيعجبونيش
اورطيغا: مثلا!!
ملاك: اخر مرة نشوفك ماد هداك الحنك مع شي زبلة ومنين تشوف شي وحدة دير راسك عندك زهايمر ولا شي هبيل مضهصص مشغلييش مهم حدوودك متفوتش سلام لباس الله يعاون!! اه وغيثة راها خت يوسف.
ملاك: (مسمعات والو منو) اوا جااوب!!! اه ويوسف راه بحال خويا وواحد من العائلة غير باش تفهم ومتبقاش ماشي غلاط كنعاملو بحال محمد بحال حميد بحال عبد الهادي
اورطيغا: اممم
ملاك: (عصبها وهو ميجاوب مبرد وعاد ظحك فاش جبدت غيثة) شنو اممم انا من قبيلة وانا كنقولك ونفهمك !!!
اورطيغا: انا هضرت ونتي هضرتي المعنى ديالي وصل ليك مكاينش لاش نبقى نعاود هضرتي
ملاك: حتى انا مغنعاودش هضرتي امراد ميمكنش غنقاطع يوسف
اورطيغا: مقلتش ليك قاطعيه ولكن كولشي يكون عندو حدوود
ملاك: (تعصبت) انا حدودي كنعرفها مزياان مغتوريهاليش نتا
اورطيغا: (صاط من الݣارو ببرود) يعني داك كترة الظحك مغنعاودش نشوفو معاه
ملاك: (تجننت) علاش كتبغي تعقدها علاش منظحكش معاه؟؟؟ مفهمتش علاش حكمتي علية بالخايب هاكا من اللول كانت علاقتي معاه محترمة وهاكا غتبقى هو مشفت منو غير الخير
اورطيغا: (اوطوماتيك تفكر نهار عنقها فاش كانت كتبكي فاش جاو خدا سوارت من عندها ونهار قالو كنت حاط العين عليها)
ملاك: وهو رجع واحد من العائلة علاش بغيتني نعادييه وهو مداير لية واالو
اورطيغا: (غير كيكمي)
ملاك: (عصبها مكيجاوبش وهي تقطع) **** تفوو *****
(جلست فوق النموسية عاد كانو بيخيير منين جاب موضوع يوسف عاود!!! سمعت صوتهم جااو مخلاش ليها المورال للي تخرج ولكن مها صاوبت الݣوتي زويين وفيها الجوع!!
شافت فتيليفونها منين مرجعش صونا حتى هي مغتصونيش حيت مغالطااش ومغتحزرووش باش ميولفهااش خرجت من بيت مها مشات تسلم عليهم مدت يدها ليوسف للي فهم مكاينش سلام بالحنك جلسو مجمعين)
يوسف: ملاك صافا ؟!!
ملاك: الحمد لله اخويا ونتا لباس عليك كيف دوزتو الهاني مون
يوسف: خاصك تمشي لتماك
ملاك: ان شاء الله والله احسن حاجة درتو (بقاو مجمعين وخديجة مجمعة مع مها ومرت حنينها ووفاء غير كتصنت... شافت فتيليفونها كان وصل ميساج من عندو قلبها زدح خايفة تلقى شي حاجة للي تزيد تغيرها مقراتوش بقات كتاكل ويوسف كيعاود طرائف وقعو ليهم جا باباها للي سلم عليهم عطاوهم لي سوفونيغ للي جابو عجبهم الحال بزااف وفرحو انهم تفكرووهم عياو يشدوهم لعشا ولكن كان خاص يمشيو باش يمشيو يعزيو أمينة.. توادعو معاهم وهي طلعت لسطح ويدها على قلبها خاايفة من شي كلام للي ميعجبهاش مشات للقنت وشعلت تيليفونها دخلت للميساج ديالو كتقراه فنفسها....)
اورطيغا: ""منين تكمل علميني""
ملاك: واضفاك!! شنو هاد *** بففف مفهمتش شنو للي معجبوش فيوسف ياك صحاب ولا معرفت لمهم!!!
(بقات كتفكر شحاااال خاصها تعرف الخلاصة!!! صونات قطع ورجع صونا عليها جاوبت مكرهة)
وي!!
اورطيغا: (كان كيصيد فديك البحيرة) مشاو؟!
ملاك: (بعصبية) اه
اورطيغا: (بهدووء) ملاك, انا مقلتش ليك نتي ماشي محتارمة ولا قللت منك انا تنقول داكشي للي كان بيناتكم كنتو بزوج بيكم سليباطير ونتي مبيقيتيش ديال رااسك
ملاك: (منتابهتش لكلامو) راه كنا غير كنهضرو نتناقشو كيعاود لية صافي
اورطيغا: (شاد ليها الخاطر) هاديك!! دابا هو عندو مرتو يعاود ليها تعاود ليه يعاودوها راسهم نتي لا!! تعاملك غيكون معاه كما تتعاملي مع رجال خووتك لوخرين
ملاك: والا بغا يجي يعاودلي ولا يتشكالي نقولو بعدني!!
اورطيغا: علاش نتي نااقصة مشاكيل باش يجي يزيدك هو!! ونفتارو معندكش علاش يجي يخوي همو علييك!! بنادم كان ظاحك ناشط ويجي واحد يديرلو الغمة!!
ملاك: (كيهدئها شوية بشوية) ماشي هكاك ولكن مكيعجبنيش نتقلب على بنادم
اورطيغا: مقلتش تقلبي ولكن شي حدوود خاص يكونو باش متلقايش مشاكل لا معايا لا مع ختك
ملاك: معرفتش علاش كتحسسني بحال انا ويوسف بيناتنا شي حاجة اخرى معجبنيش هادشي امراد
اورطيغا: انا لوكان عرفت اصلا كانت بيناتكم شي حاجة كنت عمري نجي نهضر معاك واخا يكون غير اعجاب ديال دقيقة من جهتك نتي!!
(بقات ساكتة) ملاك (زفر) نتي تتعني لية بزااف وانا متنبغي نتشاركك مع حتى شي واحد!!
الظحك جموع يكون فحدود حيت رجع واحد منكم ولكن شي حاجة كتر من هاكا غترجع بالخااايب وانا قليييل فاش تنتحكم فراسي منبغيش نكون قبيح معاك ومعاه
ملاك: نتا متايقش فية
اورطيغا: آش جاب الثقة لهادشي واش انا تنشرق ونتي تتغربي صافي للي باين راه قلتو مكاين لاش نبقاو فنفس الديسك
ملاك: (بقات ساكتة حتى جات حجرة صغيرة حدا رجليها، هزت راسها كان حمزة فسطح كيديرلها إشارة تجي)
اورطيغا: ملاك!!
ملاك: كنسمعك
اورطيغا: شنو تديري دابا؟!
ملاك: كنهضر معاك ونتا؟
اورطيغا: تنصيد
ملاك: (غوبشت) شنو كتصيد؟!
اورطيغا: عرفتي شي حوتات لقيت هنا بشااااااخ
ملاك: (بعصبية) انا للي راجل ختي جالس علية متهضريش مضحكيش ونتا بوجهك مسنطح جاي كتقولي هاكا!!! (سمعاتو كيظحك.. عطات بظهر لحمزة كتكمل هضرتها)
وكظحك!!
اورطيغا: والله يا مك وتقطعي زطمة وحدة بالطموبيل نخرج فيك راه تنصيد الحوت ابنادم باش نااكل ههه
الغالية: (خداو كرطونة السكر ومشاو يعزيو واخا مغارضهاش تعزي بكترة مباغا تعاود ليها مفتاحة شنو داز فهاد تسافيرة المشؤومة...
العائلة كانت كولها مجموعة فيهم للي عزيزة عليهم أمينة وكاين للي جاي غير على وجه الحاج بقاو جالسين مجمعين حتى نطقت الغالية )
وتقبلووك داركم؟!!!
أمينة: (شافت فيها ديك الشوفة ديال بنيتك!!) بنادم راه كيصبر الغالية، هاحنا كنتقبلو للي يسوا وللي ميسواش جات عليهم ميتقبلوش بنتهم للي معرفت انا اش درت باش تسوليني نتي هاكا!!
الغالية: (بقات غير كدور عينها وشافت فمفتاكة للي حركت راسها كتقولها تسكت)
انا غير قلت حيت عارفاك معاديااهم
أمينة: ايييييوا للي شاف شي يقول الله يستر.. (تفكيرها كوولو فولدها وعارفة حالتو غتكون خاايبة وبووحدو!!!
ناضت من تمااك مافيها متجاوب وترااض ولكن معندهاش المورااال للي طااايح طلعت لسطح فهدووء دخلت لبيت الصابون مع شعلت الضو لقات غيثة صدرها عرياان وادم كيعبز فيها ويبوس فعنقها شهقت بصوت مسموع نادبة حنكها بطراف صبااعها)
ويلي على ولاد لحراام !!!!
غيثة: (عينيها مكمشيين منين تشعل الضو، غير كتشووف اما ادم بعد من غيثة مهبط ليها الديباردوور على صدرها وعاطي بظهر كيقاد راسو)
ادم: عفاك خرجي من هنا
أمينة: ياك اولد الحرام وكان غير معندكش ختك مقنت البنت وعاد كتزيد تهضر (بلا متشعر) هبط ت*** من هنا استغفر الله العظيم تخرجو الواحد على طوعو!!!
ادم: (ضار عندها مخنزر وشاف فغيثة للي واقفة بحال خشبة غير كتشووف ملامحها عادي بحال ماشي هي للي تشدت متلبسة واقفة بحال كتسنى الطوبيس.. شاف فأمينة)
عفاك متقول والو لشي وااحد
(شد فيد غيثة جارها يهبطو وقفت)
أمينة: عرفتي خوتها يسيقو لخبار!! ولا باها ولا عمامها ياكما حساابلك البنت ساايبة
(كتشوف فغيثة بإستغراب كبيييير مكاين حتى شي ملامح الخجل ولا الحشمة!!)
ادم: (مخرج عينيه) انا وياها مصاحبين!!
أمينة: خرج خرج قبل منبدا ندير شراع يدي فيك نتا اللول
ادم؛ (مبغاش يجبد معاها العيب طلق من غيثة وهبط محرج مدام مغوتتش ولا دارت شي ردة فعل مجهدة الا مبغاتش دير الشووهة)
تفو على مصوفجيين!!!
أمينة: (مشات لحدا غيثة ضرها خاطرها عمرها فكرت تلقاها فهاد الموقف وكانت كتمناها عروسة ولدها، وعاد محشمت مرمشت غير وااقفة، تصدمت من هاد الفضيحة وتصدمت فردة فعلها) شنو هادشي اغيثة؟!
غيثة: انا للي بغيت
أمينة: (زادت صدمتها) شنو بغيتي!! بغيتي يبقى يلعب فيك ابنتي لا لا نتي ماشي غيثة للي كنعرف
غيثة: (سالو دموعها بحال كتوݣض عاد شهقت شهقة مسمووعة ودارت يدها على وجهها كتبكي)
أمينة: واش بيك ابنتي فين باغية توصلي؟!!
غيثة: (غير كتبكي حتى جات أمينة كتعنقها) تنمووووت اطاتي أميينة تنحس براسي تنمووووت.....
وفاء: (كانت على اعصاابها من داكشي للي عاشت وحسات بيه وهي فالقبور خلاها غير ساااهية!! لدابا ممتيقاش كفاش وحدة بقرايتها وثقافتها وصلت ليها الدنااااءة باش دير هاد تخربيق؟! وتبع هاد طريق كانت ممرتاحاش ولكن خايفة تمشي لدارهم يجي عندها طليقها للي مبغاش يتفك منها وعاد دارهم للي بغاوها ترجع معاه حيت رغب وطلب والا رجعت لفاس خافتو يوصل ليها وهاد الايام غير صااعر كيقلب عليها كانت دار ملاك هي الأمااان بالنسبة ليها ولكن باغيا تبقى بوحدها!! جات ملاك من الخدمة بكري تغدات معاهم)
شنو خلاك تجي بكري؟!
ملاك: عييت والله كملت شي خدمة وطلبت نجي بكري
أمينة: (دخل رشيد مشات للكوزينة باش تقاد ليه لغدا حيت كيدي للخدامة يتغدااو ويتغدا معاهم) رشيد مي حلو وسهام بغاو يمشيو يعزيو فأمينة
رشيد: الخدمة مزيرة الزهرة خلي حتى لخميس
زهرة: واخ
رشيد: فلعشية نخرجو لمارشي
زهرة: صافي واخا (عطاتو غداتو ومشا وهي رجعت تكمل غداتها مجمعين.. كملو كولها فين تلاحت يتكااو)
ملاك: (منين علمها اورطيغا تلقا شي صاحبو ومن بعد ويهضرو وهي كتفكر واش حتى هو غيوقف ليها فهاد تسافيرة جهة كتقول ماشي من حقو وجهة مباغياش تخسرو ولكن غيعصبها الا حتى هو وقف ليها!!! شافت فوفاء كتشوف فسقف)
وفاء مالكي؟!
وفاء: (طرطقت كتبكي وملاك كضور عينها مفهمتش مالها!! بقات فبلاصتها كتسناها توقف من لبكى)
عييت بزااف املااك
ملاك: مناش؟!
وفاء: ندمت ندمت ندمت علاش تزوجت هداك لحمار من اللول بسبابو انا فهاد الحالة
ملاك: واش على داكشي للي دارلك؟!
وفاء: وهو دار وانا (زفرت) درت
ملاك: مفهمتش واش هو داك نهار عطاك لصاحبو ودابا باغيك تخرجي عندو!! والله مفهمتش واش هاد *** ماشي راجل لهاد الدرجة
وفاء: لوكان كان رااجل ميوصلنيش فهادشي تفوو ندمت ندمت املاك
ملاك: معليش دابا كولشي يفووت
وفاء: مكرهتش نمشي لشي بلاصة بووحدي
ملاك: سيري اصاحبتي محد عندك الحرية تمشي سيري وفكري مزياان انا ماشي كنطردك ولكن بعدا حتى عندك الحرية ماشي بحالي سيري وصفاااي مع رايك
وفاء: (بقات سااكتة كتفكر هادشي خاصها ديرلو حد 8 سنين دالفساد ودايرة كأنها ماشي مسلمة جلستها مع عائلة ملاك بيناتلها بزااف دلحوايج!! بقاو متكيين حتى سمعت ملاك كتجخر تبسمت من هاد المخلوقة قدات ليها راسها للي كان عوج وبقات هي غير كتفكر وتخمم!!!)