اورطيغا: تتشوفيني معصب متجييش تعنقيني نتي
ملاك: هاااااء
اورطيغا: شنو هاد هاااء مترحمي متخلي رحمة ربي تنزل وعاد يبقى فيك الحال من الفوق
ملاك: (هزت كتفها) سييير عندمن بغيتي
اورطيغا: (عوج راسو فيها) انا بااغييك نتي
ملاك: (شقلبت عينها) ولكن نتا متااح للجميع
اورطيغا: ههه انااااا الله يسمح ليك
ملاك: مالي كذبت غير ماشي ونتا ماد هداك الحنك للي شايط عندك
اورطيغا: اممم (دابا فهمها)
ملاك: (تيليفونها صونا كانت مها ونيت تهرب) مهم انا خاص نمشي تعطلت وماما كتصوني باش نرجع
اورطيغا: مزرووبة لهاد الدرجة
ملاك: (ببرود) اه
اورطيغا: (حرك راسو باه راسو غيتفرݣع بالمشاكل ومن جهة مباغيهاش تمشي ولكن هو براسي مغيبقاش فاس) انا غنساافر
ملاك: طريق سلامة
اورطيغا: (هز حواجبو بجوج كردة فعل اما هي كتغلي من لدااخل ديالها، مشا حداها مقرب رجعت اللور حتى تساطحات مع الحيط) مال مك على هاد لقسوحية
ملاك: اولا بعد شوية الله يخلييك خلي مساافة
اورطيغا: (زاد مقرب وحاني راسو كتر هي مبغاتش تقيسو باش يبعد حيت غيزيد يقرب) غادي نساافر وعقلي غيبقى معاك
ملاك: بعد امرااد شوية
اورطيغا: (قرب يدو لذقنها هاز راسها) مكرهتش نديك معايا
ملاك: (تزنݣت كتشوف فشنايفو وديك اللحية مخليااهم، كتعيا تهرب عينها منهم باغياه غير
يبعد ولا غتشوه وغتبوسو اللولة... هربت من تحت يديه) متعاودش دير هاكا امرااد
اورطيغا: (ضار ببطئ) علاش مباغيانيش نقرب منك؟!
ملاك: (سؤال دلخ** بقات ساكتة بحرا كترد النفس)
اورطيغا: (متكي على الحيط) مباغياش نقرب منك؟!
ملاك: مفهمتش هاد تقرب؟!
اورطيغا: انا باغي نكون معاك، نتي شنو باغية املاك؟!!
أمينة: مراااد مراااد!!!
اورطيغا: يااااااا الرب العااالي
ملاك: (تخلعت) ويلي ويلي ويلي مك
اورطيغا: هه مالها غتاكلك
ملاك: سير خرج عندها دغيا قبل متجي (شافتو واقف مشات كدفعو من ظهرو) سييير
اورطيغا: متقيسينييش الله يخليك (كيقلدهت) حتى انا متنبغيش للي يقيسني ومنقيسوش
ملاك: (ميقت فيه) بالفرحات عليك نرضى ونبغي حتى نشووف فييك اعسااك نقييسك
اورطيغا: ههه (غير كيظحك كتبسم حيت كتعجبها ظحكتو منين كيتغمضو عينييه خرج حيت واصل لواحد العصبية ومعاها غييير، خرج لقاها باغية دخل وقفلها فلباب) نعام
أمينة: شكون معاك؟!
اورطيغا: قلبتيها بوليس؟!!!
أمينة: نتا بهاد الخفة خاصك قشلة تهجم عليك
اورطيغا: ههه أأأأ الوالدة فين باغيا تصيفطيني؟!!
أمينة: حيد من لباب
اورطيغا: سيري للدار انا جاي
أمينة: (دفعاتو ودخلت باغية تشووف هاد لبنت للي مخليااه رااازن ساعة مكاين حتى حد هو براسو مفهم والو غير كيدور عينيه حتى طواليط محلول لباب جر مو لبرا) سيري للدار انا جاي نتحاسب مع الدري ونجي..
الغالية: (رجعت للدار كانت غير هي ومرت ولدها للي بقاو فرياض الحاج بنسليمان اما بنتها مبقاتش معاهم بحجة عياانة... مشات عندها لبيتها لقاتها مظلمة لبيت ومتكية)
غيثااااا مالك الحبيبة ديالي
غيثة: (تفكيرها كولو غير فاورطيغا) والو اماما
الغالية: مكليت والو؟!
غيثة: مفيااش
الغالية: نوض احبيبتي ميمكنش تبقاي هاكا كول شوية وجلس معايا
غيثة: مفياش اماما عفاك غير خليني هاكا
الغالية: قول غير مالك واش تخاصمتي مع ادم؟!
غيثة: ماما ألف مرة تنقولهالك انا وادم غير اصدقاء مكاين والو انا غير عييت وصافي
الغالية: اممم.. خوك معيطش ليك؟!
غيثة: لا.. واش هو دابا مساالي لشي واحد راه عريس أماما
الغالية: علاش مالو مزوجلي ملكة الجمال راه مزوج غير هجاالة راه هي للي ربحاات بعزري
غيثة: للي شافك شحال شكرتي فيها قدام الناس لبارح ميسمعكش دابا تتقولي هاكا
الغالية: وشنو بغيتي هادوك زويووات يمشيو يجمعو بية (هزت تيليفونها صونات على خديجة لقاتو اخيرا شعلاتو جاوبت بصوت نعساان)
خديجة: الو السلام عليكم
الغالية: (مغتعاودش نفس الغلطة) وعليكم السلام كيف صبحتو
خديجة: الحمد لله اخالتي ونتوما؟!
الغالية: (عوجت فمها) الحمد لله فاين ولدي؟!
خديجة: كيدوش
الغالية: مزياان باش يتنقى شوية منك
خديجة: (عندها كلام تخليها تبكي ولكن فضلت تبقى سااكتة شافت فالتيليفون بقا فيها الحال وقطعت) ميمكنش بغاوني نعاود نبقى ساكتة ونحني الراس اللهم نقطع
الغالية: هاااكاوا الخانزة مرضااتش غير بلاتي نعريييك قداامو ويعرفك على حقييقتك
غيثة: والله حتى حشومة عليك اماما متتحمليهاش متهضريش معاها ولكن باش تقوليلها هاكا وهي عروسة فرحانة والله حتى حشوومة
الغالية: سكت لمك انا للي عارفة ديك اللفعة، شحال قالو غيجلسو؟! وفين بعدا؟!
غيثة: معرفتش اماما معرفتش
الغالية: (رجعت صونات على ولدها تيليفونو طافي) باينة هي للي طفااتو العاقسة...
خديجة: (لاوية غير ليزار عليها بقا فيها الحال واخا هي مستاعدة نفسيا لكلام الغالية ميمكنش غدوز هادشي على خيير.. خرج يوسف من الدوش لاوي فوطة عليه تبسمت كاع ديك لحشومية واللباقة للي كانت فيه تسيف عليها منين تجمعو تحت سقف واحد.. زاد رد ليها الثقة بالنفس انها مرغووب فيها وعاد تعاملو زوين معاها ومكانش أناني معاها... هادشي مخليها دير عين ميكا على الغالية وقباحة الغالية وسم الغالية!!!)
اورطيغا: (دغيا صدر مو للي عاد بان ليها جموع دخل كيقلب حتى تحت البوطاجي مكشووف ولباقي قجورة فين كاين شواقر ولماس..) ملااااك
ملاك: فلفريݣو لي كان بااارد واقفة كازة والريحة دلحم خانقااها مكتشووف والو ولكن قبل مدخل شافت بزااف ديال سݣايط ديال حوالة وديال لعجول وشي صنادق بلاستيك، قلبها بغا يسكت والدووخة من ديك الريحة دلحم مجهدة اما رجليها مهازينهاااش بالخوف انها فوسط فريݣو ديال لحم!!!
(دقت بيدها، وهو يحل دغيا لباب خرجت من فريݣو لحم ياابسة راه جلست 10 دقايق فيه! بقا غير كيشووف فيها طلعت معاها التبويييعة دايرة يدها على فمها مشا عندها فيها ريحة لحم ومݣلاصية تبسم)
اورطيغا: واش حماقيتي!!
ملاك: (بقات كدور عينها مكاينش حل اللهم حلت صاكها وبقات كترد مدخلة راسها فيه كتغلبها ريحة لحم الا كان غير شوية اما فوسط صݣايط! هو كيلمس فظهرها كيظحك وهي مكرهة من كل مرة يشوفها كترد هزت راسها)
اورطيغا: اجي معايا للحمام واش هبيلة ولا صايط لمك الريح فداك الراس خليها تشووفك شنو غيوقع
(جارها للحمام مدخلها)
شي مرات غير تترݣعي ابنت رشيد
(حل الروبيني كيغسل ليها فمها)
لهاد الدرجة خاايفة تشوفنا بزووج؟!!!
ملاك: (مكتسمع والو غير مراضياااش فهاد الموقف للي كتحط فيه كل مرة معااه ولكن دااخت الريحة وعاد لبروودة جاتها الرجفة وهو كيغسل ليها وجهها)
اورطيغا: (دورها عندو) واش كتحسي براسك دايخة؟!
ملاك: (حركت راسها باه الا هضرت غترد)
اورطيغا: واش داك؟!
ملاك: (حنات راسها جرها عنقها وهي طرطق عينها مهربة راسها دغيا خلاها على خاطرها)
خاص نمشي
اورطيغا: فين غتمشي صاڤاپا نخليك تصوݣي هاكا؟!!!
ملاك: وفاء للي تصوݣ
اورطيغا: وفاء مدايراش بيرمي ريحي للارض
ملاك: (بلعت ريقها جابلها الكرسي جلست عطاها قرعة دلما عيفااها متقدر دير والو فمها وسادة صاكها)
اورطيغا: انا نوصلكم (حركت راسها بلا بقا غير كيشووف جا الدري لي صيفطو يرتاح)
انا جاي
(خرج عندو وهي محملتش راسها فعز اعترافو دارت هاد الفضيحة.. بقا كيتفاهم معاه منين هو مكاينش يعني السلعة غتوصلو غير بحجم عادي ديال البيع فهاد السيكتور واي كموند يجي كبير يصوني عليه باش يرصي مع شريف.. صونات عليه مو حيت تعطل عليها جاوبها باش تسنى عرف غتمشي غير بوحدها والحاج بغا يخليهم بووحدهم عاد عجبو الحال حيت قلييييل فالقليل لي كيبقى مع مو الراس فالراس.. كمل شغلو صونا عليه شريف جاوب هاد المرة)
انا باقي فالمحال... اممم.. علاش امتى عندهم الطيارة؟!.. لا غير سير نتا انا مغنكونش.. صافي ما وقع والو اصاحبي وحتى نتا متديش علية راك عارفني فاش تنكون معصب.. يمشي ي**.. هه واخا.. تهلى.. (قطع)
سير جيب كوكا وتكون باردة.. (مشا الدري هو قاد شي حاجة فالدفتر جابلهالو وتم داخل)
مدخلش ومتخلي حد يدخل...
(سد لباب لقاها متكية على رجليها)
ملاااك
ملاك: (بنفس الوضعية مراضياش) اممم
اورطيغا: (مد ليها القرعة) شربي راه ݣرعتيها لحم
ملاك: ( كتشوف فيه)
اورطيغا: غتحايد ليك الردة (جلست مزيان شدهتها) مووصيبا نتي غير تتشوفيني تتبداي تردي هادشي ومزال مدرنا شي فشي...
ملاك: (هزت عينها فيه دايرة يدها على فمها) واش حمق!!
اورطيغا: شربي بعدا!! (حل ليها القرعة شربت جغمة كانت باردة عاودت شربت شافت فيه لقاتو متبعها قلب وجهو خلاها على خاطرها ناض من حداها حل لفريݣو كيصوط بالبرد رجع سدو مزياان حيت فريݣو دالبخار، اما هي حطت القرعة ودخلت للحمام تفكرت الصاك للي تقيات فيه جاب الله التيليفون دايراه فجيبها جبدت سوارت البزطام وراق الطموبيل عكر باغفان كتغسلهم وعايفة راسها براسها شوية تبسمت كفاش مكيعيفهاش وكفاش غسلها وجهها داك الصاك محملاتش تعاود تهزو اصلا شارياه رخيس دارتو فلابوبيل للي تماك نشفت داكشي الوراق دارتهم فجيبها اللور العكر وسوارت دارتهم فجيبها لاخر وبقات شادة الباغفان والتيليفون والبزطام عاد تفكرت جبدت عكرت شوية رشت من الريحة عاد خرجت من تماك)
احم مراد غيخاصمو علية فالدار حيت تعطلت خاص نمشي
اورطيغا: انا نوصلك
ملاك: لا لا بلاش انا مزيااانة دابا غير (معرفت شنو تقول ولا كفاش توصلها) مهم... انا مشييت
اورطيغا: (بقا كيشوف فيها)
ملاك: شكرا على... (صونا تيليفونها كان يوسف شافت فيه ورجعت جاوبت)
اهلااان بمولاي السلطان... ههه.. ااه.. انا مزالة فاس.. بالصح.. اممم معرفت دابا راها 7 ونص...
(شافت فاورطيغا للي تبدلت الشوفة قالب وجهو كتشوف فلسانو كيتحرك فوسط فمو)
صافي نجي ومن تماك نرجع لصفرو.. واخا.. ههه بسلامة.. (قطعت)
غيمشيو للمطار
اورطيغا: (حرك راسو باه ببرود) ومن بعد !!
ملاك: غير قلت ليك وصافي
اورطيغا: مبقيتيش مزروبة والدار غيتقلقو عليك
ملاك: لا حيت طريقي هاديك وقلت ندوز نشوفهم نيت
اورطيغا: (حرك راسو باه) واخ (مشا هز الصكادو دار كاسكيط فوق راسو وهي كتشوفو دارو فكتفو هز سوارت تيليفونو)
8 نصوني لقاك حدا مك
ملاك: (هزت حواجبها بجوج كترمش) كفاش؟!
اورطيغا: كفاس كيمكناس هضرتي باينة
ملاك: لا سمحلي نقولك واحد الحاجة الله يخليييك متبقاش تهضر معايا بحال هاكا
اورطيغا: (مخضر عليها) غنهضر معاك كيف بغيت وغتقبليها كما بغيييت..
وداك المطار وااااا بربي لحطيتي تر*** فيها مزيان هاكا!!!
ملاك: اش هاد المستوى (ضارت ماشية جر ليها الريحة من يدها)
اورطيغا: اري هادي بعدا
ملاك: عطيني ريحتي
اورطيغا: ياله ياله شريييه محدو رخيص بحرا توصلي لدوااركم
ملاك: (طلعاتو وهبطااتو)
اورطيغا؛ بقينا هنا الا تسنيتك تطلعيني وتهبطيني سيري ابنتي راه عنقك غيعوااج
ملاك: فولݣيييييغ
اورطيغا: اااه حتى نصوني وملقاكش وصلتي.. (خرجت خابطة لباب) نوري لمك ڤولݣيييغ بشحال كطلع!!
يوسف طاايرة تمشي عندو وانا..
بففف غتحمقني هاد نص ميترو (حل لباب خرج وداك الدري للي خدام عندو غير كيشووف لقاها ماشية لطموبيلتها ودايرة تيليفون فودنيها بقا واقف كيشووف وعينيه بحال صقر طلعت فطموبيلتها حتى شاف وفاء قاطعة طريق ركبت حداها وهي بقات وااحلة غير تخرج من بين جوج طومبيلات وهو متبعها حتى خرجت وزادت فطريق مكضوييش...)
وفاء: غنمشيو عند خديجة؟!! صونات علية راها فالمطار مشات بكري على حساب شي حاجة تماك
ملاك: (مغوبشة ومغصبة وفالاعماااق عاااجبها الحال) تعطلنا وماما صونات علية بابا محيح براكة غير خلاني نبات لبارح برا الدار
وفاء: الا كان يتجبد ليك صداع بلاش
ملاك: شوفي انا عارفاك كتهضري مع مراد
وفاء: ههه والمطلوب؟؟
ملاك: الا سولك واش مشينا للمطار قولو اه
وفاء: وعلاش؟!
ملاك؛ هو كتقوليلو علاش ولا حادݣاها فية غير انا
وفاء: هههه وغير كتنݣري بااز على السنطيحة للي عندك
ملاك: مهم عنداك تقولو مشينا للدار نيشان
وفاء: واخا لالة عاوديلي شنو قالك
ملاك: والو غير شي حاجة من بعد من بعد...
ليلى: اممم اه حقا قبيلة عرفتي شكون تلاقيت؟!
ملاك؛ شكون؟!!
وفاء: شريف خو اورطيغا كنت فالقهوة حتى وقف علية وبغا يجلس صافي هضرنا ومن بعد جا شي صاحبو ومشا
ملاك: مزيان هداك شريف كيبان بعقلو ماشي بحال هاد المجنون مدابز غير مع ذبان وجهو
وفاء: ههه اه ولكن معنديش مع داك ستييل
ملاك؛ بحالاش
وفاء: كيبان ظريف كتر من لقياس هاكا كان الحيماري ديال راجلي فاللول حتى شوية كيتسيفو وأصلا مكنفكرش نتربط بشي **** هاد الساعة
ملاك: اممم.. حقا نساي دخول ولخروج
وفاء: معندي مندير بشي دخول ولا خرووج
ملاك: ماشي كنتحكم غير بابا شوية مزير من هاد الناحية اما نتي مرحب بيك فوق نهزووك فوق راسنا
وفاء: عارفة ازين... (دارت الملحون وملاك اصلا تفكيرها فيه وزاادت... قالها بغيتك!! تسناها تجاوب وهي مابغاتش تجاوب حتى تعرف بالصح واش كيعنيها حيت متبغيش لراسها تعذب عاود على والو!!!)
~~~~~~~~~~
اورطيغا: (طلع لقا مو جمعت حوايجها) انا نزيد شي حاجة فلحوايج..
(دخل لبيتو دار باغفان ديالها فالصكادو هز حتى تيليفونها لقديم وزاد شي حوايج خرج لقاها كتسورت البيت ديالها حتى هو سورت ديالو حيت فام دميناج كتجي مرة فالسيمانة تنقي الدنيا)
صافي الوالدة!!!
أمينة: صافي اولدي فين غنمشيو؟!
اورطيغا: الحسيمة
أمينة: (حركت راسها باه) متوريناش الزين ديالك خلاص
اورطيغا: (دار يدو على ذقنها محركها) ها هو
أمينة: ههه الله يحفظك لية اولدي (خرجو من تماك ركبو فطموبيلتو صونا على يوسف)
اورطيغا: مشيت للمطار؟!
يوسف: اه، جابنا شريف اجي حتى نتا
اورطيغا: شريف بوحدو ؟!؟
يوسف: اه غير هو، علاش؟!
اورطيغا: ياله طريق سلامة فين بعدا؟!
يوسف: زانزيبار
اورطيغا: شماااااتة (لاخر بقا كيظحك حيت هو مول الفكرة و شحال وهو يشكر ديك لبلاصة وكانت أمنية ديالو يمشي لتماك) ياله بصحتو
يوسف: ههه يعطيك الصحة
أمينة: (من بعد مقطع) فين غيمشيو؟!
اورطيغا: الصومال
أمينة: (دارت يدها على حنكها) أحِّييبيي...
اورطيغا: ههه اوا شتي نتي للي مصيفة ماشية لبلاصة حسن منهم...
خديجة: (صونات على ملاك للي كانت فطريق لصفرو) ياك قلتي غتجي؟!
ملاك: (كتهضر ومحملاش) بابا محيح راكي عارفة والا جيت لتماك غنزيد غير نتعطل ويظلام علينا الحال
خديجة: (بعدت شوية من يوسف للي مجمع مع شريف)
فين هاد لبلاصة املاك للي ماشيين ليها
ملاك: (ظحكتها) زانزيبار ازمر
خديجة: اش هاد زمر عاود فين كاينة
ملاك: ههه مورانا
وفاء: غيمشيو زانزيبار ؟!!!
ملاك: اه
وفاء: ياك قال ليها اوروبا فاللول
ملاك: يوسف باغي الطبيعية ويترولاكسااا
وفاء: كنت شفت شي تصاور عليها مزييونة بحال شكل المالديف وحسن ݣاااع
خديجة: ما فيهاش سواق وفين تقداي؟!
ملاك: ههه خديجة راك كنتي عايشة فالشمال اش قضاو ليك سوااق سيري عيشي شوية الحيااة مع رااجلك ترجعي لفاس اراي متقدااي وتشري
وفاء: عندها الصح عيشي اصاحبتي مع رااسك ديك لبلاصة راه غزااالة غزاالة
يوسف: خديجة مشينا؟!! واش ملاك؟!
خديجة: اه (دارلها إشارة تعطيه التيليفون) ملاك هاكي يوسف بغاك
يوسف: فين الآلة ملاك هادي هي نجي عندكم
ملاك: والله اخويا يوسف بغيت نجي ولكن تعطلنا بزااف ونتا عارف بابا ان شاء الله منين ترجعو تلقاوني كنتسناكم
يوسف: انا مقلق منك
ملاك: الا متقلقش سيرو دوزو شهر العسل ديالكم بالصحة والراحة مسبقا
يوسف: الله يعطيك الصحة.. (كمل معاها قطع ودعو شريف ومشااو يكملو الإجراءات باش يطلعو فالطياارة خديجة غير كتشوف هادشي جدييد عليها كملو وركبو فالطياارة صورت وحطت التيليفون فصاكها، بقا يوسف كيهضر ليها على الرحلة للي غيديرو منسييها التقليعة ديال الطيارة رجع جبد تيليفونو وراها تصااور عجبها داكشي واخا كان توقعها غير، ولكن حتى الطبيعة زويينة وهادشي للي وراها راه جنة الأرض)
غير هو احبيبة تقدري تعياي شوية 15 ساعة ديال الطيارة ماشي ساهلة
خديجة: (تبسمت) فخبارك انا كنخاف من الطيارة وأصلا عمرني ركبت فيها، ولكن معاك نمشي فينما بغيت مهم نكون معاك
يوسف: (تبسم هادشي باش كتسااالي معاه) منين نرجعو ان شاء الله غنمشيو شي 3 ايام مراكش
خديجة: ان شاء الله (بقات كتشوف فسما وتنهدت بفرحة مع يوسف عايشة فشكل من كل النواااحي تمنات ديما تبقى حياتها هاكا ومتوليش العذاب...)
اورطيغا: (شاد طريق هو ومو مجمعين وهو صايݣ صونا على ملاك للي قطعت عليه صافي عرف انها مشات لصفرو حط التيليفون كيهضر مع مو فموضوع مهم)
اوا شنو بان ليك
أمينة: صعييب اولدي ميمكنش من بعد هاد العمر كامل نخيرو يعزلي ونتا عارف الحاج شحال كيحماق على داك الرياض وعلى العائلة وجماااعة راه حتى ولادو ساكنين معاه
اورطيغا: اوا ونتي دفني راسك تماك !!
أمينة: ماشي معذبة ݣاع راه حتى انا واحلة ليهم فالقرجوطة
اورطيغا: واش انا بغيتك ترتاحي ونتي تتقولي الحرب ما الحرب انا بغيتك تهناي من شدلي نقطع ليك
أمينة: لا اولدي صعييب منقدرش نسمح فالحاج
اورطيغا: مقلتش ليك سمحي فيه
أمينة: راه الا سكنت بعيد هي سمحت فيه معندي مندير من غير صبر وصافي
اورطيغا: (مبغاش يقولها نتي غير خرجي وانا قاد بيك حيت مكيعجبهاش الحال.. قلبت الهضرة كيهضرو على العرس وحتى هي كتحلم دير ودير)
اشمن عرس الله يهديك
أمينة: مديرش نتا لعرس؟!!
اورطيغا: لا لا نتي عارفة معنديش مع داك الهيت الخاااوي
أمينة: غير حلم اولدي، فكرتني نصوني على خالتك زهرة
اورطيغا: واش جاب زهرة بباش فكرتك
أمينة: (قوست عينها محركة راسها) ياااك راه انا للي والداااك ماشي نتا
اورطيغا: (رجع شاف فطريق صايݣ مغيناقشهاش حيت غتغلبو غير كيسمع وهي كتهضر...)
~~~~~~~~~~~~~~~
ملاك: (وصلت للدار للي مزال عامرة شوية بالعائلة دخلو حوايجهم فبيت مها لبست بيجامة وحتى وفاء)
فية الجووع.. (خرجو من تماك جلسو فوسط الدار بعاد على العائلة)
وفاء: (كانو كيتفرجو فتصاور العرس حتى حطات ليهم زهرة الݣوتي) الله يخلف عليك اخالتي
زهرة: مرحبا بيك ابنتي وميات مرحبا
وفاء:(مشات زهرة) ملاك شنو بان ليك نمشيو نسافرو شي يوماين حتى حنا نبدلو الجو
ملاك: فين؟!
وفاء: معرفت نشوفو
ملاك: ميصلتحش بابا مكيبغييش
وفاء: اااه، غدا غتبداي الخدمة؟!
ملاك: اه... والله مكرهت حتى انا نسااافر (بقات كتفكر فيها)
وفاء: معليش حتى رجعو لفاس ونمشيو شي يوماين لطنجة ولا مراكش مهم لشي بلاصة
ملاك: والله معرفت.. (هزت تيليفونها مكاين والو منو) عݣزت على الخدمة غدا والله حسيت براسي مرتاحيتش ݣاع
وفاء: حتى انا ولكن محتاجة كتر شي تسافيرة لشي شالي قريب لبحر نبقى غير نعوم ناكل ونعس
ملاك: ويييه ولكن شكون خلااك...
وصل الليل لبنات من بعد متعشاو جمعو حتى هوما معاهم الدنيا شوية، طلعو لسطح فين يتبردو شوية
وفاء: علاش كديري الفولار حتى فسطح
ملاك: حيت اي واحد يقدر يطل علية ومجااتش نبقى غير حاضية واش كاين شي واحد حسن ندير فولاري ونتهنى واخا الصهد ولكن كنكون مرتاحة وراني غير لاوياه ماشي قاااجة راسي
وفاء: مزيااان صراحة براڤو علييك..
ملاك: (والو مزال مصوونا) معرفت فين يكونو وصلو يوسف وخديجة
وفاء: واقلة فيها طريييق نييت
ملاك: اممم.. (صونا تيليفونها كان هو واخييييرا) انا جاية... (بعدت من حداها مشات للقنت لاخر)
حم الوو
اورطيغا: زيين...
ملاك: اممم
اورطيغا: فايتة ليك بݣرة!! شنو هاد اممم
ملاك: غنقطع عليك!!!
اورطيغا: متسوليش زعما فية واش وصلت واش بيخير.. متنهمكش املاك؟!
ملاك: (تبسمت) لا غير..
اورطيغا: واش تنهمك؟!
ملاك: اه
اورطيغا: وعلاش متتصونيش وتسولي فللي تيهمك؟!
ملاك: قبيلة عصبتني
اورطيغا: اه التعصاب فجيه وتسولي واش وصلت واش بيخير لجهة اخرى، وطريق هادي انا بعدا بقى بالي معااك واخا غير صفرو
ملاك: (فرنست معارفة متقوول)
اورطيغا: غدا خدامة؟!
ملاك: اه والله ما فية للي يخدم عݣزت بزااف وقنطاانة
اورطيغا: اجي عندي ونصدر مينا
ملاك: ههه تسمعك قلتيلها مينا!!!
اورطيغا: (بعياء) بغيت نشووفك قبل منعس
ملاك: ماشي دابا
اورطيغا: علاش راني شايفك فمااا كفس من هاكا
ملاك: مراااااد
اورطيغا: ديري حسابك من غدا غنبقاو نهضرو ابيل ڤيديو
ملاك: علاش
اورطيغا: تنشوفك نهاري تيدووز بيخيير (فرنست) تنقول شو بنادم كيفاش داير ومتفائل وعايش الحياااة
ملاك: (كيكون ماشي زويين ولكن غير كيطنز كيعصبها!! بقات ساكتة حيت سمعت مو كتهضر معاه)
اورطيغا: واحد شوية ونصوني عليك
ملاك: واخ (بقات غير سااهية كانت موجدالو حتى هي هضرة.. تبسمت باينة لعمى طاااحت فيه وحتى هو هاكا كيبين ليها وقالهالها ݣاااع رجعت حدا وفاء للي متكية كتخرب فتيليفونها) جاني نعااس
وفاء: ياله.. (هبطو لتحت كل وحدة شدت سداري ملاك دارت تيليفونها سيلونص ريݣلت الساعة وجبدت عليها حيت تابعها لفياق بكري...)
أصبحنا وأصبح الملك لله..
ملاك: (فاقت على صوت الريڤي قطعت الصوت كانت داايخة بنعاس مقدرتش تفيق ناضت بشوية خرجت من حدا وفاء اما ولاد عمها عندهم عطلة.. كانو بداو يفيقو لوخرين اما رجال فاقو ومشاو للقهوة وللي بقا من العائلة مشا فحالو بكري مشات لبيت مها لقات أنير مزال ناعس لبست حوايجها وراسها ضارها بقلة نعاس والراحة خرجت كانت مها كتفطر هي ومرت حنينها ومرت عمها جلست حتى هي كتاكل وكتخرب فتيليفونها كان ابيل واحد منو فالليل ولكن معطل كانت نعسات هي فداك الوقت تبسمت فرحاااانة بهاد العلاقة الغريييبة مع هاد الانسان!!!)
زهرة: ضعافيتي ابنتي
مرت العم: الا باغا ضعافي مودة راك جيتي حاالتك والا توكااال
زهرة: واااااهياا ناري اسهاام
سهام: اوا جري على لبنت غير جوج معاشق ماشيين على رجليها
ملاك: هههه
مرت الجد: اوا شحال وهي مسيكينة فاس خدامة مكاين لا لي يطيب لا والو تبقاي دوك المصارن كرمو بماكلة الزنقة
زهرة: ومع هي حادݣة تبارك الله
ملاك: كنت كناكل
مرت الجد: راه جابتلي بنت ختي دوك حبوب اللقاح كل صباح نبقى نعطيك معلقة فصباح مع العسل غيرد ليك الصحة (وقفت) دابا نيت نجيبها ليك
ملاك: واخا مي حلو (شربت اخر جغمة وناضت كتسناها جابتلها معلقة كلاتها بايت ليها يدها وراسها) انا مشيت (غسلت فمها ووجهها دارت اكخون ومشات خرجت زاااربة معطلة ركبت فطموبيلتها هاربة من باها حيت رجع غير كينݣر وصافي، مشات للخدمة من بعد مسلمت وجمعت وهضرت مع المدير باش الا كانت شي حاجة فاس هي تمشي.. رجعت لبيرو قدات شي خدمة وصلت 11 مزال مصوناش زعمت راسها بغات تصوني وهو يصوني أبيل ڤيديو دغيا دارت الفلتر فالكاميرا ديالها وبقات كتفكر تجاوب ولا لا!! جاوبت كتقلب فالصاك على لكيت للي مكيخطاوهااش ولكن دابا غبرو
شافت فيه كان فلبحر وأشعة الشمس ضاربة فوجهو وشعرو فاز مغمض عين وعين حالها للي مع حمورية ماء البحر ولونهم مخلياهم زوينين وعاد لبرونزاااج للي باين فيه)
شي مبحر شي خدام
اورطيغا: هربي من عند باك واجي عندي..
ملاك: ههه صعييبة هادي ولكن سعداتك
اورطيغا: علاش
ملاك: كتشمش عادي حيت الكحولية معندها ما تدي منك
اورطيغا: ههه (عرفها كترد الصرف طلت مينا وهي تهرب وجهها وحتى هو خبع التيليفون) اش تديري الوالدة!! لبنت عندي تتحشم
ملاك: (عاضة على شنافتها مفرنسة مدورة الكاميرا لسقف وكتشوفوو مقرب وجهو للكاميرا وكيهضر مع مو)
أمينة: وااا قولها غير انا وبغيت نشوفها..
اورطيغا: سيري دخلي ديري شي غطسة واش انا بالريق باش رضات تهضر معايا!!
أمينة: حاااح فييك خاصك نييت للي تجمعك
اورطيغا: اودي غير سيري هادي غادي تجمعنا انا وياك وهي قد صبع رجلي
أمينة: ههه (مشات لبحر وهو رد التيليفون عجباتها هضرتو)
اورطيغا: وريني نشوف البيرو ديالك
ملاك: (ناضت من بلاصتها كتوريه البيرو ديالها ورجعت جلست قلبت الكاميرا لوجهها)
اورطيغا: (شافها كتهضر وتظحك مع شي وحدة وهو متبعها كملت وشافت فيه ممتيقاش انهم رجعو كيهضرو هاكا، تبسمت باغية تسولو غير فين هو) معاش خارجة؟!
ملاك: كل مرة ومعاش ولكن مع 3 الا كتاب غنسلت نمشي.. عرفتي الموت دالصهد
اورطيغا: هنا فالحسيمة مبرداااا
ملاك: (كيبقى فيها الحال عمرها وصلت لدوك لبلايص) بالصحة..
اورطيغا: دابا نجيب الزين ديالي هنا (بقات ساكتة) مزال مرديتي علية!!
ملاك: (مبهللة) فاش؟!!
اورطيغا: تتسطاي!!
ملاك: (تبسمت، بغات تجاوب وتعبر دخلت للي خدامة معاها شافت فيها كتهضر على حساب شي اجتماع) واش دابا؟!!
اورطيغا: (هز راسو شاف فمو للي كتشير ليه باش يجي،)
ملاك من بعد ونصوني عليك
ملاك: (شافت فالتيليفون كانت مابغاتش تبين انها كتهضر مع شي واحد قبل متجاوب قطع)
زينب: شكون هدا العفريتة
ملاك؛ حتى واحد غير معرفة وصافي، كملي وفين هاد الخدمة؟!!
اورطيغا: (دار التيليفون فصكادو ديالو عطاه للسرباي حيت مبحرين فبلاصة تابعة لوطيل ودخل عند مو للي جلسو فالكشكوشة عاد ناضو يعومو شوية ويجمعو خالقين الجو غير بيناتهم.. كملو مشاو تغدااو)
تزيدي شي حاجة؟!!
أمينة: شبعت اولدي الحمد لله بغيت غير نمشي نتكى دابا
اورطيغا: سيري ترتاحي، لعشية نخرجو لشي قنت
أمينة: ديني لدوك لبلايص ديال زديح وضوااو
اورطيغا: ههه وااخ (مشات هو بقا كيكمل غداه هز عينو على شي ݣاورياات كانو بوݣوصات بالجهد تبسم مع وحدة فيهم للي رداتلو الابتسامة، حتى كان بغا ينوض وهو يتفكر نهار حلف من ديك السلخة حيت باينة باش غيختمها مع وحدة فيهم... وهو يتراجع عاد ديك نص متر للي باااينة غتشحفو ومخلية متحلالو حتى وحدة..
دخل لوطيل لداخل هز شكارتو ومشا طلع للشومبر دوش وبقا متكي كانت 3 دلعشية صونا عليها أبيل عادية جاوبت)
فين
ملاك: (مكرهة) مزال فالخدمة... بففف كنت باغية نمشي عييت والله
اورطيغا: (كان كيتسناها تجاوب ولو غير بميساج)
ملاك: الو!!
اورطيغا: وفاء غتبقى معاك؟!
ملاك: اه ونيت مونساني
اورطيغا: تتخرجو بجوج تتسرااو!!!
ملاك: الله يهديك عاد جينا لبارح وزايدون مكاينش لا خروج لا دخوول، راه حدي الخدمة صباح وكنمشي نتكون فالدار يقدر بعد غدا للي نقدو نمشيو لعروبية ديالنا كاملين
اورطيغا: علاش؟!
ملاك: غير عارضينا وصافي وكولشي كيبغي يمشي لتماك
اورطيغا: اممم مزياان.. معندك متقولي؟!
ملاك: (تبسمت) اممم اه ولكن خايفة
اورطيغا: تنعض؟!!
ملاك: ماشي مسألة كتعض
اورطيغا: وهو كنعض ولكن وشنو؟!
ملاك: هه معرفتش كفاش نقولها
اورطيغا: قوليها كما جات بغيتي نخلي ليك الوقت حتى تقوليهالي فوجهي ولا بلاتي..
ملاك: مااام..
اورطيغا: مهم انا غنتكى شوية وفالليل عندك الوقت باش غنهضرو
ملاك: (تبسمت) اوكي
اورطيغا: (متقلااااا) ونشوفك
ملاك: اممم نشوف كيف ندير
اورطيغا: لا غنشووفك ياله سيري رجعي الملل وداك الصهد ديالك.
اورطيغا: مهم انا غنتكى شوية وفالليل عندك الوقت باش غنهضرو
ملاك: (تبسمت) اوكي
اورطيغا: ونشوفك
ملاك: اممم نشوف كيف ندير
اورطيغا: لا غنشووفك ياله سيري رجعي الملل وداك الصهد ديالك...)
ملاك: (قطعت متبسمة مزال هضرتهم رسمية ولا حيت هي مزال مخلياها هاكا بغات كولشي يمشي خطوة خطوة كما كولشي بدا من اللول، بقات عاضة على شنافتها شنو دير وشنو تقول بلاتي واش صافي غير تعطي الأوكي هي فكل الاحوال باغياااه وبلغت تكون معاه ولكن يا يمشي على هواها وتكون بوحدها ولا تبعد كما موالفة، تعذب شوية ويفووت الحال! كما القاعدة ديالها )
بففف ولكن هدا صعييب ماشي بحال!! وعاد عاجبني بزااف!!!
(رجعت كتكمل خدمتها وصل الوقت خرجت وصلت صاحبتها فطريقها وهي مشات فديك الطنطينة مقررة ترغب باها يخليهم يخرجو غير الشلال يتبردو شوية، وقفت بالطموبيل خرجت لقات باها واقف مع شي واحد قربت حداه شوية بقات واقفة يعني راه بغاتو كمل ومشا عندها باستلو يدو وهي متأكدة 100 ميبغيش وغدخل مها عاود فهادشي)
رشيد: الله يرضي عليك.. بديتي الخدمة
ملاك: اه كانت مزيرة اليوم بزااف
رشيد: معليش باش الواحد كيحلل رزقو
ملاك: اه، حم بابا عفاك واش تخليني بلاتي نخرجو انا وصاحبتي هاديك للي معايا
رشيد: فين؟!
ملاك: غير الشلال نجلسو شي نص ساعة ونرجعو هي ماشي بنت هنا ومجاتش نبقاو غير فالدار زعما غير مرة مرة نخرجو ناكلو شي نص ورجعو غير هاد نهار وصافي
رشيد: معليش الا غير هاد نهار
ملاك: (بدهشة) وااايلي!! قسم الا بغيت
رشيد: ههه متعطلوش
ملاك: (بفرحة) اوا شتي منين كترطاب كترجع هو هداك
رشيد: ياله سيري ومتعطلوش راه عندي خدمة
ملاك: واخا بابا (عجبها الحال حيت خلاها، مشات للدار تلاقات بنجية وهي كتحل لباب سلمات عليها معندها منها حتى شي حساسية او مبقاتش منين قلبها شد رداار اخر) كدايرة خالتي لباس عليك
نجية: الحمد لله ابنتي على سلامتك صافي كملتي الخدمة فاس
ملاك: هاد الساعة اه
أميمة: مامااااا (مشات حدا لباب حيت سمعت سميتها) قالك حمزة واش تخرجي معانا؟!!
نجية: لفين؟!
ملاك: ياله خالتي بسلامة عليك
نجية: بسلامة احبيبة.. فين خارجين؟!!
أميمة: (غير قالت هكاك قدام ملاك) بغا يديني لدارنا وانا مبغيتش هضري معاه
نجية: بيناتكم ابنتي سمعتيه داك نهار قالي حتى حد ميعاود يدخل فيه
أميمة: يااااك!! مجات يديني لدارنا حتى جات هاد القزمة
نجية: لا حول ولا قوه الا بالله العلي العظيم... شحال ݣاع فايتاها نتي بالطوب باش ظلي عليها القزمة القزمة
أمينة: مدافعي عليها امرت عمي؟!!
نجية: مبقيتش ماما!!! سيري ابنتي منك ليييه...
ملاك: (دخلت لقات وفاء كتلعب مع أنير) منعستيش
وفاء: قتلني الصهد اختي لدااخل اللهم هنا مفوهة وكلعب مع هاد لغزاال البوݣوووص ديالنا
ملاك: (حركت راسها باه مشات للكوزينة حطت حقها دالغدا وخرجت حداهم كتاكل حاضية تيليفونها)
حقا واحد شوية ونخرجو
وفاء: فين؟!
ملاك: نضربو ضويرة نجلسو حدا الشلال تماك مبردة شوية
وفاء: وباباك؟!
ملاك: راه حتى سولتو وقالي اه عاد قلتها ليك (كملت غسلت فاش كلات مغمضة عينها على الكوكوط بمنطق نغسل فاش كليت والكوكوت للجميع.. دخلت لبيت مها كانت متكية سمعت تيليفونها كيصوني لقات أمينة مصونية عليها وأبيل ڤيديو تبسمت)
هادو تصاحبو قبل منتصاحب مع ولدها
مااااماا.. مااااااااامااا طاتي أمينة كتصوني عليك (ظحكت على راسها تقطع لابيل مشات حدا مها للي فاقت) عاودي صوني عليها
زهرة: (شدت التيليفون دارت نظاظر عاد صونات وملاك كتبدل حوايجها) اختي أمينة
أمينة: واش كنتي ناعسة؟!
زهرة: اه
أمينة: اوا نكمل ليك على ديك الخطية (ملاك دخلت للدوش توضات حيت هضرتهم كانت على عاود لية نعاود ليك العرس ومفتاحة، خرجت لبست عباية صلا صلات الظهر مزال كتسمعهم حتى تسمع صوت ولدها كيعلمها باش يخرجو)
شوفي هاحنا خارجين حتى رجع ونكملو
زهرة: بالصحة والراحة ومتديش عليها
أمينة: غااار صبري نوريها الݣرسيفية علاش قادة (قطعت)
ملاك: مالها؟!
زهرة: غير شي هضرة وصافي
ملاك: ماما راه علمت بابا غنخرج انا وفاء وخلاني بالحق منتعطلش
زهرة: مزيان، اوا دي معاك أنير مسيكين مكيخرج مكيدرج
ملاك: لبعااابع لوااه
زهرة: عفاااك ابنتي الله يرضي عليك ديه يلعب شوية
ملاك: لا اماما منخرجووش معايا اوا صاافي داكشي للي بقالي
زهرة: حشومة عليك ديه مسكين باش الا تعطلتي شي نص ساعة نقولو راه دات خوها يلعب (لوخرا بقات ساكتة كتقتاتع) جييه لبسو حويجااتو...
ملاك: الا دار لبسالة
زهرة: واللللللللله يااا بنتي ونعرفك ضربتيه ولا غوتي عليه أنا للي غتلقاي معايا المشكل فالخروج ودخوول وخلينا زوينات وكوني بحال شي بنيتة مربية كتسمع الهضرة محترمة وسيري جيبي خووك
ملاك: متبقايش تقولي خووك (بقات كتأفأف فالداخل ديالها مشات جابتو ولحقت حتى وفاء تلبس وهي دخلت للدوش حايرة واش تقولو راها غتخرج ولا مزال مبدا عندهم هادشي تبسمت)
اصلا مزال مواافقت على هاد العلاقة واش تبدا ولا لا!!! واخا هي باادية ولكن اصلا هو معلمنيش راه خاارج!!!
وفاء: (كانو فالشلال جالسين فقهوة عائلية كتكون عامرة فهاد الوقت والوليدات كيعوومو ملاك جالسة كتفرج وكتصفي بالها ساهية ومبردة مربعة يدها كتفرج مخلية خوها لوفاء للي كتلعب معاه وتوكلو جيرڤي وهيرنيس)
أفين ساهية البنت!
ملاك: غير كنشووف وصافي، تشربي أتاي؟!!
وفاء: لا بغيت عصير (بغات تجبد لفلوس)
ملاك: انا للي عارضاااك غير تهدني
وفاء: هاي هاي هاي ماات شي حمار
ملاك: ههه واخدين علية فكرة غالطة مهم انا عارضاك هنا ونتي عرضاااني لعشا (بقات كتشوف فيها) وصافي بلا متحلفي اصاحبتي مابيناتناش
وفاء: الله يعطيني وجهك
ملاك: (كتقلي ليها السم بحواجبها، مشات جابت أتاس وعصير وجلسو) والله مكرهت ندخل نعوم معاهم
وفاء: ويييه ولكن عمي رشيد يسمعنا دخلنا نعومو يصليو علينا فالليل
ملاك: ههه مزيان منين ندامجتي دغيا وسهلتيها علية (جاها ميساج من عند اورطيغا)
"ناعسة!!"
(جاوبت)
"لا خرجنا انا وفاء وأنير للشلال"
(مجاوبش، تبسمت عارفاااه غيتجنن، شافت فأنير كيصفق مع شي دراري كيضربو بالدربووكة)
شوفيلك بغا يشطح
وفاء: (مداتو ليها) هاكي شديه نمشي لطواليط
ملاك: (شداتو كان غير كيظحك وهي كتهز رجليها مع الايقاع مخلياه يشطح وحتى هو هاز يدو على اساس كيشطح ظحكها صونا عليها اورطيغا أبيل فيديو قدات شالها دغيا حيت تعوج وجاوبت دايرة لفلتر، شافتو مغووبش مقرب التيليفون لوجهو)
السلامة يا ربي
(دارت الكاميرا فوجه أنير)
شوف بووعوو شووف
اورطيغا: (هنا باش كتغلبو تبسم مع أنير للي ظحك فوجهوو)
خفتي ازريقة من ديك السنفورة
ملاك: هاهاها ماشتي هاد الوحش الأسود
اورطيغا: معامن تشاورتي نتي باش خارجة
ملاك: (ردت التيليفون لوجهها) مع للي تشاورتي معاه باش سافرتي وخارج دابا كتفطح مع رااسك ونتا حاسدني على حجرة وجغمة ديال الما
اورطيغا: واش متتقدايش
ملاك: لا الباتري عامر ديما الحمد لله
اورطيغا: (بقا غير كيشوف وهي كضور عينها)
مبغيتش نكون قبييح
ملاك: كتر من هاكا!!! (مجاوبش) علاش شنو درت؟!
اورطيغا: مفهمتش تتخرجي عادي هاكا على الأقل غير تعلمي
ملاك: (شادة لسانها للي باغي غير يداابز ولكن مسخيااش بييه وبااغااه)
اورطيغا: مهم انا وقفت الطموبيل فطريق نوصل ونرجع نصوني عليك بغيت تبقى ظريف معاك ازين (قالها ممتبسمش ولكن جاها بحال تهديد)
ملاك: (جات تهضر وقطع) بففف واش انا كان همي فبابا غرجع همي حتى فهاد خينا!!! (جات وفاء جايبة لانير لعبة مداتها ليه)
وفاء: كاين لعاب لفوق ديال دراري صغار اجي لعبوه
ملاك: واخ.. (مشات خلصت شنو شربو وطلعو كيلعبووه وعقلها معاه هي باغا تسمع كلام زوين اه بغات اهتمام ولكن داكشي يكون لبق وبالمزاوݣة والرومانسية ورغيب اما هداااا !!
كملو من تماك تمشاو على رجليهم للمراشي كيتمنظروو خدات وفاء جوج بيجامات طوال شوية حيت عندها مقزب وخدات لأنير فوقية حمقااتها ومشااو ياكلو نص كفتة ملاك للي خلصت وخدات لمها ومرة جدها ومرت عمها هاد المرة.. شافتو مصوناش رجعو فحالهم للدار وهاد المرة باها عجبو الحال متعطلتش ومخرجة خوها للي عمرو خرج من غير الجلبة وفالعرس...)
ملاك: (وصلت 11 دالليل مزال مصوناش جالسة على اعصابها دخلت كتشوف امتى دخل للواتس كانت من لبارح شافت فوفاء للي جالسين فسطح كيتبردو)
فين عائلتك دابا اوفاء
وفاء: سافروا لعروبية وانا معنديش مع هداك القنت ياكما مبرزطتك املاك بمجيتي هنا
ملاك: مالي هزاك فوق كتافي بلعكس اصاحبتي فرحت بزاااف والله
وفاء: عرفتي فاش كنمشي لتماك كيبقاو علية تزوجي تزوجي وكيجيبو لية شي شااارف الله يهديهم وصافي معاجبااهمش جلستي هاكا
ملاك: شحال فعمرك؟!
وفاء: 35 شرفت ياك ههه
ملاك: لاااا بلعكس ومبيناش حتى فيك وأصلا العمر رجع غير أرقام هانا انا تحلفي علية عندي 20 عام
وفاء: ههه لا مغنحلفش ولكن الطول يعطيووك حتى 16
ملاك: (كتعيبها مخرجة سنادرها) هننننن يخخخ على بشاار
وفاء: ههه ولكن مطيحة لينا التيتيييز
ملاك: (شادة الظحكة) سير تزمري
وفاء: شنو درتي نتي واورطيغا؟!
ملاك: مدرنااش كنهضرو عادي وصاافي حقا ݣاع مسولنا فختنا صبري نصوني عليها (صونات على خديجة فلواتس) طافية،
وفاء: صوني على يوسف
ملاك: لا مجاتش نصوني على يوسف معارفاش حتى شحال تكون عندهم الساعة نخليلها اوديو..
(بقاو مجمعين حتى وفاء غلبها نعاس)
وفاء: نهبطو؟!
ملاك: غير سيري نتي انا شوية ونجي (هبطت وفاء وهي بقات) مال هاد زمر مصوناش!!!
~~~~~~~~~~~~
اورطيغا: (من بعد متسرااو رجعو لوطيل حاضرين لسهرة للي كاين فيها مغني شعبي وكيتعشاو فنفس الوقت كيشوف فمو لي كانت محتاجة هاد تسافيرة هز تيليفونو كاين ميساجات ولكن من عندها مكاين واالو رجع قلب لافيشور للطبلة)
أمينة: صورني وانا كنصفق (تبسم صورها وهي دارتها فسطاتي ديال الواتس)
اوا هدا هو الجهد اولدي نمشي نعس، نتا مزاال؟!
اورطيغا: مزال الوالدة غير سيري ترتاحي
أمينة: عنداك تمشي لشي قنت ولا تزيد مع شي وحدة
اورطيغا: (تبسم تفكر كلام ملاك ديال وكان جيت بنت) غير هنا
أمينة: تمسا بخير اولدي (باس يدها وبقا جالس كيتصنت حتى ناض وخرج برا بغا يجلس حدا البحر للي كان الجو شاعري،
الجو واخا كان بارد شوية ولكن هادشي للي كان محتاج هوا نقي ومكاينش صدااع جلس على الرملة نيشان كانو ناس قلال بعاد وهو ساهي غير فظلمة البحر وسما للي صافية حتى جاه ميساج من عندها فيه)
Salut...
خديجة: (كان منظر خيالي للي كتشوفو قداامها عمرها شافت بحال هاد الطبيعة الي بحال مرسوومة... البحر بكترة مصااافي كتشوف الحجرة صغيرة للي كاينة فالتحت نقي بزااف تحشم دخل توسخو...
حتى الشومبر للي خداو جاية بعيدة على باقي الشاليهات وفيها بيسين صغير عاد زليقة صغيرة لبحر
منين سمعت فاللول دولة إفريقية معجبهاش الحال ولكن تصدمت من هاد المنظر احسن بزااف من ميات اوروبا ومن شي قيساريات ولا حوانت!!! بقات غير متأملة هاد المنظر كمل يوسف الإجراءات من للي وصل معاه لباݣاج وعطاه البرنامج للي باغي وامتى الفطور يجي لعندهم وحتى التاكسي للي يجي ياخدهم لمدينة.. لحق بيها من بعد مسد لباب وكان عاجبو كل شالي يكون بعيد على لاخر اما الشومبر من لداخل كانت عبارة على شكل كوخ صغير مقاد من الخشب وحتى شكل النموسية مهزوزة على الارض ورقيقة ضايرين بيها خاميات لونݣازا)
خديجة: شحال زويييين هادشي ايوسف
يوسف: (مغرم بالبلاصة واحسن رفقة كانت هي مرتو خديجة حس باختيار موفق يجي معاها لهاد لبلاصة)
عجبك؟!
خديجة: بزااااااااااااف احسن مفاجئة كانت هي هادي (عنقاتو)
يوسف: (متبسم) ولكن بغيتك تواعديني بحاجة
خديجة: (رجعت اللور شافت فيه) شنو؟!
يوسف: انا وياك مزوجين دونك مبقاتش شي حشمة بيناتنا وحنا هنا عرسان فشهر العسل
خديجة: اهااه!!!!
يوسف: بغيت نخلي ذكريات زوينة فبالي نخرجو نتسراوو ناكلو للي بغيتيه غنديرووه
خديجة: هنا الماكلة حلال؟!!
يوسف: اه كاين بزااف هنا حيت سولت وقلبت ديجا قبل منجيو.. مهم منين ندخلو الشالي ونسدو علينا أي حاجة طلبتها منك كنهضر على نعاس بيان سيييغ دار مكاينش شي حاجة سميتها حشومة عييب
خديجة: (تبسمت) متحتاجش اصلا تقولها
يوسف: يعني متافقة معايا!!
خديجة: بقيت فية حيت مغيبقاوش ليك ركابي باش تعوم
يوسف: ههههه مزيااان
خديجة: (غمزاتو ودخلت للدوش هي عارفااه شنو باغي وهو عارفها شنو بغات ولكن بالصح عاجبها الحال...)
ملاك: (كتسناه يجاوب على لميساج حتى صونا عليها) حم الوو
اورطيغا: علاش مشاعلاش كنكسيون
ملاك: غير طفيتها وصافي
اورطيغا: بغيت نشوفك
ملاك: (تبسمت) ظلام مغتشوفنيش
اورطيغا: علاش فينك؟!
ملاك: فسطح
اورطيغا: سيري لبيتك
ملاك: (فنفسها هادو مالهم مع لبيت واش حسابلهم كولشي عندو بيت ديالو مبقى حد كينعس فوق سداري ولا فالصالون!!!!) ناعسة فيه وفاء
اورطيغا: اومن بعد
ملاك: مبغيتش نصدعها
اورطيغا: شعلي الضو ولا صيفطيلي تصويرة
ملاك: وعلاش
اورطيغا: اجي!!! سطح ديالكم معاليش يعني سطح للي حداكم ساهلة للي يطل منو يشوفك؟!!!
ملاك: (كضور عينها) اممم هنا مكاينش للي كيطل على شي واحد كولها داخل سوق راسو
اورطيغا: (كيتخيل حمزة كيطل عليها) عاجبك الحال يبقى يطل عليك داك ****
ملاك: (بجدية) حتارم راسك امراد
اورطيغا: وشنو للي مخليك فسطح فهاد الوقت
ملاك: (بعصبية) حيت كنهضر معاك، معنديش فين ناخد راحتي كنهضر هنا فسطح
اورطيغا: (رجع مبرد) لساانك ابنت العبد مبري منك المرة اللولة ومزال مدازتش ودابا تتغوتي
ملاك: (كتغوت) مكنغوتش ولكن مكنحملش للي يكذبني انا مكنتسنى حد يطل علية ولا نطل عليه
اورطيغا: (حرك راسو باه حيت هاد الاحساس الغيرة خاص بيه هو ماشي بالضرورة يخوي غضبو فيها بقاو ساكتين بجوج لمدة جوج دقااايق....) انا بغيت نعرف املاك شنو عندك فداك الراس؟!
ملاك: عندي نتا
اورطيغا: نورمال خاص نكون فقلبك ماشي فداك العقل عندك
ملاك: وشنو الفرق
اورطيغا: حيت عندك شي إجرام تمااك نخاف على *** معاك
ملاك: (مكيخليهاش تفرح) متعاودش تخسر الهضرة
اورطيغا: ياااك نهار متقوبة وكرش من الزنقة شنو داكشي؟!! من داك نهار خسرتي حق (كيعيبها وصوتو مرققو) متخسرش الهضرة انا متيعجبنيش هاكا...
نسااااي ابنتي بغيتك تقبلني كما أنا ماشي نبقى نحفظ باش نجي نفتي عليك
ملاك: (تبسمت) ولو مكيعجبنيش داك تخسار الهضرة وزايدون نتا خاصك تطلب مني سماااحة حيت بمسبتك نتا عصبتيني وخليتيني نقول كلام انا مموالفاش بيه الغلط كولو ديالك اذا متبقاش تخسر الهضرة
اورطيغا: (تبسم من طريقتها) .... كولشي بالولف دابا تولفي
ملاك: الولف صعيييييب
اورطيغا: للي تيجي بالساهل ازين تيمشي بالساااهل
ملاك: شكون خبر عليك هاد الخبيرة
اورطيغا: زمااان
ملاك: ههه تنهضر بحال شي واحد شاارف
اورطيغا: ولكن المطور نحييلة
ملاك: (دارت يدها على فمها كتبسم باش ميسمعش)
اورطيغا: ݣاع هادي فرحة!!!
ملاك: واش نتا بعقلك
اورطيغا: وعلاش للي بعقلو غيدي على وحدة داخلة تخبا ففريݣو دلحم
ملاك: (عوجت فمها) موووهيييم
اورطيغا: شنو غديري غدا؟!
ملاك: والو الخدمة وصافي
اورطيغا: وغتخرجي عاود؟؟؟
ملاك: لا.. معرفتش صراحة
اورطيغا: علاش متشديش شي يامات واجي ونسي خالتك مينا...
اورطيغا: متشديش شي يامات واجي ونسي خالتك مينا
ملاك: (تبسمت) خالتي مينا مرحبا بيها عندنا هنا الا بغات
اورطيغا: (طانز) لفين لصفرو شانطي وجوج حوااانت؟
ملاك: هههه وقهوة بابا
اورطيغا: (تبسم) غدا الا كتاااب غنديها تغطس
ملاك: وااايلي! وغتبغي؟؟!
اورطيغا: هي مولات الفكرة
ملاك: سعدااتكم
اورطيغا: بغيتي تغطسي؟! شي نهار غنغطسك معايا
ملاك: (معرفت تقول ان شاء الله ولا شنو اصلا معارفاش حتى نيتو فين مشاات)
اورطيغا: باش تتعجبيني نيتك مصفياااش
ملاك: ههه زعما نتا لولو
اورطيغا: شنو هاد لولو؟!
ملاك: غير تعبير مجازي
اورطيغا: واش جاب لولو لية.. بشااخ على لقرايا.. (سمعها كتعيبو) امتى غترجعي لفاس اديك المعاقة؟!
ملاك: (كتشقلب عينها) معرفت اصلا واش رجع؟!
اورطيغا: غتسمحي فقرايتك؟؟!
ملاك: لااااا
اورطيغا: (تعصب) واش مزال هاد ال*** دالهضرة بينتنا مغتقاااد!! من دابا فاريها باغية تكوني معايا اه لا!!
ملاك: (مفهمتش عصبيتو) علاش كتغوت؟!
اورطيغا: عطييتك وقت تفكري؟!! متيقاش فية؟!! خايفة مني؟!
ملاك: (جابها نيشااان) لااااااا
اورطيغا: اوا وشنو تنهضر معاك بحالا تنهضرك بالزز ها الكرة عندك ونتي بينيلي شنو كااين!!
ملاك: اصلا مسمعت من عندك واالو
اورطيغا: شنو باغية تسمعي
ملاك: ماشي باغية نسمع!! انا باغية نعرف نتا اصلا شنو باغي
اورطيغا: باغيك نتي.. راه باااينة لعمى باغيييك (سكتت كتفرنس) نعتابرها حتى انا؟!؟
ملاك: (كتعوق وجهها باش تشد ديك تفرنييسة للي وصلت لودنيها) ياك فاللول مكنتش حاملني
اورطيغا: اوا شي سخطة مق*** هادي طيحت حبنا على حجيييرة
ملاك: بزاااااف عليك ولهاا يح...
اورطيغا: (قبل متكمل) وااا ريحي من ديك الهضرة، انا فاللول لوكان حكمتك وكان عجنتك
ملاك: حتى انا فاللول مكنتش كنضويييك غير كنشووفك كنكحل بلعمى مكنت كنحمل الشعرة فيك
اورطيغا: (تبسم) دابا هضرنااا
ملاك: ههه (عجبها الحال وظحكها فنفس الوقت) علاش لبارح كنتي معصب؟!
اورطيغا: (زفر) و شكون خلاك تبقى هااني.. مهم خلينا فينا انا وياااك باغيك تفهمي واحد الحاجة
ملاك: شنو هي؟!
اورطيغا: خروج دخول للي درتيه غتجي تبوانتي عندي
ملاك: ههه علاش
اورطيغا: باش نبقاو هانيين وبيييس والا بغيتي الطريقة لوخرا حتى هي مرحباااا...
ملاك: شي اوامر اخرى؟؟
اورطيغا: ماشي أوامر املاك، ولكن فهميني غنكون بعيد عليك ماشي بحال فاش كنتي فاس كنت عارفك فين كاينة وفين داخلة وفين خاارجة
ملاك: (حركت راسها باه قنعها نسبيا باش مريكلماتش) علاش نتا كاري فالحومة ومساكنش فدار ديال السعادة؟؟! (سؤال ديما كيجي فبالها حيت دار السعادة زوينة)
اورطيغا: حيت ماشي داري ازين للي غنبقى فيها ديما وعاد ماشي ديما تتكون خاوية باش نجلس فيها
ملاك: انا كنشووفك نتا كترتاح فالحومة كتر من السعادة زعما ماشية قضية عامرة ولا خاوية
اورطيغا: سي، تماك كبرت وتماك ترتاح
ملاك: ولكن فيها المشاكل بزااف
اورطيغا: واااا هو السعادة حي كلاص والناس فيه داخلين سوق راسهم قريب لخدمتي تيعجبني منين تنبغي نكون بوحدي، وووالليدو فيه صحابي تنعرف الناس تماك كبرت وسطهم هادا هو الفرق، نتي شنو تيعجبك؟!
ملاك: انا الليدو عجبني غي حيت.. احم قريب لفاك
اورطيغا: تعطي كلوتك ومتهضرييش
ملاك: ههه (عينيها كيتغمضو بنعاس ولكن مساخيااش)
اورطيغا: ديري أبيل ڤيديو بغيت نشووفك
ملاك: ظلااام
اورطيغا: غتمشي للقنت للي حدا البولة دبرا وغتهضري
ملاك: خلي غدا عفااك
اورطيغا: علاش حتى لغدا للي عطا الله عطااه طحت على زناافري ومكاين للي يفك
ملاك: على زممممممممممممر!!!
اورطيغا: ياله ديري (قطع قبل متجاوب وصونا عليها جاوبت معطلة كيكمش عينييه واش تبان ليه) خدمي لفلاش
ملاك: مافيهش
اورطيغا: راه داز عندي داك التيليفون ابنتي
ملاك: (عاد تفكرت راه تيليفونو.. دارت الفلتر عاد شعلت لفلاش وهي تكمش عينيها من شعا بقا كيشووف فيها كان حتى هو ماابينش بزااف) عمااني لفلاش
اورطيغا: (بقا غير كيشوف فيها)
ملاك: احم (نقصت من نبرة صوتها منين سمعت باب ديال بيت مها تحل) مراد بابا خرج من بيتو وغيشوفني مزال هنا
اورطيغا: صافي غير قطعي
ملاك: اه انا غنقطع، اصلا خاص نعس غدا عندي اجتماع مع النبووري، نتا غتبقى تماك؟!
اورطيغا: شوية وندخل فحاالي
رشيد: ملاااااااااك نتي للي فسطح؟!
ملاك: اه ابابا (قطعت وهو تبسم وناضت طلت عليه) كنت كنتبرد
رشيد: 2 دصبااح هادي ونتي مزال تمااك؟!!
ملاك: هانا هابطة ابابا راه غير بقيت وصافي نسيت راسي
رشيد: السمرة على رااسك عاود غتمرضي دخلي تنعسي حسن...
خديجة: (لبست بيكيني👙 للي جاب ليها يوسف شافت فلمرايا عاجبها راااسها بزاااااف واكترية منقية جسمها مزيان عمرها عملت براسها بحال هاكا من شعرها إدغار رجليها، جات مبدلة على الدوبياس العادي اول مرة تلبس بحال هاكا دخل يوسف عندها للي كيتسنااها طلعها من رجليها لراسها صفر باعجاب)
واش متأكد مغيشوفني حد هنا؟!!
يوسف: عييب، واش انا نبغي شي واحد يشوف فلحم مرتي؟!!
خديجة: معرفت يدوز غير بالغلط
يوسف: وعلاش انا احبيبة ختاريت شاليه بعييد على كولشي وأصلا داكشي فبرنامج ديالهم ممنوع شي واحد يوصل للمساحة ديالنا متخافيش انا داير حسابي، باش ناخدو راحتنا
خديجة: (تبسمت وضارت لمرايا لبست الخلخال مكوزة بلعااني جا من موراها لاسق فييها) يوووساااف
يوسف: أأ.. حسابلي عيطتيلي
خديجة: ههه بااز (وقفت وهو من موراها لاسق كيطلق ليها شعرها)
يوسف: عجبني لكولور للي فشعرك
خديجة: (دارت ݣلوص) احح نتفتني
يوسف: باغدوون شيغي.. (خرجو من تمااك بقا بشورط العومان تدق لباب كان روم سيرڤس جابو ليهم فطور فبلاطو كما بغا كان قهوة، عصير الليمون، اومليط بالفرماج، فواكه مشكلة، وبان كيك دخلو نيشان لابيسين وحطو فالجنب وخرجو عاد خرجت من الحمام تبعاتو كان جو خطييير. تحبها داك الفطور للي مزوق ومقااد بحال داكشي دالافلام للي كانت كتشووف ممتيقاش انها هنا!!!)
خديجة: زويييين هادشي بزاااف
يوسف: تتعرفي تعومي
خديجة: اه
يوسف: (تلاح هو فلما حتى ترشت كظحك وبعد للقنت) اجي عندي احبيبة (حتى هي تصوطات عندو بقات تحت الما حتى صلت حدا رجليه وطلعت عاجباااه مطيرة ليه العقل مع قربت باسها تبسمت وبقات غير كتشووف مكاين حتى واحد ضاير بيهم وحتى للي غيعوم حداهم الشاليه بعييد وجاي عالي شوية بقات كتشوف فلبحر للي اللون ديالو بحال سما اما هو من موراها كيبوس كتفها وظهرها ضارت عندو)
عجبك الحال احبيبة
خديجة: (عنقاتو) بزاااااف.. معليش نتصور
يوسف: هاكا؟!
خديجة: نصيفطها غير لخوتاتي
يوسف: بلاش اخديجة تصاور متعرفيش فين يطيحو ربما غير تيليفوناتهم يتلفو ولا توقع شي حاجة بلاش تصوري بحوايجك اه هاكا منقدرش نغااامر (تبسمت وهاد المرة هي للي باستوو وبدااتو...)
أصبحنا وأصبح الملك لله..
اورطيغا: (فاق معطل على للي موالف صونا على مو كانت هبطت تفطر وبقات كتمنظر رجع شاف فالساعة كانت 11 دوز نمرة ملاك وبحرا كيقد يحل عينييه..)
ملووكة
ملاك: (بابتسااامة عريضة) صباح الخير
اورطيغا: (بصوت نااااعس) صباح النور (سمع شي واحد عيط ليها وهو يقلش) شكون هاد خينا !!
ملاك: خدام معايا
اورطيغا: ولاش تيعيط ليك
ملاك: حيت عندنا اجتماع وصافي، راه فعمر بابا هه
اورطيغا: يكون حتى فعمر جدك، اصبري نصحصح لمك ونعاود نصوني عليك
ملاك: ههه بسلامة... (قطعت عليه وناضت فرحاانة تابعة للي عيط ليها...)
#بونوي